ايماقتار • 21 قىركۇيەك، 2021

جامبىل وڭىرىندە جومارت جاندار ماراپاتتالدى

26 رەت كورسەتىلدى

جامبىل وڭىرىندە يگى باستامالارعا بارىنشا قولداۋ كورسەتىپ، قولدا بارىن كوپشىلىكپەن ءبولىسىپ كەلە جاتقان ازاماتتار بارشىلىق. قوعامدا قايىرىمدى جاندارعا قۇرمەت تە بولەك. ايماقتاعى اتىمتاي جومارت ازاماتتاردى كوپشىلىككە ۇلگى ەتۋ ماقساتىندا، «رۋحاني جاڭعىرۋ» باعدارلاماسى اياسىندا ءتورتىنشى جىل قاتارىنان «جومارت جۇرەك» سىيلىعى تاپسىرىلىپ كەلەدى. «جومارت جۇرەك» قايىرىمدىلىق سالاسىنداعى بۇل سىيلىق اقپارات جانە قوعامدىق دامۋ مينيسترلىگىمەن بىرگە ەلىمىزدە قايىرىمدىلىق قىزمەتىن دامىتۋعا ەلەۋلى ۇلەس قوسقان ازاماتتاردى ىزدەستىرۋ جانە كوتەرمەلەۋ، ولارعا قوعام نازارىن اۋدارۋ ماقساتىندا تاعايىندالعان.

ءداستۇر بويىنشا تاراز قالاسىندا­عى قايرات رىسقۇلبەكوۆ اتىنداعى سايا­باقتا جامبىل وبلىسىنىڭ اكىمى بەر­دىبەك ساپارباەۆتىڭ قاتىسۋىمەن «جو­مارت جۇرەك» سىيلىعىنىڭ وبلىستىق كە­­زەڭدەگى لاۋرەاتتارىن ماراپاتتاۋ ءرا­سى­مى ءوتتى. سالتاناتتى جيىندا وبلىس باسشىسى قايىرىمدىلىق شارا­لارىن ۇيىم­داستىرۋمەن اينالى­سىپ كەلە جات­­­قان ازاماتتارعا العىس ءبىل­دىردى. «قايى­رىمدىلىق – ءبىزدىڭ قاسيەتتى قۇندى­لى­عىمىز. ءبىز قاشاننان ءبىر-ءبىرى­مىزدى قول­داپ، كومەك كورسەتىپ، مەيىرىمدىلىك تا­نىتامىز. سوناۋ اشارشىلىق، سو­عىس كەزىندە دە اتا-بابالارىمىز ۇل­تى­نا، تىلىنە قاراماي كوپكە كومەك كور­سەتىپ، قولۇشىن بەرگەنى بەلگىلى. سول يگى ءداستۇر ءالى دە جالعاسىن تاۋىپ كەلەدى. ەل­با­سىمىزدىڭ «رۋحاني جاڭعىرۋ» باع­دارلاماسىنىڭ اياسىندا قولعا الىن­عان «جومارت جۇرەك» جوباسى ءبىزدىڭ وڭىرى­مىزدە دە تابىستى جۇزەگە اسۋدا. قام­­قورلىقتى قاجەت ەتەتىن وتباسىلارعا ءبىز­­دىڭ دەمەۋشىلەرىمىز، كاسىپكەرلەرىمىز ۇنەمى قايىرىمدىلىق تانىتادى. بۇ­دان بولەك وبلىستا «جومارت تۇلەك» جو­باسىن جۇزەگە اسىرۋدامىز. ونداعى ماقسات – تابىستى تۇلەكتەردى ءوزىنىڭ مەكتەبىنىڭ، تۋعان اۋىلىنىڭ الەۋمەتتىك ماسەلەلەرىن شەشۋگە، وركەندەتۋگە تارتۋ، سونداي-اق ولاردىڭ ونەگەلى ءومىر جو­لىن كەيىنگى ۇرپاققا ۇلگى رەتىندە ۇسى­نۋ. سونىمەن قاتار حالقىمىزدى بىر­لىككە ۇندەيتىن «اسارلاتىپ ءۇي سالۋ جوبا­سىن» قولعا العان بولاتىنبىز. ەجەل­دەن كەلە جاتقان يگى ءداستۇر – اسار ءادى­سىن قايتا جاڭعىرتقان بۇل باستاما اياسىن­دا كاسىپكەرلەر مەن قايىرىمدى جان­دار اتسالىسىپ، كوپتەگەن مۇقتاج وت­با­سىنا ءۇي سالىپ بەرۋدە. ءبىز بىرلى­گىمىز بەن ۇيىمشىلدىعىمىزدىڭ، تابان­دى­لىعىمىزدىڭ ارقاسىندا بارلىق قيىن­شىلىقتى ەڭسەرە الامىز»، دەدى وبلىس اكىمى. بۇدان كەيىن بەردىبەك ساپارباەۆ وبلىستىق ىسكەر ايەلدەر قاۋىمداستىعى قوعامدىق بىرلەستىگىنىڭ ءتورايىمى مە­رۋەرت لەشتاەۆانى «جىلدىڭ ۇزدىك ۇيى­­مى» اتا­لىمىمەن ماراپاتتادى. اتال­عان قوعامدىق بىرلەستىك تاراپىنان بايزاق اۋدا­نىن­داعى جارىلىستان زارداپ شەككەن تۇر­عىندارعا كومەك كورسەتۋ ءۇشىن 500 مىڭ تەڭگەدەن استام قاراجات جيناپ، وعان قاينار اۋىلىنداعى 19 وتباسىنا ازىق-ت ۇلىك ساتىپ اپەرگەن. ال بالالاردى قور­عاۋ مەرەكەسىنە قالانىڭ قوعامدىق بىرلەس­تىكتەرىنەن 110 بالاعا جالپى كولەمى 1،2 ميل­ليون تەڭگەگە سىيلىق الىپ بەرگەن. ونىڭ ىشىندە مۇمكىندىگى شەكتەۋلى بالا­لار مەن ولاردى تاربيەلەپ وتىرعان اتا-انالار دا قامتىلعان.

سونىمەن قاتار «تۋعان ولكە» اتالى­مى ەركىنبەك كۋاتبەكوۆكە تاپسى­رىلدى. ول تالاس اۋدانى مايتوبە اۋى­لىنا جالپى قۇنى 18 ميلليون تەڭگە بو­لاتىن كىشى فۋتبول الاڭىن جانە 1،2 ميلليون تەڭگەگە Street workout سا­­لىپ بەرگەن. ال «جىلدىڭ ۇزدىك قام­­قورشى­سى» اتالىمىن وسى جىلى م.مامە­توۆا اتىنداعى №13 جالپى ورتا ءبىلىم بەرەتىن مەك­تەپكە قۇنى 12 ميلليون تەڭ­گەنى قۇرايتىن STEM لابوراتوريا­سىن سىيعا تارتقان ءابۋتالىپ ءمۇتالى يەلەنسە، «جىل تۇلعاسى» اتالىمىمەن عاليا ابىتاەۆا ماراپاتتالدى. ول بيىل 30 جىلعا جۋىق باسپاناسىز جۇرگەن، ءتورت ۇلىنان ايىرىلعان قوس قارياعا جانە ونىڭ ەكى جەتىم نە­مە­رەسىنە ءۇي الىپ بەرۋ ماقساتىندا قايى­رىمدىلىق اك­تسياسىن ۇيىمداستىرىپ، اتال­عان تۇر­عىنداردىڭ باسپانالى بولۋىنا ات­سا­لىسقان. سونداي-اق كوروناۆيرۋس ىندە­تىنە بايلانىستى كارانتين تالاپتارى مەن تارتىپتەرىن ورىن­داۋعا شاقىرعان جانە كوپشىلىكتىڭ ۆاكتسينا سالۋى ءۇشىن ەل ىشىندە ناسي­حات، ۇگىت جۇمىستارىن جۇرگىزگەن. مەدي­تسي­نالىق جانە شارۋاشىلىق زاتتار الۋ ءۇشىن تۇرعىندارعا ۇندەۋ تاستاپ، 60 ميلليون تەڭگەدەن استام قارجى جيناۋعا ىقپال ەتكەن. ءسويتىپ شۋ اۋدانىنداعى ەمحانا جانە اۋرۋحانالاردى جابدىقتاۋعا مول ۇلەسىن قوسقان. ال «جىل مەتسەنا­تى» اتا­­لىمىن تالعات تۇرعىمباەۆ يەلەن­دى. ول جۋالى اۋداندىق ورتالىق اۋرۋحا­ناسىنا جالپى قۇنى 109 ميلليون تەڭگەگە قاجەتتى قۇرال-جابدىقتار ساتىپ الىپ بەرگەن. ونىڭ ىشىندە زاماناۋي قۇرال-جاب­دىقتارمەن تولىقتاي جابدىقتالعان رەاني­موبيل، 30 وتتەگى باللونى، 3000 دانا جەكە قورعانىش كيىمدەرى، مەدي­تسي-­
نالىق قىزمەتكەرلەر جۇمىس بارىسىندا كۇندەلىكتى پايدالاناتىن 5000 دانا «كن-95» ماركالى رەسپيراتور، 5000 دانا ءبىر رەت جانە كوپ رەت قولدانىلاتىن ار­نايى قورعانىس كوستيۋمدەرى، ءبىر رەت قولدا­نىلاتىن مەديتسينالىق قولعاپتار سياق­تى قورعانىش قۇرالدارىن جانە 10 دانا وت­تەگى كونتسەنتراتورلارىن الىپ بەر­گەن. جومارت جاندارعا بۇل اتالىمدار­دى وبلىستىق ءماسليحاتتىڭ حاتشىسى ماح­مەتعالي سارىبەكوۆ، وبلىستىق ارداگەر­لەر كەڭەسىنىڭ توراعاسى ەركىنبەك سول­تىباەۆ، وبلىستىق كاسىپوداقتار بىرلەس­تىگىنىڭ توراعاسى باعلان قاراشولاقوۆ، م.ح.دۋلاتي اتىنداعى تاراز وڭىرلىك ۋني­­ۆەرسيتەتىنىڭ رەكتورى تالعات ەشەن­قۇلوۆ تاپسىردى. جەڭىمپازدارعا ارنايى ديپلوم­دارمەن قاتار، قارجىلاي سىيلىقتار دا تابىس ەتىلدى.

 

جامبىل وبلىسى

 

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار