الەم • 20 قىركۇيەك، 2021

فرانتسيا: ۆاكتسينا الماعاندار جۇمىسسىز قالدى

14 رەت كورسەتىلدى

فرانتسيادا COVID-19-عا قارسى ۆاكتسينا سالدىرماعان 3 مىڭعا جۋىق مەديتسينا قىزمەتكەرى جۇمىستان شەتتەتىلدى.

سارسەنبىدە كۇشىنە ەنگەن جاڭا ەرەجە بويىنشا ەلدەگى 2،7 ميلليونعا جۋىق دەنساۋلىق ساقتاۋ قىزمەتكەرى، قارتتار ۇيلەرىنىڭ قىزمەتشىلەرى جانە ءورت ءسوندىرۋ قىزمەتىندەگىلەر كوروناۆيرۋسقا قارسى ۆاكتسينا الۋعا مىندەتتەلىپ وتىر. فرانتسيانىڭ دەنساۋلىق ساقتاۋ ءمينيسترى وليۆە ۆەراننىڭ ايتۋىنشا، جۇمىستان شەتتەتۋ – ۋاقىتشا شارا. ول قازىر كوبىرەك ماماننىڭ ەكپە الۋعا كەلىسىم بەرىپ جاتقانىن ايتتى.

بۇل ەرەجە دارىگەرلەرگە، مەدبيكەلەرگە، كەڭسە قىزمەتكەرلەرىنە جانە ەرىكتىلەرگە قولدانىلادى. پرەزيدەنت ەممانۋەل ماكرون بۇرىنعى ەرەجەنىڭ وزگەرەتىنىن العاش رەت 12 شىلدەدە حابارلاپ، قىزمەتكەرلەر 15 قىركۇيەككە دەيىن كەم دەگەندە ۆاكتسينانىڭ ءبىر كومپونەنتىن الۋى كەرەك دەپ ەسكەرتكەن. ەكپە سالدىرماعاندار جۇمىستان شەتتەتىلەتىنى سول كەزدە بەلگىلى بولعان.

پرەزيدەنتتىڭ بۇل مالىمدەمەسىنەن كەيىن ۆاكتسينا الۋ ءۇشىن ءوتىنىم بىلدىرەتىن Doctolib سايتىنىڭ جۇمىسىنا جۇكتەمە كوبەيگەن. ويتكەنى ءتيىستى قىزمەتكەرلەردىڭ كوپشىلىگى بىردەن ەكپەگە جازىلا باستاعان. الايدا مەملەكەتتىڭ تالابى كۇشىنە ەنگەنىنە قاراماستان، ءالى دە ۆاكتسينا الۋدان باس تارتىپ وتىرعان مىڭداعان ادام بار. ەندى ولاردىڭ بارلىعى جۇمىسقا جىبەرىلمەسە، مەديتسينا قىزمەتىنىڭ ساپاسى نە بولادى دەگەن ماسەلە تۋىنداپ تۇر.

فرانتسيانىڭ وڭتۇستىگىندەگى نيتستساداعى ءبىر اۋرۋحانانىڭ وزىندە 450-گە جۋىق قىزمەتكەر جۇمىستان شەتتەتىلگەن. ولار عيمارات سىرتىندا شەرۋگە شىعىپ، نارازىلىعىن بىلدىرگەن. وڭتۇستىكتەگى تاعى ءبىر قالا – مونتەليماردا اۋرۋحانادا ۆاكتسينالانعان انەستەزيولوگتاردىڭ جەتىسپەۋىنەن شۇعىل ەمەس وپەراتسيالار توقتاتىلا باستاعانىن AFP اگەنتتىگى حابارلاعان.

جالپى، ۆاكتسينا پايدا بولعاننان بەرى، الەمدە ەكپەگە كۇمانمەن قاراعان ەلدەردىڭ قاتارىندا وسى فرانتسيا بولعان. Ipsos ساۋالداماسىنا سايكەس، ەلدەگى ۆاكتسينا الۋعا قۇقىلى حالىقتىڭ تەك 40 پايىزى عانا ەكپە سالدىرۋدى جوسپارلاپ وتىرعانىن ايتقان. ودان بولەك، BBC Monitoring جۇرگىزگەن زەرتتەۋ كورسەتكەندەي، فرانتسۋز تىلىندە ۆاكتسيناعا قارسى حابار تاراتاتىن پاراقشالارعا جازىلۋشىلار سانى 2020 جىلعى 3،2 ميلليوننان 4،1 ميلليونعا دەيىن وسكەن. دەگەنمەن شىلدەدە ەۋروپادا ارنايى «دەنساۋلىق پاسپورتى» ەنگىزىلىپ، ۆاكتسينا الۋدى مىندەتتەي باستاعاندا فرانتسيا الەمدەگى ەڭ ۆاكتسينالانعان ەلدەردىڭ بىرىنە اينالدى. ەرەسەكتەردىڭ 90 پايىزى ەكپەنىڭ كەم دەگەندە ءبىر كومپونەنتىن العانى حابارلانعان. فرانتسيا سونىمەن قاتار 12 جاستان اسقان بالالاردى دا ۆاكتسينالاۋدى ەنگىزىپ، ەگدە جاستاعى جانە وسال توپقا جاتاتىن ازاماتتارعا ءۇشىنشى دوزانى سالدىرا باستادى.

ۇكىمەت تاراتقان سوڭعى مالىمەت ءبىرشاما نارازىلىق تۋدىرسا دا، بۇل شەشىمنىڭ ناتيجە بەرگەنىن كورسەتەدى. 14 قىركۇيەككە دەيىن مەملەكەتتىك اۋرۋحانالار مەن قارتتار ۇيلەرى قىزمەتكەرلەرىنىڭ 89 پايىزى جانە جەكە مەديتسينالىق قىزمەتكەرلەردىڭ 95 پايىزى ۆاكتسينا سالدىرىپ ۇلگەرگەن.

فرانتسيا – ەۋروپادا ۆاكتسينالاۋدى مىندەتتەپ وتىرعان جالعىز ەل ەمەس. يتاليا دا 15 قازاننان باستاپ بارلىق قىزمەتكەردەن COVID-19-عا قارسى ۆاكتسينا العاندارىن دالەلدەۋدى سۇراپ وتىر. نەمەسە قىزمەتكەرلەر ىندەت جۇقتىرماعانىن كورسەتەتىن تالداۋدىڭ ناتيجەسىن ۇسىنىپ وتىرۋى كەرەك.

ال گرەكيادا ۆاكتسينا سالدىرماعان مەملەكەتتىك جانە جەكە سەكتور قىزمەتكەرلەرى ءوز ەسەبىنەن اپتاسىنا ءبىر نەمەسە ەكى رەت COVID-19-دى انىقتايتىن ساراپتامادان ءوتىپ وتىرۋى كەرەك. بۇل ەرەجە 13 قىركۇيەكتە كۇشىنە ەندى.

وتكەن اپتادا اقش فەدەرالدىق قىزمەتكەرلەر مەن مەردىگەرلەر ءۇشىن، سونداي-اق 100-دەن استام قىزمەتكەرى بار بارلىق كاسىپورىن ءۇشىن ۆاكتسينالاۋدى مىندەتتى ەتتى. ول بويىنشا شامامەن 100 ميلليونعا جۋىق جۇمىسشى ەكپە سالدىرۋى شارت. وزگە ەلدەردەگىدەي ۆاكتسينا سالماعان قىزمەتكەرلەر اپتا سايىن مەديتسينالىق ساراپتامادان ءوتىپ وتىرادى. اقش پرەزيدەنتى دجو بايدەن بۇل – بوستاندىق نەمەسە جەكە تاڭداۋ ماسەلەسى تۋرالى ەمەس، ءوزىن جانە اينالاسىنداعىلاردى قورعاۋعا باعىتتالعان شەشىم ەكەنىن قاداي ايتتى.

فرانتسيا بيلىگى ەلدە ىندەت جۇقتىرعان ادامداردىڭ سانى ازايا باستاۋىنا بايلانىستى كەيبىر قاۋىپسىزدىك شارالارىن جەڭىل­دە­تۋدى قاراستىراتىندىعىن ايتقان بولاتىن. ەل پرەزيدەنتى دەن­ساۋ­لىق ساقتاۋ كەڭەسىمەن 22 قىركۇيەكتە، سارسەنبىدە كەزدەسۋى كەرەك. تال­قى­لاۋ بارىسىندا ۆيرۋس ەڭ از تاراعان ەلدى مەكەندەردەگى ەرە­جە­لەر­دى جەڭىلدەتۋ مۇمكىندىگى قاراستىرىلۋى مۇمكىن.

سوڭعى جاڭالىقتار

6 ءوڭىر «جاسىل» ايماقتا تۇر

كوروناۆيرۋس • بۇگىن، 09:20

ۇقساس جاڭالىقتار