تۇرعىن ءۇي قۇرىلىسى توقتامايدى

قابىلدانعان شارالاردىڭ ناتيجەسىندە سوڭعى 18 جىلدا ءبىر تۇرعىنعا شاققاندا تۇرعىن ۇيمەن قامتاماسىز ەتۋ كورسەتكىشى 34 پايىزعا ءوسىپ، 21،9 شارشى مەترگە جەتتى. «نۇرلى جەر» مەملەكەتتىك تۇرعىن ءۇي قۇرىلىسى باعدارلاماسىن جۇزەگە اسىرۋ باستالعالى بەرى، ياعني 2017-2020 جىلدارى 52 ملن شارشى مەتر تۇرعىن ءۇي سالىندى. بۇل دەگەنىمىز – 470 مىڭ تۇرعىن ءۇي. بيىل 17 ملن شارشى مەتر تۇرعىن ءۇي سالۋ جوسپارلانۋدا. ياعني 163،1 مىڭ تۇرعىن ءۇي سالىنباق.

بۇگىنگە دەيىن تۇرعىن ءۇي قۇرى­­لىسىنا 3،6 ترلن تەڭگەدەن استام ينۆەستيتسيا تارتىلدى. ونىڭ 864 ملرد تەڭگەسى – مەم­لەكەتتىك ينۆەستيتسيا. مەم­لە­كەت­تىڭ 1 تەڭگەسىنە جەكە ينۆەس­تور­لاردان 6 تەڭگە تارتىلدى.

حالىقتى جايلى ومىرمەن قام­تاماسىز ەتۋ ماقساتىندا سۋمەن جابدىقتاۋ جانە سۋ بۇرۋ جۇيەلەرىن دامىتۋ، تۇرعىن ءۇي-كوممۋنالدىق شارۋاشىلىق سەك­تورىن جانە تۇرعىن ءۇي قو­رىن جاڭعىرتۋ بويىنشا 132،9 ملرد تەڭگەگە 572 جوبا ىسكە اسىرىلدى. ناتيجەسىندە، 8 مىڭنان اسا جۇمىس ورنى قۇ­رىلدى. ۇكىمەتتىڭ ماقساتى – 2030 جىلعا قاراي دامىعان ەل­­­دەر­دىڭ دەڭگەيىنە جەتۋ جانە تۇر­­­عىن ءۇيدى ىسكە قوسۋ كولەمىن تو­­مەندەتپەۋ.

جىل سايىنعى ءوسۋ دينا­ميكا­سىن 8-10 پايىز شەگىندە ساق­­تاۋ كوزدەلىپ وتىر. بۇل ءۇشىن جاپ­پاي تۇرعىن ءۇي قۇرىلىسى سا­لىناتىن اۋدانداردى ين­جە­­نەر­لىك كوممۋنيكاتسيالارمەن قامتۋ، سونداي-اق حالىققا جانە قۇرىلىس سالۋشىلارعا جەڭىلدەتىلگەن نەسيەلەر بەرۋ جوسپارلانعان. ماقسات – حالىق پەن بيزنەستى تۇرعىن ءۇي قۇرى­لى­سىمەن اينالىسۋعا ىنتالاندىرۋ. بۇل جەكە ينۆەستيتسيالاردى تارتۋعا مۇمكىندىك بەرەدى.

مەملەكەتتىك قولداۋدىڭ نە­گىز­­گى شارالارى حالىقتىڭ كوپ بو­لىگىنە قولجەتىمدى تۇرعىن ءۇي سالۋعا باعىتتالعان. نەگىزىنەن تۇراقتى تابىسى جوق حالىقتىڭ الەۋمەتتىك وسال ساناتتارىن ساتىپ الۋ قۇقىعىنسىز كوم­مۋنال­دىق جالعا بەرىلەتىن تۇرعىن ۇيمەن قامتۋ كوزدەلگەن. بۇل سا­­ناتقا مۇگەدەكتەر، جەتىم با­لا­­لار، كوپبالالى وتباسىلار، سونداي-اق ءىرى مەگاپوليستەردە جۇمىس ىستەيتىن جاستار جاتادى. حالىقتىڭ وزگە توپتارى ءۇشىن يپوتەكالىق ونىمدەر، تۇر­عىن ءۇي قۇرىلىس جيناقتارى جانە ۇلەستىك قۇرىلىس تەتىكتەرى قا­راس­تىرىلعان.

2018 جىلى رەسپۋبليكادا كوپشىلىككە قولجەتىمدى «7-20-25» يپوتەكالىق باعدارلاماسى ىسكە قوسىلدى. باعدارلاما يپو­تە­كالىق نەسيەلەۋدى دامى­تۋ­دىڭ كاتاليزاتورىنا اينالدى.

ساپالى كوممۋنالدىق قىز­مەتتەردى، ءتيىمدى باسقارۋ جۇيە­سىن ۇسىنۋ، ازاماتتاردىڭ تۇرعىن ءۇي جاعدايلارىن جاقسارتۋ، ەنەر­گيا تۇرعىسىنان ءتيىمدى جانە رەسۋرس ۇنەمدەيتىن تەحنولو­گيا­لاردى قولدانۋ ماڭىزدى بو­لىپ قالا بەرمەك. زاماناۋي تەح­نولوگيالاردىڭ كومەگىمەن سا­لىنىپ جاتقان تۇرعىن ءۇيدىڭ سا­پاسىنا قويىلاتىن تالاپتار جانە ولاردى زياتكەرلىك باسقارۋ جۇيەلەرىمەن جاراقتاندىرۋعا ايرىقشا ءمان بەرىلۋدە.