تاۋەلسىزدىكتىڭ 30 جىلدىعى • 05 تامىز، 2021

«وردالى وتىز ءىس»

130 رەت كورسەتىلدى

وڭىرلىك كوممۋنيكاتسيالار قىزمەتى الاڭىندا وتكەن بريفينگتە ىشكى سايا­سات باسقارماسىنىڭ باسشىسى ەرلان قۇسايىن قاراعاندى وبلىسىندا تاۋەلسىزدىكتىڭ 30 جىلدىق تورقالى تويىنا ارنالعان ءىس-شارالار مەن باسقا دا ماڭىزدى شارۋالاردى ۇيىمداستىرۋدىڭ جاي-جاپسارى تۋراسىندا ەگجەي-تەگجەيلى ايتىپ بەردى.

– وسى جىلدىڭ ەڭ باستى وقيعاسى – ەل تاۋەلسىزدىگىنىڭ وتىز جىلدىعى. مەرەيتويدى ەڭ الدى­مەن ازامات­تارىمىزدىڭ ءال-اۋقا­تىن جاق­سارتۋعا باعىتتالعان يگى ىستەر­مەن اتاپ ءوتۋدى باستى ماقسات رەتىندە قاراستىرىپ وتىرمىز، – دەگەن سپيكەر بۇل باعىتتا مەرەكەلىك سيپاتتاعى قانداي دا ءبىر سالتاناتتى ءىس-شارالاردىڭ جوسپارلانبايتىنىن اتاپ ءوتتى.

مىسالى، وبلىستا تاۋەلسىزدىكتىڭ 30 جىلدىعىنا ارنالعان وڭىرلىك جوسپارعا 187 ءىس-شارا ەنگىزىلگەن ەكەن. ونىڭ ىشىندە بەس حالىقارالىق، التى رەسپۋبليكالىق، 13 وبلىستىق جانە 163 قالالىق جانە اۋداندىق ءىس-شارالار بار. بۇدان بولەك، «وردالى وتىز ءىس» ارنايى جوباسىنىڭ دا ازىرلەنگەنىن ايتا كەتكەن ءلازىم.

وسى ورايدا سپيكەر تاۋەلسىزدىك مەرەيتويىن وبلىستىڭ لايىقتى تارتۋلارمەن قارسى الاتىنىن اتاپ ءوتتى. ءوڭىر كارتاسىندا Yutong اۆتوبۋستار مەن ارنايى تەحنيكالار شىعاراتىن «ساران» يندۋستريالىق ايماعىنىڭ پايدا بولعانىنا توقتالدى. سونداي-اق، ول مۇندا جىلىنا جەڭىل جانە جۇك كولىكتەرىنە ارنالعان 3،5 ملن دانا شينا وندىرەتىن زاۋىت قۇرىلىسىنىڭ باستالعانىن دا ايتىپ ءوتتى.

سونىمەن قاتار تاۋەلسىزدىك جىلدارى وبلىستا Qaz Carbon سىندى اسا ءىرى كومىر بايىتۋ كومپانياسى­نىڭ اشىلعانىن، ساران قالاسىن­داعى قۋاتى 100 مۆت بولاتىن كۇن ەلەكتر ستانساسىنىڭ ەل يگىلىگى ءۇشىن جۇمىس ىستەي باستاعانىن دا وبلىس ەكونوميكاسىنداعى وڭ وزگەرىستەردىڭ مىسالى رەتىندە اتاي كەتتى.

مەرەكەلى جىلدا قايىرىمدىلىق ءىس-شارالارىنا ايرىقشا كوڭىل بولىنبەكشى. ونىڭ ىشىندە رەسپۋب­ليكالىق دەڭگەيدەگى «قايىرىمدى ىستەر مارافونى» جالپىۇلتتىق جوباسىن ايتۋعا بولادى. اكتسيا اياسىندا جىل باسىنان بەرى وبلىس­تا 21233 ادام قاتىسقان 2642 ءىس-شارا وتكىزىلىپتى. قارتتارعا، جالعىز باستى انالارعا، كوپبالالى، از قامتىلعان وتباسىلارعا ازىق-ت ۇلىك سەبەتتەرى بەرىلىپ، باسقا دا كومەك كورسەتىلگەن.

– سونىمەن قاتار كوپتەگەن كاسىپ­كەر­لەر، شارۋا قوجالىقتارى، ۇكىمەت­تىك ەمەس ۇيىمدار مەديتسي­نالىق مەكە­مەلەردى قاجەتتى قۇرال-جاب­دىق­تارمەن جانە ءدارى-دارمەكتەرمەن قام­تاماسىز ەتۋ بويىنشا ۇلكەن جۇمىس اتقاردى. بۇل ىسكە وبلىس تۇرعىندارى، ەرىكتىلەر دە ءوز ۇلەستەرىن قوستى، – دەپ اتاپ ءوتتى ە.قۇسايىن.

قازىرگى ۋاقىتتا وبلىستا ەرىك­تىلەر ۇيىمىنىڭ وتە بەلسەندى جۇ­مىس ىس­تەپ جۇرگەندىگى اتاپ ءوتىلدى. مىسالى، وڭىردە ارەكەت ەتەتىن 97 ۆولونتەرلىك ۇيىم مەن توپقا جەتى مىڭعا جۋىق جاس مۇشە ەكەن. بۇل جەردە بيزنەس-قوعامداستىقتىڭ جەكە ۆولونتەرلىك باستامالاردى قولداپ وتىراتى­نىن باسا ايتا كەتكەن ءجون. مىسالى، «قايىرىمدى ۇرپاق» قايىرىمدىلىق اكتسياسى اياسىندا 137 بالا جالپى سوماسى بەس ميلليون تەڭگەدەن استام كومەك العان.

وسى ورايدا «ەل تىرەگى – ەلباسى» يگى ىستەر اكتسياسى بويىنشا ىسكە اسقان شارۋالاردى دا ەرەكشە اتاۋعا بولادى. اتالعان ءىس-شاراعا وبلىستىڭ 1500-دەن استام ەرىكتىسى قاتىسىپ، بيىلعى جىلدىڭ ءبىرىنشى جارتىسىنىڭ وزىندە الەۋمەتتىك جاعىنان از قامتىلعان وتباسىلارعا 23 توننا ازىق-ت ۇلىك، سونداي-اق 769 بىرلىك جەكە قورعانىش قۇرال­دارى تاراتىلىپتى. مۇنىڭ ءوزى پاندەميا كەزىندە قينالىپ قالعان تۇرعىنداردىڭ ەڭسە تىكتەۋىنە كادىمگى­دەي يگى اسەرىن تيگىزگەن.

سونىمەن قاتار اتالعان بري­فينگتە وبلىستاعى ەكولوگيا ماسە­لەسى تۋرالى دا از-كەم اڭگىمە بولدى. ىشكى ساياسات باسشىسى ەكولوگيالىق احۋالدىڭ بۇرىنعىدان دا وزەكتىرەك بولا تۇسكەنىن اتاپ ءوتتى.

– قازىرگى ۋاقىتتا «تازا تابيعات» ۇلتتىق جوباسى ىسكە اسىرىلۋدا. وبلىستا وزەندەر مەن سۋ قويمالارىن تازارتۋ، اعاش وتىرعىزۋ بويىنشا ۇلكەن جۇمىستار اتقارىلدى. جىل باسىنان بەرى وڭىردە وسىنداي بەس مىڭ­نان استام ءىس-شارا وتكىزىلدى. بۇل جۇمىس ودان ءارى جالعاساتىن بولادى، – دەدى ول.

بريفينگتە ەرلان قۇسايىن ال­داعى قاراشا ايىندا قاسىم امان­جولوۆتىڭ مەرەيتويىنا وراي «قاسىم» ءۇيىنىڭ اشىلاتىندىعى تۋرالى قۋانىشتى حاباردى جەتكىزدى. «بۇل – زيالى قاۋىم ءۇشىن، جالپى، بارشا قاراعاندىلىقتار ءۇشىن ەرەكشە تارتۋ بولماق»، دەپ اتاپ ءوتتى وبلىستىڭ ىشكى ساياساتىنا جاۋاپتى مامان. 

جالپى، وبلىستا داۋىلپاز اقىن­نىڭ 110 جىلدىق مەرەيتويىنا ارنالعان ءىس-شارالار جوسپارلى تۇردە وتكىزىلۋدە. مىسالى، وسىدان ءبىراز بۇرىن «قاسىم الەمى: پوەزيا، تۇلعا، تاريح» تاقىرىبىندا ونلاين-سەمينار ۇيىمداستىرىلعان. ال ە.بوكەتوۆ اتىنداعى قاراعاندى ۋنيۆەرسيتەتىندە «قاسىمتانۋدىڭ قازىرگى ماسەلەلەرى» تاقىرىبىندا  حالىقارالىق دوڭگەلەك ۇستەل ءوتتى.

سونىمەن بىرگە وبلىستا الاش قايراتكەرلەرى – ءاليحان بوكەيحاننىڭ 155، جاقىپ اقباەۆتىڭ 145، ءالىمحان ەرمەكوۆتىڭ 130 جىلدىق مەرەيتويلارى دا ۇمىت قالماي، ءتۇرلى دەڭگەيدەگى باسقوسۋ، دوڭگەلەك ۇستەل جانە كونفەرەنتسيالار نەگىزىندە اتالىپ وتكەنىن ايتا كەتكەن ءجون.

سونىمەن قاتار سپيكەر بيىل ءاليحان بوكەيحان ەسىمىن كەنشىلەر استاناسىنداعى وكتيابر اۋدانىنا بەرۋ جۇمىستارىنىڭ قولعا الىنعانىن ءمالىم ەتتى. بۇل ماڭىز­دى ءىس-شارا ەلدەگى ۇلتتىق ساناق جۇ­مىسى اياقتالعان سوڭ، ەل تاۋەل­سىز­­دىگىنىڭ 30 جىلدىق مەرەكەسى قار­سا­ڭىندا تولىق اياقتالادى دەدى ول.

سونداي-اق ەرلان قۇسايىن بريفينگ بارىسىندا بيىلعى جىلدىڭ باستى وقيعاسى – ۇلىتاۋ وڭىرى­ن­دە «جوشى حان» تاريحي-مادە­ني كەشەنىنىڭ اشىلاتىنىن ءمالىم ەتىپ، بۇل ايتۋلى وقيعانىڭ ۇلتتىق قۇن­دىلىقتاردى ناسيحاتتاۋ جولىنداعى ماڭىزىن ەرەكشە اتاپ ءوتتى.

 

قاراعاندى وبلىسى

 

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:16

ۇقساس جاڭالىقتار