كوروناۆيرۋس • 19 شىلدە، 2021

كارانتين تالاپتارى قاتاڭداتىلدى

وڭىردە كەزەكتى №16 قاۋلى جاريالاندى. بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى باتىربەك اليەۆ ءمالىم ەتتى. شەكتەۋلەردىڭ كۇشەيتىلۋىنە ىندەت جۇقتىرىپ، سىرقاتتانعانداردىڭ كوبەيۋى جانە ەلدەگى ەپيدەميالىق احۋالدىڭ ناشارلاۋى سەبەپ بولعان.

فاريدا بىقاي

شىلدە ايىنىڭ 4-ىنەن باستاپ «قىزىل ايماقتا» تۇرعان وڭىرىمىزدە كارانتين قايتا كۇشەيتىلدى. سارالاي كەلگەندە، وبلىس ورتالىعى، اقسۋ، ەكىباستۇز قالالارى، اقتوعاي، ۋسپەن، باياناۋىل، شارباقتى اۋداندارى «قىزىل ايماقتا»، ال «سارى ايماقتا» پاۆلودار، ەرتىس، جەلەزين، تەرەڭكول اۋداندارى بولسا، اققۋلى مەن ماي اۋداندارى «جاسىلدا» تۇر.

سونىمەن جاڭا №16 قاۋلىعا سايكەس 15 شىلدەدەن باستاپ Ashyq جوباسىنا قاتىساتىن نىسانداردان باسقا، وبلىسارالىق، وبلىسىشىلىك، قالاارالىق، اۋدانارالىق اۆتوبۋس، شاعىن اۆتوبۋس جولاۋشىلار تاسىمالى توقتاتىلدى. سونداي-اق بالالار ويىن-ساۋىق ورتالىقتارىنىڭ (ويىن الاڭدارى، جابىق ءۇي-جايلارداعى اتتراكتسيوندار)، تەاتر، كينوتەاترلاردىڭ، كونتسەرت زالدارىنىڭ جۇمىسىنا، سپورتتىق ءىس-شارالار وتكىزۋگە تىيىم سالىندى. دەمالىس كۇندەرى ساۋدا ۇيلەرى، قالالىق اۆتوبۋستاردىڭ قوزعالىسى شەكتەلدى. جۇمىس كۇندەرى Ashyq جوباسىنا قاتىساتىن قوعامدىق تاماقتانۋ ورىندارى مەن فۋدكورتتاردىڭ قىزمەتى ساعات 20.00-گە دەيىن، قاتىسپايتىنداردىڭ جۇمىسى 18.00-گە دەيىن شەكتەلەدى.

ال وڭىردە ەكپە الۋشىلار قاتارى كۇندەلىكتى ارتىپ كەلەدى. ۆاكتسينانىڭ ءبىرىنشى كومپونەنتىن وبلىستىڭ 179 931 تۇرعىنى السا، ەكىنشىسىن 94 403 تۇرعىنى العان. ۆاكتسينانى مەديتسينا ماماندارى، مۇعالىمدەر، قۇقىق قورعاۋ ورگاندارىنىڭ قىزمەتكەرلەرى الۋدا.

وبلىس ورتالىعىندا، اقسۋ قالاسىندا ەكپە العان تۇرعىندار اراسىندا ۇتىسقا سمارتفوندار مەن تۇرمىستىق تەحنيكالار ويناتىلۋدا. دەمەۋشىلەر ەسەبىنەن قالالىقتار ءۇشىن IPhone 12 رrو، سونداي-اق ارقايسىسى 50 مىڭ بولاتىن 20 سەرتيفيكات بەرىلمەك. ۇتىس ويىنى ون كۇن سايىن ونلاين رەجىمدە وتكىزىلەدى. ەندى IPhone 12-ءنى كىم الاتىنى 20 شىلدەدە بەلگىلى بولادى.

سونىمەن قاتار اقتوعاي، قوجامجار، جولبولدى، جالاۋىل، مۇتكەنوۆ اۋىلدارىندا ۆاكتسينانىڭ ءبىرىنشى كومپونەنتىن الۋشىلارعا باعالى سىيلىقتار دايىن. مىسالى، ماي اۋدانىندا ەكپە الۋدان وتكەن وتباسىلار «ماي سەرۆيس» كمك-نىڭ سۋمەن جابدىقتاۋ قىزمەتى ءۇشىن ايلىق تولەمنەن بوساتىلادى.

– جالپى، وبلىس ورتالىعىندا ەڭبەك ۇجىمدارىنا ارنالعان 67 ءموبيلدى توپ جۇمىس ىستەيدى. ءوڭىر بويىنشا 153 ەكپە كابينەتى بار. ساۋدا ورتالىقتارىندا 5 ەكپە كابينەتى، 3 جىلجىمالى مەديتسينالىق كەشەندەردە ەكپە جاسالادى، – دەيدى دەنساۋلىق ساقتاۋ باسقارماسىنىڭ ءبولىم باسشىسى ەرعالى اسىلبەك.

ەلىمىزدە كۇزگە دەيىن ۇجىمدىق يممۋنيتەتتى قالىپتاستىرۋ مىندەتى تۇر. ىندەتتىڭ ءتۇرلى شتامدارىنا قارسى تۇرۋ ءۇشىن ەكپە الىپ، تۇرعىندار ءوز دەنساۋلىعىن ساقتاۋى قاجەت.

بۇگىنگى كۇندەرى وبلىستىق توتەنشە جاعدايلار دەپارتامەنتىنىڭ قىزمەتكەرلەرى تۇگەلدەي ەكپە قابىلداۋدا. دەپارتامەنتتىڭ ءباسپاسوز قىزمەتىنىڭ مالىمەتىنشە، قىزمەتكەرلەردىڭ سانيتارلىق-ەپيدەميالىق سالاماتتىلىعىن قامتاماسىز ەتۋ ءۇشىن جۇزەگە اسىرىلاتىن ينفەكتسيالىق اۋرۋلاردىڭ يممۋنوپروفيلاكتيكالىق ءىس-شارالارى جۇرگىزىلۋدە.

پاۆلودار وبلىسى