الەم • 12 شىلدە، 2021

جاھاندىق سالىق جولعا قويىلدى

11 رەت كورسەتىلدى

G20 ەلدەرى جاھاندىق بەلسەندى كومپانيالار ءۇشىن ەڭ تومەنگى سالىقتى – 15 پايىز مولشەرىندە ەنگىزۋگە كەلىستى.

«ۇلكەن جيىرمالىق» ەلدەرىنىڭ قارجى مي­نيستر­­لەرى تاريحي سالىق رەفورماسىنا ۆەنەتسياداعى كەزدەسۋدە كەلىستى. بۇل شەشىم Amazon، Facebook سەكىلدى ءىرى كومپانيالاردىڭ قىزمەتىنە تىكەلەي اسەر ەتپەك. كەلىسىم ءبىر اي بۇرىن كورنۋوللداعى G7 ەلدەرىنىڭ باسشىلارى قول قويعان جوسپاردى ودان ءارى پىسىقتاي ءتۇستى. ەڭ ءىرى ءارى قارقىندى دامىپ كەلە جاتقان ەكونوميكاعا يە 19 ەل مەن ەۋروپالىق وداق اتىنان G20 قارجى مينيسترلەرى ۆەنەتسياداعى ەكى كۇندىك كەزدەسۋدەن كەيىن «جاھاندىق سالىق» ۇسىنىسىن قولدايتىنىن جاريالادى.

ەل ۇكىمەتتەرى كوپ ەلدە بىردەي جۇمىس ىستەيتىن جاھاندىق كومپانيالارعا سالىق سالۋ ماسەلەسىمەن ۇزاق ۋاقىت كۇرەسىپ كەلەدى. مۇنىڭ ماڭىزى Amazon جانە Facebook سياقتى ءىرى تەحنولوگيالىق كورپو­راتسيالاردىڭ كوبەيۋىنە وراي ارتا ءتۇستى. قازىرگى ۋاقىتتا بۇل كومپانيالار كورپوراتيۆتىك سالىق تومەن ەلدەردە جەرگىلىكتى فيليالدارىن اشىپ، سول جەردىڭ زاڭىنا سايكەس تومەن سالىق تولەپ كەلەدى. وسىلايشا ولار تابىستارى باسقا ەلدەردەن ءتۇسىپ جاتسا دا، سالىقتى وزدەرى تىركەلگەن ەلدىڭ تومەن مولشەرلەمەسىمەن وتەيدى. بۇل ەش زاڭعا قايشى كەلمەيدى.

جاڭا كەلىسىم ءىرى كومپانيالاردى ەندى سالىقتى كىرىسىن جاريالايتىن ەلدە عانا ەمەس، ءوز تاۋارلا­رىن نەمەسە قىزمەتتەرىن ۇسىناتىن وزگە ەلدەردە دە كوبىرەك سالىق تولەۋگە ىنتالاندىرۋدى كوز­دەيدى. سونداي-اق بارشاعا بىردەي تومەنگى سالىق مول­شەرلەمەسى وزگە ەلدەردىڭ سالىقتى تومەندەتىپ، ءبىر-بىرىنە باسەكە تۋعىزباۋىنا كومەكتەسەدى. دەسە دە، بۇل كەلىسىمدى ەلدەردىڭ بارلىعى بىردەي قولداپ وتىرعان جوق. ماسەلەن، يرلانديا وعان ءالى قوسىلماعان.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار