ايماقتار • 16 ماۋسىم، 2021

ءسۇت زاۋىتىنداعى سىناق

26 رەت كورسەتىلدى

سولتۇستىك قازاقستان وبلىسىنداعى «مولپرودۋكت» زاۋىتىندا ءسۇت ونىمدەرىنە تسيفرلى تاڭبالاۋ جۇيەسىن ەنگىزۋ جوباسى سىناقتان وتكىزىلدى. جوبانى وتاندىق QR Trace كومپانياسى اۋىل شارۋاشىلىعى مينيسترلىگىمەن جانە «قازاقتەلەكوم» كومپانياسىمەن بىرلەسىپ جۇزەگە اسىردى.

ەۋرازيالىق ەكونوميكالىق وداق اۋماعىندا تاۋارلاردى سايكەستەندىرۋ قۇرال­دارىمەن تاڭبالاۋ تۋرالى كەلىسىم­گە سايكەس، قازاقستان تاۋارلاردى قادا­عالاۋدىڭ ۇلتتىق جۇيەسىن ىسكە قوسقانى بەلگىلى. ءسويتىپ، ينتەگراتسيالىق پروتسەس­تەر شەڭبەرىندە تەرى بۇيىمدارى مەن تە­مەكى ونىمدەرىن مىندەتتى تاڭبالاۋدى ەن­گىزدى. سونىمەن قاتار بيىل رەسپۋبليكادا ءدارى-دارمەكتەردى، الكوگول، اياقكيىم مەن ءسۇت ونىمدەرىن تاڭبالاۋ بويىنشا قانات­قاق­تى جوبالار ىسكە قوسىلدى.

جالپى، وداققا مۇشە ەلدەر تاۋارلاردى تاڭبالاۋ مەن ونى قاداعالاۋ جۇيەسىن كەزەڭ-كەزەڭىمەن ەنگىزەدى جانە بۇل 2022 جىلدان باستاپ مىندەتتى شاراعا اينالادى. ياعني كورسەتىلگەن جانە قولدان جاسالاتىن ءونىم تۇرلەرىنىڭ QR-بەلگىسى بولماسا، مۇنداي ونىمدەر دايىنداۋشى ەلدەن تىس اۋماقتا ساتىلمايدى.

تاڭبالاۋدى ەنگىزۋ ءبىرىنشى كەزەكتە تۇتىنۋشىلاردىڭ قۇقىعى مەن مۇددەسىن قور­عاۋ ءۇشىن كەرەك. بۇل تاۋارلاردى ءون­دىرۋ جانە ونى تاسىمالداۋ تۋرالى مالى­مەتتەردىڭ اشىقتىعىن قامتاماسىز ەتەدى.

شتريح-كودتا تاۋاردىڭ وندىرىستەن دۇ­كەن سورەسىنە جەتكەنگە دەيىنگى بۇكىل تاريحى جازىلادى. ماسەلەن، وندىرىلگەن ورنى مەن كۇنى، جارامدىلىق مەرزىمى، ءونىمدى ساۋ­دا نۇكتەلەرىنە جىبەرۋ ۋاقىتى جانە تاعى باسقا دا دەرەكتەر قامتىلادى. تۇتىنۋشى بۇل اقپاراتتىڭ بارلىعىن سمارتفونىنىڭ كومەگىمەن QR-كود ارقىلى وقي الادى. QR-كودتار تەك تىركەلگەن كاسىپورىندارعا عانا بەرىلەدى. وسى­لايشا، جۇيە كونترافاكتىلىك تاۋار­­لاردى وندىرۋشىلەردىڭ ساۋدا-لوگيستيكا­لىق تىزبەگىنەن اۆتوماتتى تۇردە وشىرەدى.

سونىمەن قاتار تاۋارلاردى تاڭ­بالاۋ جانە قاداعالاۋ جۇيەسىن ەنگىزۋ­دىڭ بيزنەس ءۇشىن بىرقاتار ارتىق­شى­لىعى بار. ايتالىق، نارىققا جالعان ونىمدەر شىعاراتىن زاڭسىز تاۋار وندىرۋشىلەرمەن باسەكەلەستىك ما­سەلەسى شەشىلەدى، لوگيستيكاداعى شى­عىندار ازايادى، تاۋارلاردى ەسەپكە الۋ جەڭىل­دەتىلىپ، جەدەلدەتىلەدى. جاڭا­شىل­­دىقتىڭ ناتيجەسىندە كولەڭكەلى ەكو­نوميكانىڭ ۇلەسى قىسقارادى. ادال ەڭ­بەك ەتەتىن كاسىپكەرلەردىڭ تيىمدىلىگى ارتادى ءارى بيۋدجەت كىرىسى ۇلعايادى. سونداي-اق سا­لىق تۇسىمدەرىنىڭ ءوسىمى الەۋ­مەت­تىك مىن­دەت­تەمەلەردى ورىنداۋعا عانا ەمەس، بيزنەستى قو­سىم­شا قولداۋعا دا باعىتتالاتىن بولادى.

قازىرگى ۋاقىتتا قازاقستانداعى تاڭ­­­­­­بالاۋدىڭ بىرىڭعاي وپەراتورى – «قازاقتەلەكوم» اق. كومپانيا سالالىق مەم­لەكەتتىك ورگاندارمەن بىرلەسىپ، تاۋار­لار­دىڭ كەيبىر تۇرلەرى بويىنشا قانات­قاق­تى جوبالاردى ىسكە قوستى. اگرو­ونەركاسىپ كەشەنى سالاسىنداعى قاناتقاقتى جوبا ءسۇت ونىمدەرىن وندىرۋمەن جانە ەكسپورتتاۋ­مەن اينالىساتىن «مولپرودۋكت» جشس­ بازا­سىندا جۇزەگە اسىرىلعانىن جوعارى­دا ايت­تىق. اتالعان كاسىپورىنداعى تاڭبا­لاۋ جۇيە­سىن QR Trace كومپانياسى تەحني­كالىق سەرىكتەسى «پەر­ۆىي بيت» جشس-مەن بىرلەسىپ ەنگىزدى.

– تاۋارلاردى تاڭبالاۋ جانە قاداعالاۋ جۇيەسىن ەنگىزۋ ءۇشىن بەلگىلى دەڭگەيدە شى­عىن­دانۋعا تۋرا كەلەدى. سوندىقتان بيز­نەس وكىلدەرىنەن سۇراقتار تۋىنداۋى مۇم­كىن. ءبىز قاناتقاقتى جوبانى ىسكە اسىرۋ بارىسىندا ۇلكەن جۇمىس جۇرگىزدىك. ءبىر جىلعا جۋىق ۋاقىت نا­رىق­تى، ءتۇرلى شە­شىمدەردى زەرتتەدىك جانە ناتيجەسىندە كاسىپكەر­لەرىمىز ءۇشىن ەڭ وڭتايلى نۇسقانى تاپتىق. ءبىز بۇل شەشىمدى «مولپرودۋكت» جشس بازا­سىندا سىناپ كوردىك. وندا زاماناۋي وندى­رىستىك جەلى ورناتىلعان. تاڭبالاۋ جاب­دىقتارىن بىرىكتىرۋدى جۇزەگە اسىردىق. سونداي-اق 1س ەسەپكە الۋ جۇيەسىن بەيىمدەۋ جانە جەتىلدىرۋ جۇمىستارىن رەتتەدىك، – دەيدى QR Trace جشس ديرەكتورى الماز مارالوۆ.

پەتروپاۆلداعى «مولپرودۋكت» كا­سىپور­نى ءونىمىنىڭ باسىم بولىگىن رەسەي فەدە­راتسياسىنا ەكسپورتتايدى. كومپانيا باس­شىلىعى جاڭا تەحنولوگيالاردى ەنگىزۋ­گە مۇددەلى. بۇل ولارعا ەكسپورتتىق جانە ىشكى نارىقتارداعى قارقىنىن ساقتاپ قالۋعا مۇمكىندىك بەرەدى.

اۋىل شارۋاشىلىعى مينيسترلىگىنىڭ حابارلاۋىنشا، جۇيە سىناقتان ءساتتى ءوتتى. ونىڭ ناتيجەسى تالدانىپ، اۋىل شارۋا­شىلىعى سالاسىنداعى تاڭبالاۋ تاجىريبەسى الداعى ۋاقىتتا نەگىزگە الىن­باق.

سوڭعى جاڭالىقتار

شىعىس «قىزىل» ايماقتا

ايماقتار • كەشە

تسيفرلى تەڭگە جوباسى تالقىلاندى

ەكونوميكا • 23 شىلدە، 2021

اقپاراتتىق حابارلاما

ەگەمەن قازاقستان • 23 شىلدە، 2021

ۇقساس جاڭالىقتار