«سارى ايماققا» قايتا ورالدى

دەنساۋلىق ساقتاۋ باسقارما­سى­نىڭ باسشىسى ايدار سەيىتقازي­نوۆتىڭ ايتۋىنشا، قازىر وڭىردە ەكپە الۋشىلار قاتارى كوبەيۋدە. وبلىستا كوروناۆيرۋسقا قارسى ەك­پە­­نىڭ العاشقى كومپونەنتىن 66 147 ادام العان. ەكىنشى كومپونەنت 24 973 ادامعا سالىنعان. وتاندىق ۆاكتسينانى 968 ادام الدى.

قاۋىپتى ىندەتتەن قورعانۋدىڭ بىردەن-ءبىر جولى – ەكپە الۋ ەكەنىن ءوڭىر تۇرعىندارى دا تۇسىنە باستادى. ويتكەنى، ىندەتتىڭ قاۋىپتىلىگىن ءوڭىردىڭ «قىزىل ايماققا» قايتا­لا­نىپ تۇسە بەرۋىنەن-اق كورىپ، ءبىلىپ وتىر. وبلىس ورتالىعىنداعى تورايعىروۆ ۋنيۆەرسيتەتىنىڭ وقى­ت­ۋشىلارى مەن ستۋدەنتتەرى، قىز­مەتكەرلەرى وقۋ ورنىنداعى دارى­گەر­لىك امبۋلاتوريادان ەكپە الۋدى باستاپ كەتتى. مەديتسينالىق بولىم­شەنىڭ باس دارىگەرى نۇرلان ءورازا­لين­نىڭ ايتۋىنشا، ەكپە ەگۋ شاراسى كۇنى بويى وتەدى. قازىر ۆاكتسينانىڭ العاشقى كومپونەنتىن 150-گە جۋىق ادام السا، ەكىنشى دوزانى 20-دان استام ادام قابىلداعان.

– ارينە، ستۋدەنتتەر دە بار. مەديتسينالىق بولىمشە ءوز ەركىمەن ەكپە العىسى كەلەتىن كەز كەلگەن ادام­دى قابىلدايدى. مەدبيكەلەر ۆاك­تسينا سالدىرۋعا كەلگەن ءار ادام­نىڭ دەنساۋلىعىن تەكسەرەدى. ىندەتكە قارسى ەگىلەتىن ەكپە جايىندا ءتۇسىندىرىپ، جازباشا تۇردە رۇقسات الادى. ەكپە قابىلداعانداردىڭ ىشىندە جاعدايى ناشارلاعان ادامدار بولعان ەمەس، – دەيدى دارىگەرلەر.

دارىگەرلىك امبۋلاتوريادا كۇنى­نە 10-15 ادامعا ەكپە جاسالادى. مە­ديتسينالىق بولىمشەنىڭ دارىگەر­لەرى دە ەكپە الۋدا.

اۋدانداردا دا ىندەتكە قارسى ەكپە ەگۋ شاراسى جۇرگىزىلۋدە. ءار اۋداندا ەكپە سالۋ بارىسى دۇرىس ۇيىمداستىرىلعان جاعدايدا مامىر ايىنىڭ سوڭىنا قاراي ادامداردى 5-تەن 15 مىڭعا دەيىن ۆاك­تسي­نالاۋعا بولار ەدى. سوندىقتان، وبلىس اكىمدىگى تۇرعىندار اراسىندا دۇربەلەڭ تۋماس ءۇشىن، ولار ەكپەنى قايدان الاتىنى تۋرالى اقپاراتتان حاباردار بولۋى تيىستىگىن، قالالار مەن اۋداندار اكىمدەرىنە بارلىق ەگۋ پۋنكتىن ارالاپ، جۇمىسىن ۇزدىكسىز باقىلايتىن تۇراقتى توپتار قۇرۋدى تاپسىردى. مىسالى، باياناۋىل اۋدانىندا 2 464 ادام ۆاكتسينا العان. اۋداندىق اۋرۋحانانىڭ باس دارىگەرى سەرىكجان ارىنوۆتىڭ ايتۋىنشا، شالعايدا، تاۋ باۋرايىنداعى اۋىل تۇرعىندارىنا ەكپە سالۋعا ارنايى بريگادا باردى. مەديتسينالىق بريگادا ءاربىر اۋىلدان شاقىرتۋ تۇسكەن بويدا جولعا شىعادى. قۇرامىندا 2 دارىگەر، 2 مەدبيكەسى بار بريگادا ءار اۋىلدان 20-30 ادامعا دەيىن ەكپە سالۋدا.

– وسى اپتادا ق.ساتباەۆ اتىنداعى جانە ۇزىنبۇلاق اۋىلدارىنداعى تۇرعىندارعا ەكپە ەگىلدى. سونىمەن بىرگە، باياناۋىلداعى «مايقايىڭ التىن» اق-تىڭ 775 جۇمىسشى-قىزمەتكەرى دە ەكپە قابىلدادى، – دەيدى س.ارىنوۆ.

اۋىلداعى جانە اۋىلدار ما­ڭا­يىن­­­داعى كاسىپورىندار ءۇشىن ەڭبەك ادامىنىڭ دەنساۋلىعى ما­ڭىز­دى. ىندەت كەزىندەگى باستى شارت – قاۋىپسىزدىك. كومپانيا قىزمەتكەرلەر مەن مەردىگەرلەردىڭ قاۋىپسىزدىگىنە، دەنساۋلىعىن ساق­تاۋعا باسىمدىق بەرۋدە. ەڭبەك ادام­دارىن قورعاۋ جانە جۇمىس­تا­عى كىدىرىستەر قاۋ­پىن ازايتۋ ءۇشىن ىندەتكە قارسى تەس­تىلەۋ مەن وق­شاۋ­لاۋدى قوسا العان­دا، كەشەندى شارالار ءالى دە قابىل­دا­نۋ­دا. ياعني، «سارى ايماققا» ءوتۋ «قىزىل ايماقتاعى» شەكتەۋ شارالارىندا ەكپە الۋ ارقىلى ۇجىمدىق يممۋنيتەت قالىپتاسا باستاعانىن بىلدىرەدى. وبلىس اكىمدىگى قالالار مەن اۋدانداردا ەكپە ەگىلەتىن جەر­لەر­دىڭ ءتىزىمىن تۇرعىندارعا حابار­لاپ، اقپاراتتىق جۇمىستاردى جال­عاس­تىرۋدا. قازىر 135 ەگۋ ورنى دا­يىندالعان. ارنايى ورىندارعا با­رىپ ەكپە جاسايتىن 37 توپ تا بار. سون­دىقتان، قانداي ايماق بولسىن، ىندەت تارالۋى جاعدايىندا ساقتانۋ، جاقى­نىنا جاناشىر بولۋ اركىمنىڭ مىن­دەتى.

پاۆلودار وبلىسى