قازاقستان • 08 مامىر، 2021

قادىر تۇنىندە مەشىتتە ورىندالاتىن ءدىني راسىمدەر ونلاين وتەدى

53 رەت كورسەتىلدى

قادىر تۇنىندە مەشىتتە ورىندالاتىن ءدىني راسىمدەر ونلاين رەجىمدە وتەدى. بۇل جايىندا قازاقستان مۇسىلماندارى ءدىني باسقارماسىنىڭ قادىر تۇنىنە قاتىستى مالىمدەمەسىندە، ايتىلعان دەپ حابارلايدى Egemen.kz.

وزدەرىڭىزگە بەلگىلى، ەلىمىزدەگى جانە الەمدەگى كوپتەگەن قوعامدىق ءىس-شارالار مەن جيىندار ونلاين رەجيمدە وتۋدە. ونىڭ باستى سەبەبى پاندەميالىق جاعدايدى ودان سايىن كۇردەلەندىرمەۋ ەكەنى بەلگىلى. ويتكەنى، جۇقپالى دەرتپەن وقشاۋلانۋ ارقىلى عانا كۇرەسۋدىڭ ماڭىزى كۇن سايىن ارتۋدا. الەمدىك تاجىريبەدە كوروناۆيرۋسپەن كۇرەسۋدىڭ وقشاۋلانۋ ءتاسىلى وڭ ناتيجەسىن بەرىپ جاتقانىن جاقسى بىلەمىز»، دەلىنگەن مالىمدەمەدە.

وسىعان وراي قازاقستان مۇسىلماندارى ءدىني باسقارماسى ەلىمىزدەگى پاندەميالىق جاعدايدى ەسكەرىپ، قاۋىپتى دەرتتىڭ تارالۋىن الدىن الۋ ءۇشىن قاسيەتتى قادىر تۇنىندە مەشىتتە ورىندالاتىن ءدىني راسىمدەر ونلاين رەجىمدە وتەتىنىن حابارلادى.

«وسى رەتتە قادىر كەشىن ۇيدە وتكىزۋ قاجەتتىگىن قاپەرلەرىڭىزگە سالامىز. حالىقتىڭ دەنساۋلىعى مەن ءومىرى بارىنەن قىمبات قۇندىلىق بولعاندىقتان، وسىنداي ۋاقىتشا شەشىمدى دۇرىس قابىلداۋلارىڭىزدى جانە تارتىپكە باعىنۋلارىڭىزدى سۇرايمىز. ءار ادام ءوزىنىڭ وتباسى مەن قوعام الدىنداعى ازاماتتىق ءارى ادامگەرشىلىك جاۋاپكەرشىلىگىن تەرەڭ سەزىنىپ، جۇقپالى دەرتتىڭ تارالماۋىنا ۇلەس قوسسا، اللانىڭ جاردەمىمەن بۇل سىناقتى دا ەڭسەرەمىز. اللا تاعالا «باقارا» سۇرەسىنىڭ 195-اياتىندا: «وزدەرىڭدى ءوز قولدارىڭمەن قاۋىپ-قاتەرگە سالماڭدار»، – دەپ بۇيىرعان. بۇل ايات بارشامىزعا ومىرلىك عيبرات بولۋى ءتيىس»، دەدى باسقارمادان.

قازاقستان مۇسىلماندارى ءدىني باسقارماسى قاسيەتتى قادىر تۇنىندە وتاندىق تەلەارنالار مەن «حالىق ارنا»، «حيكمەت تۆ» جانە muftyat.kz سايتىنىڭ الەۋمەتتىك جەلىدەگى پاراقشالارىندا ارنايى ونلاين باعدارلاما ۇيىمداستىراتىندىعىن دا اتاپ وتەدى.

«قاسيەتى مول قادىر ءتۇنى» اتتى ونلاين باعدارلامادا ەلىمىزگە بەلگىلى عالىمداردىڭ ۋاعىز-ناسيحاتىن تىڭداپ، قۇران حاتىم دۇعاسىنا قاتىسا الاسىزدار. ءدىني باسقارما جانىنداعى اقپارات بەرۋ ورتالىعىنان (call center، 8 7172 33 30 30) تاۋلىك بويى كوكەيدەگى ساۋالىڭىزعا جاۋاپ الاسىز. اللا تاعالا ساۋابى مىڭ ايدان ارتىق، تۇندەردىڭ تورەسى، قاسيەتتى قادىر كەشىندە ۇيدە جاساعان دۇعا-تىلەكتەرىمىزدى، قۇلشىلىق-عيباداتتارىمىزدى قابىل ەتىپ، مەشىتتەرىمىزدە ءبىر ساپتا تۇرىپ، ناماز وقيتىن كۇندى جاقىن ەتكەي. جاراتۋشى جاببار يەمىزدەن جەر بەتىنەن جۇقپالى ىندەتتى جويىپ، قالىپتى كۇنگە ورالىپ، قۋانىشتى كۇندەرگە جەتكىزۋىن تىلەيمىز. ەلىمىز امان، جۇرتىمىز تىنىش بولعاي. ءامين!»، دەلىنگەن مالىمدەمە ماتىنىندە.

سوڭعى جاڭالىقتار

بيىل 755 اۋىل اكىمى سايلانادى

قوعام • بۇگىن، 12:15

ۇقساس جاڭالىقتار