شىمكەنتتىڭ تورىندە «ەگەمەن قازاقستان» كوشەسى اشىلدى

سالتاناتتى شاراعا جازۋشى، «الاش» سىيلىعىنىڭ يەگەرى مارحابات بايعۇت، «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى دارحان قىدىرالى قاتىسىپ،  جەرگىلىكتى زيالى قاۋىم وكىلدەرى مەن قالا تۇرعىندارىنا ىزگى تىلەكتەرىن ءبىلدىردى.

«ەگەمەن قازاقستان» گازەتىن ساناسى ساۋلەلى وقىرمان تۇشىنا وقيدى. ءجونى بولەك، جوسىعى ەرەك باسىلىمدى ءار كەزەڭدە الاشتىڭ ارداقتىلارى باسقارعان، قىزمەت ەتكەن. كۇنى كەشە شەرحان مۇرتازا، ءابىش كەكىلباەۆ، ساۋىتبەك ءابدىراحمانوۆ سەكىلدى تۇعالار، سوڭعى جىلدارى جەرلەسىمىز، حالىقارالىق تۇركى اكادەمياسىنىڭ پرەزيدەنتى  دارحان قىدىرالى باسشىلىق ەتىپ كەلەدى. اتا باسىلىمدا بىزدە ەڭبەك ەتكەندىكتەن بۇل باسىلىم ءبىزدىڭ قاراشاڭىراق. سوندىقتان ەلدىڭ باس گازەتىنە بەرىلگەن كوشە اتاۋىنا بىزدە مارقايىپ، ماقتانىپ وتىرمىز»، دەدى قارىمدى قالامگەر مارحابات بايعۇت.

ەستەرىڭىزگە سالار بولساق، جەتىنشى شاقىرىلىمداعى شىمكەنت قالاسى ءماسليحاتىنىڭ كەزەكتى ءۇشىنشى سەسسياسىندا شىمكەنت قالاسى ءماسليحاتى مەن اكىمدىگىنىڭ بىرلەسكەن قاۋلىسىمەن 2021 جىلدىڭ 18 ناۋرىز كۇنى قالانىڭ اتاۋى جوق 325 كوشەسىنە قازاقتىڭ بەلگىلى وڭتۇستىكتەگى ەلدى-مەكەندەردىڭ اتاۋلارى، جەر-سۋ اتاۋلارى، رومان، ەپوس، حالىق اندەرى جانە تانىمال باسپالاردىڭ اتاۋلارى بەرىلدى. قاراتاۋ اۋدانى بوزارىق ساياجايىنداعى 65 كوشە «انا ءتىلى»، «جاس الاش»، «اباي جولى»، «قامار سۇلۋ»، «بالحاديشا»، «اقبىلەك» جانە تاعى باسقا اتاۋلارمەن اتالادى.

وسىناۋ تاعىلىمدى جيىنعا نۇر-سۇلتان قالاسىنان «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى دارحان قىدىرالى قاتىسىپ، تۇرعىنداردى جاڭا كوشە اتاۋىن الۋىمەن قۇتتىقتادى.

«بۇگىن ەل گازەتى عانا ەمەس، كۇللى قازاق ءباسپاسوزى ءۇشىن دە تاريحي كۇن. بۇل ۇلت ۇنپاراعىنىڭ باسىندا تۇرعان ۇلى تۇلعالارعا كورسەتىلگەن قۇرمەت دەپ ەسەپتەيمىز. تىڭ باستامانى جۇزەگە اسىرعان قالا اكىمدىگىنە، ونداعى ازاماتتارعا العىس ايتامىز. انىعىندا، عاسىرلىق تاريحى بار باسىلىمنىڭ ەڭ كوپ وقىرماندارى دا وسى شىرايلى شىمكەنت وڭىرىندە. بىلتىر قالا اكىمدىگىمەن بىرلەسىپ ارنايى «شىمكەنت» بەتىن اشتىق. ءۇشىنشى مەگاپوليس اتانعالى شاھاردا كوپتەگەن جاڭا جوبالار قولعا الىنىپ، ەلگە بەلگىلى ازاماتتار قىزمەتكە كەلىپ جاتىر. وسىنداي جاقسى جاڭالىقتاردى   ەلگە، وقىرمانعا جەتكىزۋ ءبىزدىڭ مىندەتىمىز. شىمكەنتتىڭ كەرەگەسى كەڭگە جايىلعالى، جاڭا قوسىلعان ەلدى مەكەندەرگە كوشە اتاۋلارى بەرىلىپ جاتىر. قازاقى ءيىس اڭقىپ تۇرعان كوشە اتاۋلارىنان جەرگىلىكتى جەردەگى زيالى قاۋىمنىڭ قولتاڭباسى مەنمۇندالايدى. ەگەمەن قازاقستان كوشەسىنىڭ جاس جاسوسپىرىمدەرى ءوسىپ جەتىلگەن سايىن ءبىزدىڭ جاڭا وقىرماندارىمىزدىڭ قاتارى دا ءوسىپ، جەتىلە تۇسەدى دەگەن سەنىمدەمىز»، دەدى دارحان قۋاندىق ۇلى.

شارا سوڭىندا اۋىل ءبيى سەرىك اقساقال ءسوز الىپ، قالاداعى كوشە اتاۋلارىنىڭ قازاقشا اتاۋلارمەن اتالىپ جاتقاندىعىنا ريزاشىلىعىن ءبىلدىردى.

ايتا كەتەرلىگى، وسىدان ءبىراز جىل بۇرىن نۇر-سۇلتان قالاسىندا «ەگەمەن قازاقستان» اتتى كوشە اشىلعان بولاتىن. ءجۇز جىلدان استام تاريحى بار رەسپۋبليكالىق باسىلىمنىڭ اتىنا ءۇشىنشى مەگاپوليستە كوشە اتاۋى بەرىلۋى سول رۋحاني ساباقتاستىقتىڭ ءبىر بەلگىسى بولسا كەرەك. ۇلت رۋحانياتىن ۇلىقتاعان شىمكەنتتىكتەردىڭ يگى باستاماسى ەلباسىمىز نۇرسۇلتان نازارباەۆ ايقىنداپ بەرگەن «بولاشاققا باعدار: رۋحاني جاڭعىرۋدىڭ» جارقىن كورىنىسىمەن ۇندەسىپ جاتىر.