قازاقستان • 16 ناۋرىز، 2021

قارۋلى كۇشتەردە «التىن جەبە – 2021» كەشەندى تەكسەرۋى باستالدى

58 رەت كورسەتىلدى

ەلىمىزدىڭ قارۋلى كۇشتەرىندە «التىن جەبە – 2021» كەشەندى تەكسەرۋى جۇرگىزىلۋدە، وعان ءۇش مىڭنان استام اسكەري قىزمەتشى مەن ءۇش ءجۇز بىرلىك جاۋىنگەرلىك جانە اۆياتسيالىق تەحنيكا تارتىلدى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.

ءبىرىنشى كەزەڭ ەلىمىزدىڭ شىعىسىندا باستالدى. اسكەري بولىمدەر جاۋىنگەرلىك ازىرلىككە كەلتىرىلدى جاىنە جاۋىنگەرلىك مىندەتتەردى ورىنداۋ اۋدانىنا مارش جاسادى. قازاقستاننىڭ وڭتۇستىك-شىعىسىنان دەسانتتىق-شابۋىلداۋ اسكەرلەرىنىڭ بولىمشەلەرى جەتكىزىلدى. تەكسەرۋگە ۇشقىشسىز ۇشاتىن اپپاراتتاردىڭ ەسەپتوپتارى، بارلاۋ-سيگنال بەرۋ قۇرالدارىنىڭ كەشەندەرى، ارتيللەريالىق بولىمشەلەر، ارميالىق جانە اسكەري-كولىك اۆياتسياسى تارتىلادى.

- جىل سايىن كەشەندى تەكسەرۋدى تاپسىرۋ شارتتارى كۇردەلەنىپ، جەتىلدىرىلىپ وتىرادى. ءبىز قارۋلى جانجالداردى، قارۋ-جاراقتىڭ جاڭا تۇرلەرىن قولدانۋدى، ۇرىستى جۇرگىزۋدىڭ قازىرگى زامانعى تاسىلدەرىن مۇقيات تالدايمىز جانە وسىنىڭ ءبارىن وقۋ-جاۋىنگەرلىك مىندەتتەردى جوسپارلاۋ كەزىندە ەسكەرەمىز، - دەدى وقۋ-جاتتىعۋ جەتەكشىسى پولكوۆنيك بولات جوراباەۆ.

تەكسەرۋ كەزىندە باسقارۋ ورگاندارىنىڭ جۇمىسىنا، قارسىلاستى مۇقيات بارلاۋعا، ارتيللەريانىڭ وق اتۋىن تۇزەتۋگە جانە ۇشقىشسىز ۇشاتىن اپپاراتتاردى پايدالانا وتىرىپ، اۆياتسيانى باعىتتاۋعا ەرەكشە نازار اۋدارىلادى. ديۆەرسيالىق-بارلاۋ ءىس-قيمىلدارىن جۇرگىزۋ، كۇندىز جانە تۇندە ارميالىق تاكتيكالىق وق اتۋ جاتتىعۋلارىن ورىنداۋ، ۇشۋ مەن تورۋىلداعى جاۋىنگەرلىك وق اتۋلار بويىنشا ءىس-قيمىلدار باعالانادى.

اسكەري قىزمەتشىلەر تاكتيكالىق-ارنايى، ينجەنەرلىك، اسكەري-مەديتسينالىق دايارلىق، مينا-جارعىش ءىسى بويىنشا جەكە سىناقتار، بايلانىس جانە اسكەري توپوگرافيا بويىنشا نورماتيۆتەر تاپسىرادى.

50 كيلومەترلىك رەيد جاساۋ جانە وقۋ-جاۋىنگەرلىك مىندەتتەردى ورىنداۋ بارىسىندا دەنە توزىمدىلىگى مەن پسيحولوگيالىق جۇكتەمەگە توزە ءبىلۋى تەكسەرىلەدى.

«التىن جەبە – 2021» كەشەندى تەكسەرۋى 9 ساۋىرگە دەيىن جالعاستىرىلادى جانە بارلىق وڭىرلىك قولباسشىلىقتاردىڭ، دەسانتتىق-شابۋىلداۋ اسكەرلەرى مەن اسكەري-اۋە كۇشتەرىنىڭ بولىمشەلەرىن قامتيدى.

سوڭعى جاڭالىقتار

ۇقساس جاڭالىقتار