ايماقتار • 06 ناۋرىز، 2021

تاراز قالاسىندا 135 وتباسى باسپانالى بولدى

23 رەت كورسەتىلدى

«نۇرلى جەر» مەملەكەتتىك تۇرعىن ءۇي باعدارلاماسى اياسىندا بۇگىن تاراز قالاسىندا بىرقاتار تۇرعىندار باسپانالى بولدى.

اتالعان 135 پاتەرلى كوپقاباتتى تۇرعىن ءۇيدىڭ قۇرىلىسىن «بينوم» جاۋاپكەرشىلىگى شەكتەۋلى سەرىكتەستىگى جۇرگىزگەن. باسپانالى بولعانداردىڭ اراسىندا 27 جەتىم بالا، 66 الەۋمەتتىك جاعىنان از قامتىلعان وتباسى جانە 42 بيۋدجەتتىك ۇيىم قىزمەتكەرى بار. ايتا كەتەيىك، تارازدىق تۇرعىندارعا پاتەر كىلتتەرى 8 ناۋرىز مەرەكەسى قارساڭىندا تابىستالىپ وتىر.

جيىنعا جامبىل وبلىسىنىڭ اكىمى بەردىبەك ساپارباەۆ قاتىسىپ، تۇرعىندارعا پاتەر كىلتتەرىن تابىستادى.

«مەملەكەت باسشىسىنىڭ تاپسىرماسىنا سايكەس، جىل سايىن وبلىستىڭ جۇزدەگەن تۇرعىندارى جاڭا پاتەرلەرگە يە بولۋدا. وتكەن جىلى تاراز قالاسىنىڭ تۇرعىندارىنا ەكى مىڭعا جۋىق پاتەر بەرىلدى. اعىمداعى جىلى ءبىز بۇل كورسەتكىشتى ارتتىرىپ، سول ارقىلى كەزەكتى قىسقارتا ءتۇسۋدى جوسپارلاپ وتىرمىز. وسى 15-شاعىن اۋدانىنىڭداعى وڭ وزگەرىستەرگە وزدەرىڭىز كۋاسىزدەر. جاقىندا مۇندا تاعى ەكى مەكتەپ، بالاباقشا، فەلدشەرلىك پۋنكت، پوليتسيا بولىمشەلەرى اشىلاتىن بولادى. 8 ناۋرىز مەرەكەسىمەن مەن وبلىس باسشىلىعى اتىنان بارلىق انالار مەن ارۋلاردى قۇتتىقتايمىن. انا – وتباسىنىڭ جۇرەگى. سوندىقتان ءبىز ولاردى جان-جاقتى قولداپ، جاس ۇرپاقتى سوعان ۇيرەتۋىمىز كەرەك»، دەدى بەردىبەك ساپارباەۆ.

سونداي-اق، مەرەكە قارساڭىندا باسپانالى بولعان بىرقاتار تارازدىق تۇرعىندار دا قۋانىشىمەن ءبولىستى. «مەنىڭ ەكى بالام بار. بۇگىن بىزگە ەكى بولمەلى پاتەردىڭ كىلتى تابىستالىپ، قۋانىشتى سەزىمدى باستان كەشىپ وتىرمىز. بۇل مەرەكە وسىناۋ جاعىمدى اسەرىمەن ءبىزدىڭ جادىمىزدا ۇزاق ساقتالاتىنىنا سەنەمىن»، دەدى جالعىزباستى انا امينا ياكۋبجانوۆا. ال، تولىق ەمەس وتباسى ساناتى بويىنشا كەزەكتە تۇرىپ، باسپانالى بولعان نازيرا ءابدىرايىموۆا دا ءوز تىلەگىن جەتكىزدى. «قۋانىشىمدى سوزبەن ايتىپ جەتكىزۋ مۇمكىن ەمەس. مەن بارلىق انالار اتىنان وبلىس باسشىلىعىنا دەگەن ريزاشىلىعىمدى جەتكىزگىم كەلەدى. كەز-كەلگەن ادام جەكە باسپاناسىنا قول جەتكىزۋدىڭ قانشالىقتى ماڭىزدى ەكەنىن تۇسىنەدى جانە سونى ارماندايدى. مەن ءار وتباسىنا وسىنداي باقىتتى سەزىنۋىن تىلەيمىن»، دەدى ول.

ايتا كەتەيىك، قازىرگى تاڭدا وبلىستا تۇرعىن ءۇي قورىنان پاتەر الۋ ءۇشىن كەزەكتە 30 مىڭنان استام ادام تۇر ەكەن. وتكەن جىلدىڭ قورىتىندىسى بويىنشا 250 مىڭ شارشى مەتردەن استام تۇرعىن ءۇي پايدالانۋعا بەرىلگەن.

 

جامبىل وبلىسى

سوڭعى جاڭالىقتار

ءسوزدىڭ جەتى بوياۋى

تانىم • كەشە

ورازانىڭ ءار ءساتى ساۋاپ

رۋحانيات • كەشە

ۇقساس جاڭالىقتار