سپيكەردىڭ ايتۋىنشا، "Ashyq" پيلوتتىق جوباسى ءوز جۇمىسىندا بىرقاتار فيتنەس-كلۋبتاردى، سپا-ورتالىقتاردى، ساۋنالاردى جانە رەسەپشنى بار باسقا دا وبەكتىلەردى پايدالانادى. جوباعا قاتىسۋشىلار ەرىكتى بولىپ سانالادى.

«2021 جىلدىڭ 26 اقپانىندا قر باس مەملەكەتتىك سانيتارلىق دارىگەرىنىڭ «نۇر-سۇلتان، الماتى جانە قاراعاندى قالالارىنداعى كاسىپكەرلىك نىساندارىندا «Ashyq» ءموبيلدى قوسىمشاسىن ەنگىزۋ بويىنشا پيلوتتى جۇرگىزۋ تۋرالى» №7 قاۋلىسى قابىلداندى. وسى قاۋلى اياسىندا «Ashyq» پيلوتتىق جوباسىن مىنا نىسانداردا ىسكە اسىرۋ باستالدى: فيتنەس-كلۋبتار، سپا-ورتالىقتار، ساۋنالار، باسسەيندەر، كومپيۋتەرلىك كلۋبتار جانە بوۋلينگ كلۋبتار. وسىعان بايلانىستى كومپيۋتەرلىك كلۋبتار مەن بوۋلينگ-ورتالىقتار 2020 جىلدىڭ ناۋرىزىنان باستاپ توقتاتىلعان جانە قازىرگى ۋاقىتقا دەيىن تىيىم سالىنعان ءوز قىزمەتىن قايتا باستاۋعا مۇمكىندىك الادى»، - دەدى ق.مۇقاش.

ول سونداي-اق "Ashyq" قوسىمشاسىنىڭ بيزنەسكە بەرەتىن ارتىقشىلىقتارىن ءتۇسىندىرىپ بەردى:

- ەگەر نىسان ورنالاسقان ايماق "قىزىل ايماقتا" بولسا، وعان "سارى ايماققا" سايكەس شەكتەۋ كريتەريلەرى قولدانىلادى;

- ەگەر "سارى ايماق" بولسا، "جاسىل ايماققا" سايكەس شەكتەۋ كريتەريلەرى قولدانىلادى.

"Ashyq" ءموبيلدى قوسىمشاسى QR-كودتى پايدالانۋ جانە پتر ورتاق بازاسىمەن ينتەگراتسيالاۋ ەسەبىنەن كەلۋشىنىڭ مارتەبەسىن، ياعني ۆيرۋستىڭ تاسىمالداۋشىسى بولىپ سانالاتىنىن نەمەسە سانالمايتىنىن انىقتاۋعا مۇمكىندىك بەرەدى.

«QR-كود بيزنەس سۋبەكتىسىنە بەرىلەدى. بۇل پيلوتقا قاتىسۋ ءۇشىن ءوزىنىڭ QR-كودىن InfoKazakhstan.kz پلاتفورماسى ارقىلى الۋ قاجەت. QR-كود سۋبەكتىنىڭ اتاۋىن، ونىڭ ورنالاسقان جەرىن جانە سايكەستەندىرۋ دەرەكتەرىن كورسەتە وتىرىپ، بيزنەس سۋبەكتىسىنىڭ ەلەكتروندىق سايكەستەندىرگىشىن بىلدىرەدى. 1 وبەكتىگە كىرۋ جانە شىعۋ ءۇشىن كەمىندە 2 QR-كود بەرىلەدى. ەگەر مەكەمەگە بىرنەشە رەت كىرىپ-شىقسا ءاربىر كىرۋ ءۇشىن جەكە QR-كود قالىپتاستىرىلادى»، - دەپ ءتۇسىندىردى سپيكەر.

مەكەمەگە كىرۋ ءۇشىن كەلۋشى ءوزىنىڭ سمارتفونىنا "Ashyq" ءموبيلدى قوسىمشاسىن جۇكتەپ، تەلەفون ءنومىرى بويىنشا اۆتوريزاتسيالانۋى، جسن ەنگىزۋى جانە ءوزىنىڭ كەلۋىن تىركەۋ ءۇشىن مەكەمەنىڭ QR-كودىن سكانەرلەۋى قاجەت. سونداي-اق، شىعۋ كەزىندە QR كودىن سكانەرلەۋ كەرەك.

قىزىقتىرعان سۇراقتارعا جاۋاپ الۋ ءۇشىن @support_ashyq_bot تەلەگرامماسىندا تەحنيكالىق قولداۋ قىزمەتى ىسكە قوسىلدى. قوسىمشانى كوبەيتۋ جاعدايىندا باسقا ارنالاردى قوسۋ قاراستىرىلادى.