قازاقستان • 02 ناۋرىز، 2021

سەناتتا ساقتاندىرۋ نارىعىن جەتىلدىرۋ ماسەلەلەرى تالقىلاندى

5 رەت كورسەتىلدى

سەناتتىڭ قارجى جانە بيۋدجەت كوميتەتى ولگا پەرەپەچينانىڭ توراعالىعىمەن «ساقتاندىرۋ نارعىنىڭ دامۋ كەلەشەگى. ءومىردى ساقتاندىرۋدى رەتتەۋ جانە دامىتۋ باعىتتارى» تاقىرىبىندا دوڭگەلەك ۇستەل وتكىزدى، دەپ حابارلايدى Egemen.kz.

ءىس-شارا بارىسىندا ساقتاندىرۋ نارىعىنىڭ دامۋ كەلەشەگى، جۇمىسشىنى وقىس جاعدايدان مىندەتتى ساقتاندىرۋ جۇيەسىن جەتىلدىرۋ جانە كومپانيالاردىڭ ءومىردى ساقتاندىرۋ بويىنشى قىزمەتى جان-جاقتى تالقىلاندى.

«2018 جىلعى جازدا ساقتاندىرۋ جانە ساقتاندىرۋ قىزمەتى، باعالى قاعازدار نارىعى ماسەلەلەرى تۋرالى زاڭ قابىلداندى. سونىڭ ناتيجەسىندە قارجى قىزمەتىن، سونىڭ ىشىندە ساقتاندىرۋ قىزمەتىن تۇتىنۋشىلاردىڭ قۇقىقتارىن قورعاۋ تەتىكتەرى قالىپتاستى. بۇل حالىقتىڭ ساقتاندىرۋ جۇيەسىنە دەگەن سەنىمىن ايتارلىقتاي ءوسىردى. سونداي-اق، وتكەن جىلدىڭ اياعىندا قابىلدانعان ەكونوميكالىق ءوسۋدى قالپىنا كەلتىرۋ ماسەلەلەرى تۋرالى زاڭ دا ساقتاندىرۋ نارىعىنىڭ دامۋىنا تىڭ سەرپىن بەردى. اتالعان قۇجاتتا زەينەتاقى اننۋيتەتىن ۇسىناتىن كومپانيالاردىڭ قىزمەتتەرىن كەڭەيتۋگە قولايلى جاعداي جاساۋ ماسەلەسى قاراستىرىلعان»، – دەدى كوميتەت توراعاسى ولگا پەرەپەچينا.

دوڭگەلەك ۇستەل بارىسىندا قارجى نارىعىن رەتتەۋ جانە دامىتۋ اگەنتتىگى توراعاسىنىڭ ورىنباسارى ماريا حادجيەۆا حالىقتىڭ ساقتاندىرۋعا قىزىعۋشىلىعىن ارتتىرۋ ماقساتىمەن قابىلدانعان شارالار تۋرالى ايتتى. ولاردىڭ قاتارىندا ءومىردى جيناقتاۋ ارقىلى ساقتاندىرۋ بويىنشا سالىقتىق جەڭىلدىكتەردىڭ ەنگىزىلۋى، ساقتاندىرۋ كەلىسىمشارتتارىن ونلاين رەجيمدە جاساۋ مۇمكىندىگى، زەينەتاقى اننۋيتەتى قۇنىنىڭ 44 پايىزعا تومەندەتىلۋى سياقتى شارالار بار. ودان بولەك، ماريا حادجيەۆا قولعا الىنعان ناقتى جۇمىستار ازاماتتاردىڭ جيناقتاۋ باستامالارىن كوبەيتۋگە، حالىقتىڭ ساقتاندىرۋمەن قامتىلۋىن قامتاماسىز ەتۋگە جانە ساقتاندىرۋ قىزمەتىنىڭ قولجەتىمدىلىگىن ارتتىرۋعا مۇمكىندىك بەرەتىنىن اتاپ ءوتتى.

ءوز كەزەگىندە قازاقستان قارجىگەرلەرى قاۋىمداستىعى كەڭەسىنىڭ توراعاسى ەلەنا باحمۋتوۆا ءومىردى ساقتاندىرۋ كومپانيالارىنىڭ ازاماتتاردى زەينەتاقىمەن قامتاماسىز ەتۋدىڭ بالاماسىن ۇسىنۋى جانە مەملەكەتتىك ءبىلىم بەرۋ جيناقتاۋ جۇيەسى تۋرالى ايتتى. ونىڭ ايتۋىنشا، سوڭعى 5 جىلدا بجزق-دان زەينەتاقى تولەمىنىڭ جالپى كولەمىن ساقتاي وتىرىپ، زەينەتاقى جيناعىن ساقتاندىرۋ كومپانيالارىنا اۋدارۋ 2 ەسەگە، ياعني، 23 ميللياردتان 46 ميلليارد تەڭگەگە وسكەن. وسى 5 جىل ىشىندە زەينەتاقى الۋشىلاردىڭ قاتارى 8 پايىزعا ارتقان.

ال، ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ جۇمىسشىلاردى ساقتاندىرۋ سالاسى بويىنشا اتقارىلىپ جاتقان جۇمىستارعا توقتالدى. ول بىرقاتار ساقتاندىرۋ كومپانيالارى وندىرىستە زارداپ شەككەن ازاماتتارعا تولەمدەر تولەيتىنىن تىلگە تيەك ەتتى. ەلىمىزدە ساقتاندىرۋ سالاسىندا 28 كومپانيا جۇمىس ىستەيدى. ولاردىڭ 9-ى ءومىردى ساقتاندىرۋ ماسەلەلەرىمەن اينالىسادى. ولار 2020 جىلى 57،3 مىڭ كەلىسىمشارت جاساعان. الايدا، بۇل جۇمىس ىستەيتىن ازاماتتاردىڭ جالپى سانىنىڭ 31 پايىزىن عانا قۇرايدى. دەمەك، ەلىمىزدەگى جۇمىسشىلاردىڭ ۇشتەن ءبىرى عانا وقىس جاعدايلاردان ساقتاندىرىلعان.

كوميتەت توراعاسى ولگا پەرەپەچينا دوڭگەلەك ۇستەلدى قورىتىندىلاي كەلە، ساقتاندىرۋ قىزمەتى قارجى نارىعىندا قارقىندى دامىپ كەلە جاتقان باعىتتاردىڭ ءبىرى ەكەنىن ايتتى. وسى سالانىڭ ءارى قاراي وركەندەۋى ءۇشىن بۇگىنگى ءىس-شارا بارىسىندا ايتىلعان ماسەلەلەردى شەشۋ كەرەكتىگىنە دە نازار اۋداردى. كوتەرىلگەن ماسەلەلەردىڭ ەڭ ماڭىزدىلارىنىڭ نەگىزىندە ۇكىمەت پەن قارجى نارىعىن رەتتەۋ جانە دامىتۋ اگەنتتىگىنە ارنالعان ۇسىنىمدار دايارلانادى.

كەزدەسۋگە مۇددەلى مەملەكەتتىك ورگاندار مەن ءومىردى ساقتاندىرۋ كومپانيالارىنىڭ باسشىلارى قاتىستى.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ەرلىككە تولى سۋرەتتەر

رۋحانيات • كەشە

ۇقساس جاڭالىقتار