ءىت-نارىقتاعى ايشىقتى وزگەرىستەر

تەحنولوگيا • 16 اقپان، 2021

ءىت-نارىقتاعى ايشىقتى وزگەرىستەر

38 رەت كورسەتىلدى

وتكەن جىل بارلىق سالاعا وزگەرىس اكەلدى. اسىرەسە اقپاراتتىق-تەحنولوگيالىق باعىتتا ۇلكەن ءدۇمپۋ سەزىلدى. ءىت-نارىقتاعى جاھاندىق ترەندتەر قازاقستاندى اينالىپ وتكەن جوق. وسى ورايدا ءىت جانە يننوۆاتسيا سالاسىنداعى ساراپشى ەركەعالي ماشير ەلىمىزگە تىكەلەي اسەر ەتكەن نەگىزگى وزگەرىستەردى اتاپ ءوتتى.

فارحات قايرات ۇلى

ە.ءماشيردىڭ پىكىرىنشە، «بۇلتتى» شەشىمدەر سوڭعى بەس جىل كولەمىندە الەمدىك ءىت-نارىقتاعى نەگىزگى ترەندتىڭ بىرىنە اينالعان. دەمەك، ونىڭ قازاقستانعا اسەر ەتۋى زاڭدىلىق. كەيبىر كومپانيالار «بۇلتتى» سەرۆيستەردى ينفراقۇرىلىمدى ۇستاپ تۇرۋعا، دەرەكتەردى ساقتاۋعا، قىزمەتتەردىڭ جوعارى قولجەتىمدىلىگىن قامتاماسىز ەتۋگە جۇمسالاتىن شىعىنداردى ازايتۋ ءۇشىن پايدالانادى. ال ەندى ءبىرى اعىمدىق ماسەلەلەردى شەشۋ ءۇشىن عانا قولدانادى. «بۇلتتى» سەرۆيستەر كەز كەلگەن اۋقىمداعى بيزنەسكە پلاتفورما مەن دەرەكتەردى باسقارۋعا مۇمكىندىك بەرىپ، پروتسەستەردى وڭتايلاندىرۋعا كومەكتەسەدى. بۇگىنگى تاڭدا Amazon، Microsoft، Google جانە Yandex سياقتى ءىرى كومپانيالاردان بولەك، جەرگىلىكتى بايلانىس وپەراتورلارى دا نارىقتىڭ ءتۇرلى سەگمەنتتەرى مەن قىزمەت باعىتتارى بويىنشا ءتيىمدى «بۇلتتى» شەشىمدەردى ۇسىنىپ كەلەدى.

– 2020 جىلدىڭ كوپ بولىگىن قاشىقتان جۇمىس ىستەۋگە ارنادىق. سول سەبەپتى ZOOM قوسىمشاسىن پايدالانۋشىلار بازاسى بىلتىر 30 ەسە وسكەن. ال كومپانيا اكتسيالارىنىڭ قۇنى 100 دوللاردان 600 دوللارعا دەيىن ەسەلەنىپ، اقش-تىڭ ەڭ قىمبات IT كاسىپورىندارىنىڭ ۇزدىك جيىرمالىعىنا ەندى. سەرۆيستىك قىزمەتتەردىڭ بارلىعى جوعارى ساپالى بايلانىس ارناسى مەن دەرەكتەر ورتالىعى بولماسا، ومىرشەڭ دۇنيەگە اينالا المايدى، – دەيدى inbusiness.kz سايتىنا سۇحبات بەرگەن ە.ماشير.

دەمەك، «بۇلتتى» سەرۆيستەرگە نەگىزدەلگەن ZOOM قوسىمشاسى قازاقستاندىقتاردىڭ ومىرىنە وزگەرىس ەنگىزدى.

سونىمەن قاتار بىلتىر ونلاين تولەم، ونلاين اۋدارىم سەكىلدى فينتەح-سەرۆيستەردىڭ دە داۋرەنى ءجۇردى. بۇل رەتتە Kaspi بانكتى اتاپ وتۋگە بولادى. وتكەن جىلى ءدال وسى قوسىمشاعا دەگەن سۇرانىس تا ەرەكشە ارتتى.

– Kaspi بانك ەمەس، ءىت-كومپانياعا اينالعانداي اسەر قالدىرىپ كەلەدى. قازاقستان حالقىنىڭ 41،49 پايىزى Kaspi قوسىمشاسىن اي سايىن تۇراقتى تۇردە قولدانادى. بۇل دەگەنىمىز – 7،8 ملن ادام. Kaspi-ءدى رەسەيدىڭ «تينكوفف» بانكىمەن سالىستىرىپ كورەلىك. كورشى ەلدىڭ نارىعىنداعى 146،7 ملن كليەنتتىڭ تەك 6 ملن عانا «تينكوفف»-تىڭ يگىلىگىن كورىپ وتىر. ماسەلەن، «ياندەكس» كومپانياسى «تينكوفف»-تى 5،48 ملرد دوللارعا ساتىپ العىسى كەلدى، ال Kaspi-ءدىڭ لوندون بيرجاسىنداعى ءىرو-سى 6،5 ملرد دوللارعا باعالاندى. قازاقستاندىق Kaspi-ءدىڭ قانداي قۋاتقا يە ەكەنىن وسىدان-اق اڭعارۋعا بولادى، – دەيدى ساراپشى.

سونداي-اق بىلتىر ونلاين وقۋ قارقىن الدى. ادامدار مۇنىڭ قانشالىقتى ءتيىمدى ەكەنىن ءتۇسىندى. قازاقستاندىقتاردىڭ ومىرىندەگى ۇلكەن وزگەرىستەردىڭ ءبىرى سول بولدى.

– قازاقستاننىڭ پاندەميا باستالعان كەزدە ءبىلىم بەرۋ جۇيەسىن ونلاين فورماتقا كوشىرۋى ساتسىزدىككە ۇشىرادى دەپ ايتۋعا بولادى. دەسە دە، جۇيەنى رەتتەپ، قالپىنا كەلتىرۋگە مۇمكىندىك تۋدى. قازىر ونلاين وقۋ ۇزدىكسىز ءجۇرىپ جاتىر. اتاپ وتەرلىگى، پاندەميانىڭ ناتيجەسىندە مەكتەپتەر مەن ۋنيۆەرسيتەتتەردە ءبىلىم الۋعا ارنالعان وتاندىق پلاتفورمالار پايدا بولدى. مەن ماتەريالداردى تسيفرلاندىرۋعا نازار اۋدارار ەدىم. ويتكەنى وقۋ كونفەرەنتسيا بايلانىسى ەمەس قوي. بۇل جەردە كىتاپتار، ماتەريالدار، بازانىڭ ءوزى جانە وقىتۋ ادىستەمەسى تسيفرلاندىرىلۋى كەرەك، – دەيدى ول.

جاساندى ينتەلەكت جەر-جاھاندى جاۋلاپ كەلەدى. الايدا ازىرگە قازاقستانعا ءتىسى باتار ەمەس. ە.ءماشيردىڭ ايتۋىنشا، ءبىزدىڭ ەلدە بۇل باعىتتاعى ورنى مىقتى ويىنشىلارمەن ءالى تولىعا قويعان جوق.

– بەلسەندى دامىپ كەلە جاتقان ستارتاپتارعا جانە شەتەلدىك ويىنشىلاردىڭ نارىققا كىرۋىنە قاراماستان، كەيبىر ماڭىزدى وزگەرىستەر تەك ءىرى كورپوراتسيالاردا عانا ورىن الۋدا، – دەيدى ءىت جانە يننوۆاتسيا سالاسىنداعى ساراپشى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز