ايماقتار • 12 اقپان، 2021

«قىزىل ايماق» قاۋپى سەيىلمەي تۇر

12 رەت كورسەتىلدى

پاۆلودار وڭىرىندە ىندەت جۇقتىرىپ، جانساقتاۋ بولىمىندە جاتقان 26 ادامنىڭ جاعدايى اۋىر. وتكەن اپتادا وبلىستا 8 ناۋقاس كوز جۇمعان. بۇل جايىندا ەپيدەميولوگيالىق احۋال تۋرالى وتكەن ونلاين-ءباسپاسوز جيىنىندا وبلىستىق دەنساۋلىق ساقتاۋ باسقارماسىنىڭ ءبولىم باسشىسى ەرعالى اسىلبەك ءمالىم ەتتى.

– قازىر وبلىسىمىزدىڭ ءار اۋدانىنان كۇن سايىن ىندەت جۇقتىرعاندار انىقتالۋدا. ال سوڭعى تاۋلىكتە پاۆلودار، شارباقتى، ۋسپەن اۋداندارىندا عانا انىقتالمادى. وسى كۇندەرى اراسىندا 4 جۇكتى ايەل، 15 بالا بار، 612 ناۋقاس ستاتسيوناردا ەمدەلۋدە، 10 ادام وكپەنى جاساندى جەلدەتۋ اپپاراتىنا قوسىلعان. ينفەكتسيالىق ستاتسيونارلاردىڭ جۇكتەمەسى 35 پايىزدى قۇرايدى، – دەدى ە.اسىلبەك.

بۇگىنگە دەيىن وبلىستا 15 787 ادامنان ىندەت انىقتالسا، 14 450 ناۋقاس جازىلىپ شىققان، 107 ادام كوز جۇمدى. بيىلعى جىل باسىنان بەرى 6 656 ادام ىندەت جۇقتىرعان. ولاردىڭ 2500-دەن استامى ۇيلەرىندە ەم قابىلداۋدا. رەسەيمەن شەكارالاس جەلەزين، شارباقتى، ۋسپەن، ەرتىس اۋداندارىندا بەكەتتەردەن وتكەندەرگە ارنالعان ستاتسيونارلار جۇمىس ىستەيدى. بەكەتتەردە دە 6 ناۋقاس ەمدەلۋدە. جىل باسىنان بەرى جەلەزين اۋدانىنىڭ 293 تۇرعىنى اۋىرعان.

– قايتىس بولعاندار – ديسپانسەرلىك ەسەپتە تۇرعان قارت ادامدار. جىل باسىنان بەرى 20 ءولىم تىركەلدى. ولاردىڭ اراسىندا ەڭ جاسى – 51-دە، 2700-دەن استام ادام كۆي بەلگىسى بار پنەۆمونياعا شالدىققان. قازىرگى ۋاقىتا 88 ادام ەم قابىلداۋدا، – دەدى ە.اسىلبەك.

ونىڭ ايتۋىنشا، وبلىستا ىندەت جۇق­تى­رۋ­دىڭ كوبەيۋ سەبەبىنە كەلسەك، كۇز كەزىندە ىندەت تارالۋ جاعدايى تۇراقتى بولدى. جۇق­تىرۋشىلار سانى دا ازايدى. بىراق رەسەيمەن شەكارا اشىق بولدى. ەكىنشىدەن، جاڭا جىلدىق مەرەكە كەزىندە ساۋدا ۇيلەرى جۇمىس ىستەدى. ىندەت انىقتالعان ادام كەمىندە 2-3 اداممەن ارالاسادى. ياعني اۋرۋ تاراۋ مۇمكىندىگى جوعارى. سوندىقتان كۇزگى جانە جاڭا جىلدىق كەزەڭدەردىڭ سالدارى ءالى جالعاسۋدا.

جالپى، وڭىردە 810 ادام كوروناۆيرۋسقا قارسى ۆاكتسينا قابىلداعان. ەكپە ەگۋدىڭ ءبىرىنشى كەزەڭى 19 اقپاندا اياقتالادى.

 

پاۆلودار وبلىسى

 

سوڭعى جاڭالىقتار

تاميلانىڭ تارتۋى

ونەر • كەشە

مۋتاتسيالانعان ۆيرۋس

مەديتسينا • كەشە

ۇقساس جاڭالىقتار