وقيعا • 09 اقپان، 2021

«Police 102» جەدەل جەتەدى

13 رەت كورسەتىلدى

بيىلعى 1 اقپانىنان باستاپ ىشكى ىستەر مينيسترلىگى «Police 102» موبيلدىك قوسىمشاسىن ىسكە قوستى. پرەزيدەنتتىڭ «حالىق ۇنىنە قۇلاق اساتىن مەملەكەت» تۇجىرىمداماسى اياسىندا قولعا الىنعان بۇل جۇيە ارقىلى ەندى ءوڭىر تۇرعىندارى ءاربىر قۇقىق بۇزۋشىلىق تۋرالى وسى قوسىمشاعا جولداي الادى. سونىمەن قاتار وپەراتورمەن اۋديو جانە بەينەقوڭىراۋ ارقىلى بايلانىسقا شىعادى.

فاريدا بىقاي

وبلىستىق پوليتسيا دەپارتامەنتىنىڭ مالىمەتىنشە، قازىر «Police 102» ءموبيلدى قوسىمشاسى پاۆلودار، ەكىباستۇز، اقسۋ قالالارىندا جۇمىس ىستەيدى. جىل سوڭىنا دەيىن بارلىق اۋدان ورتالىقتارىندا ىسكە قوسىلادى. تسيفرلى قوسىمشانىڭ مىندەتى – پوليتسيانى حالىققا ەتەنە جانە قولجەتىمدى ەتۋ.

مىسالى، ۇساق قۇقىق بۇزۋشىلىقتار: كورشىلەر شۋ شىعارسا، پودەزدە شىلىم شەكسە، تۇنگى تىنىشتىقتى بۇزسا، جول اپاتى، قاراقشىلىق سىندى باسقا دا قىلمىستار ورىن السا، كۋاگەر وقيعا ورنىندا تۇرىپ، پوليتسەيمەن بايلانىسقا شىعادى. قوڭىراۋ تۇسكەن بويدا اتالعان ورىنعا قۇقىق قورعاۋ قىزمەتكەرلەرى جىبەرىلەدى. قوسىمشاداعى «SOS» دابىل نۇكتەسىن باسىپ، قوعامدىق ورىنداردا، جولدا، كوشەدە تىركەلگەن قىلمىس جونىندە پوليتسەيگە حابار بەرىپ، كومەك سۇراۋعا بولادى. ءموبيلدى قوسىمشا ۇيالى تەلەفونداعى «AppStore»، «PlayMarket» دۇكەندەرى ارقىلى تەگىن جۇكتەلەدى. ال «Police 102» ارقىلى تۇسكەن ءوتىنىشتى، اۋديو جانە بەينە قوڭىراۋدى جەدەل باسقارۋ ورتالىعىنىڭ ماماندارى قابىلدايدى. قىزمەتكەرلەر وقيعا ورنىنىڭ مەكەنجايىن سۇراپ، مامانداردى جىبەرەدى. ەگەر قىلمىس فاكتىلەرى تىركەلسە، جەدەل-تەرگەۋ قىزمەتىنىڭ ماماندارى بارادى. تۇرعىندار قۇقىق بۇزۋشىلىقتىڭ كۋاگەرى بولعان جاعدايدا عانا بايلانىسقا شىعادى. مۇنداعى ماقسات – قوعامدىق ءتارتىپتى ساقتاۋدا تۇرعىندار مەن قۇقىق قورعاۋ قىزمەتكەرلەرىنىڭ ورتاق مۇددە ورايىندا جۇمىلا ارەكەت ەتۋىن قامتاماسىز ەتۋ.

ماسەلەن، «Police 102» قوسىلعان العاشقى كۇنى-اق، 3 اقپاندا ساعات 10.45-تە پوليتسياعا قوسىمشا ارقىلى بەينە قوڭىراۋ كەلىپ تۇسكەن. وبلىس ورتالىعىندا ق.ساتباەۆ كوشەسىندەگى ساۋدا ۇيلەرىنىڭ ءبىرىنىڭ جانىندا كولىك دۇرىس تۇراققا قويىلماعانىنا شاعىمدانعان. ۇساق قۇقىق بۇزۋشىلىقتى حابارلاعان ادام بۇل جايدى وپەراتورعا كورسەتتى. وقيعا ورنىنا كەلگەن پاترۋلدىك پوليتسيا اۆتوكولىك يەسىنە قاتىستى اقبك-ءنىڭ 597-بابى بويىنشا اكىمشىلىك ءىس قوزعاعان.

سونداي-اق «ەرتىس-4» پيك توراعاسى سەرگەي استاپۋششەنكو قالاداعى كوپ قاباتتى ۇيلەردىڭ ءبىرىنىڭ تۇرعىنى كىرەبەرىستىڭ جانىندا قوقىس پەن كارتون قوراپتاردى جيناپ جاتقانىن حابارلاعان. تەلەفون ارقىلى كورسەتىلگەن مەكەنجايعا ۋچاسكەلىك پوليتسيا ينسپەكتورى جىبەرىلىپ، اقبك 505-بابىنىڭ 1-بولىگى بويىنشا قوعامدىق ءتارتىپتى بۇزۋشىعا قاتىستى اكىمشىلىك حاتتاما تولتىرادى. تاعى ءبىر بەينە قوڭىراۋ ءا.بەكتۇروۆ كوشەسىندە ورنالاسقان №111 ءۇيدىڭ تۇرعىنى جالعا بەرىلەتىن كورشى پاتەردە تۇنگى ۋاقىتتا شۋ شىعاتىنىنا شاعىمدانعان. تىنىشتىقتى بۇزعانى ءۇشىن جالعا الۋشى اكىمشىلىك جاۋاپكەرشىلىككە تارتىلدى.

ەلىمىزدەگى پوليتسيا سالاسىن تسيفرلاندىرۋ – قۇقىقتىق ءتارتىپتى قورعاۋ جانە ازاماتتاردىڭ قاۋىپسىزدىگى مەن تىنىشتىعىن قامتاماسىز ەتۋدە جۇمىستى ساپالى جاڭا دەڭگەيگە جەتكىزەدى دەگەن ءسوز.

پاۆلودار وبلىسى