مەديتسينا • 03 اقپان، 2021

دارىگەرلىك كومەك دەڭگەيىن ارتتىرادى

75 رەت كورسەتىلدى

«جۇمىسپەن قامتۋدىڭ جول كارتاسى» باعدارلاماسى بارىسىندا جۇزەگە اسىرىلعان جوبالاردىڭ ءبىرى – وبلىس ورتالىعىنداعى №1 قالالىق اۋرۋحاناعا قوسىمشا سالىنعان جەدەل دارىگەرلىك كو­مەك كورسەتەتىن بولىمشە بول­سا، ەكىنشىسى – وبلىستىق كار­ديو­لوگ­يالىق كەشەننىڭ ينسۋلت ورتا­لىعى ناۋقاستاردى قابىل­داۋعا ءازىر.

سۋرەتتى تۇسىرگەن ۆالەري بۋگاەۆ

 

– بۇل بولىمشەنىڭ نەگىزگى مىندەتى – ناۋقاستاردى قابىلداۋ، دياگنوستيكا جاساۋ جانە جەدەل كومەك كورسەتۋ. بىلتىر جەدەل مەديتسينالىق كومەك الۋ بويىنشا ءبىزدىڭ اۋرۋحاناعا 62 مىڭ ادام ءتۇستى. ناۋقاستاردىڭ 16،5 مىڭى اۋرۋحانادا ەمدەلسە، قال­عان ناۋ­قاستار امبۋلاتورلىق ەم قابىل­داۋعا جىبەرىلدى. ارينە، ناۋقاستار دەنساۋلىق جاعدايلارىنا بايلانىس­تى «قىزىل»، «سارى» جانە «جاسىل» ساناتقا بولىنەدى. جاڭا بولىمشە عي­ما­راتىنىڭ قوسىمشا سالىنۋى ار­قىلى ەمدەلۋشىلەردىڭ قاي توپقا قاراي­تىنى بىرنەشە مينۋتتىڭ ىشىندە انىق­تالىپ، ءتيىستى باعىت بويىن­شا ەمدەۋگە جىبەرىلەدى، – دەيدى №1 قالالىق اۋرۋ­حا­نانىڭ باس دارىگەرى نۇرلان جۇماجانوۆ.

1979 جىلى سالىنعان اۋرۋحانا عيماراتىندا مەديتسينانىڭ زاماناۋي تالاپتارىنا ساي ناۋقاستاردى قابىلداۋ ءبولىمىن قايتا قۇرۋ تۋرالى شەشىم قابىلداندى. بۇل جوبا­نىڭ قۇنى – 2،4 ملرد تەڭگە، ونىڭ 1،8 ملرد تەڭگەسىنە مەديتسينالىق قۇ­­رال-جابدىقتار ساتىپ الىنعان. بو­لىم­شەدەگى وپەراتسيالىق بولمەلەر ەندوس­كوپيالىق جانە ءمو­بيلدى دياگ­نوس­تيكالىق قۇرالدارمەن جابدىق­تالعان. وندا رەانيماتسيالىق زال، وپە­راتسيالىق بلوك، تازا بولمەلەر كەشەنى بار. رەانيماتولوگتىڭ جۇمىس ستانساسى ونلاين رەجىمدە بىردەن 16 ناۋقاستىڭ دەنساۋلىعىن كورسەتىپ، ولاردىڭ جاعدايىن قاداعالاۋعا مۇم­كىندىك بەرەدى. قارقىندى تەراپيا بول­مەسى وكپەنى جاساندى جەلدەتۋ اپ­پارات­تارى، دەفيبريللياتورلار، مونيتورلار جانە جىلجىمالى باقىلاۋ اپپاراتتارىمەن جابدىقتالعان. تاعى ءبىر جاڭا جابدىق – قۋاتتىلىعى ساعا­تىنا 60 تەست جاساي الاتىن يم­مۋ­نوگەماتولوگيالىق اناليزاتور ورنا­تىلعان.

– شۇعىل كومەك كورسەتۋدى قا­جەت ەتپەيتىن «جاسىل» توپتاعى ناۋ­قاس­­تار ءۇشىن جەكە كىرۋ ەسىگى قاراس­تىرىل­عان. ءبىزدىڭ قىزمەتكەرلەر جاڭا جابدىق­تارمەن جۇمىس ىستەۋگە تولىق دا­يىن، رەانيماتسيا، كەڭەيتىلگەن جۇرەك-وكپە رەانيماتسياسى، جارا­قاتتانۋ كەزىندە اۋرۋحاناعا دەيىنگى مەديتسي­نالىق كومەك كورسەتۋ كۋرستارىنان ءوتتى، – دەيدى باس دارىگەر.

الداعى ۋاقىتتا ناۋقاستاردى قابىل­داۋ جانە ولارعا كومەك كورسەتۋ مەر­زىمدەرى رەتتەلەدى. قوسىمشا بو­لىم­شەنىڭ اشىلۋىنا قاتىسقان وبلىس اكىمى ابىلقايىر ىسقاقوۆ ناۋ­قاستاردى قابىلداۋ جانە ولارعا كو­مەك كورسەتۋ مەرزىمدەرىنىڭ ورىندا­لۋىنا ۇنەمى مونيتورينگ جۇرگىزۋ قاجەتتىگىن تاپسىردى. «سوندا عانا مە­ديتسينالىق ينفراقۇرىلىمعا سالىن­عان ينۆەستيتسيانىڭ ناتيجەسى بولادى. ەڭ باستىسى، اۋرۋحاناعا تۇسكەن ناۋقاس بارلىق قاجەتتى مەديتسينالىق كومەكتى الۋى ءتيىس، – دەدى وبلىس اكىمى.

ال وبلىستىق كارديولوگيالىق كەشەن جانىنداعى ينسۋلت ورتالىعى رەنتگەن-ەندوۆاسكۋليارلىق حيرۋرگيا زەرتحاناسىن جانە ستەريلدەۋ بولىم­شەسىن قايتا جوسپارلاۋ ناتيجەسىندە قۇرىلدى. مۇندا وپەراتسيادان كەيىنگى جانە اۋىر جاعدايداعى ناۋقاستار ءۇشىن قارقىندى تەراپيا ءبولىمى، سونداي-اق كومپيۋتەرلىك توموگرافيا كابينەتى جانە رەنتگەن-وپەراتسيالىق بولمەلەرى بار. ونىڭ بارلىعى دا جەدەل جانە ءبىر جەردە كومەك كورسەتۋگە مۇمكىندىك بەرەتىن زاماناۋي مەديتسينالىق جاب­دىقتارمەن قامتىلعان.

– جىل سايىن وڭىردە ينسۋلت­كە شالدىعاتىن ناۋقاستاردىڭ كو­بەيۋىنە بايلانىستى وسى ورتالىققا قا­جەتتىلىك تۋىندادى. تەك وتكەن جىلى 2،5 مىڭعا جۋىق ادام ينسۋلت العان. ەندى جاڭا اشىلعان ءبولىم العاشقى دياگنوستيكانى 7 مينۋتتا انىقتاۋعا مۇمكىندىك بەرەدى، – دەيدى كارديوورتالىق باسشىسى ءادىلجان ءالبازاروۆ.

الداعى جىلى كارديولوگيالىق ورتالىقتى تولىققاندى كلينيكالىق-دياگنوستيكالىق كەشەنگە اينالدىرۋ جوسپارلانۋدا. بۇل وپەراتسيا جاساۋدى قاجەت ەتەتىن قانتامىر اۋرۋلارى بار ناۋقاستار سانىن ەداۋىر ازايتۋعا مۇمكىندىك بەرەدى. جوبالار بارىسىندا بۇگىندە ورتالىقتا جۇرەككە جىلىنا 600-گە جۋىق اشىق وپەراتسيا جاسالىپ كەلسە، بولاشاقتا بۇل كورسەتكىشتى دارىگەرلەر 1 مىڭعا دەيىن جەتكىزبەك.

 

پاۆلودار وبلىسى

 

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار