پارلامەنت • 03 اقپان، 2021

پرەزيدەنت جۇكتەگەن مىندەتتەر قالاي جۇزەگە اسادى؟

31 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا پرەزيدەنت قاسىم-جومارت توقاەۆتىڭ بيىلعى 26 قاڭتاردا ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ جونىندەگى شارالار قارالدى.

 

اپاتتىق جانە ءۇش اۋىسىمدى مەكتەپتەر تولىعىمەن جويىلادى

بۇل جونىندە بايانداما جاساعان ۇلتتىق ەكونوميكا ءمينيسترى اسەت ەرعاليەۆ پرەزيدەنت تاپسىرمالارىن ىسكە اسىرۋ ءۇشىن جاڭا ءىس-شارالار توپتاماسى ازىرلەنىپ جاتقانىن ايتتى. وسى بويىنشا «حالىق ۇنىنە قۇلاق اساتىن مەملەكەت» تۇجىرىمداماسىن تولىققاندى ىسكە اسىرا وتىرىپ، مەملەكەتتىك باسقارۋدىڭ قازىرگى زامانعى مودەلىن قۇرۋ جونىندەگى ناقتى شارالار جۇزەگە اسىرىلماق. ناتيجەسىندە، 2025 جىلعا قاراي قازاقستان «قوعامدىق ءتارتىپ جانە قاۋىپسىزدىك» رەيتينگىندە توپ-30-عا كىرەدى; مەملەكەتتىك اپپارات پەن مەملەكەتتىك سەكتور سانى 25%-عا قىسقارادى; بارلىق مەملەكەتتىك قىزمەتتى ەلەكتروندى فورماتتا الۋعا بولادى. الەۋمەتتىك بلوك شەڭبەرىندە دەنساۋلىق ساقتاۋدى قارجىلاندىرۋ ىشكى جالپى ءونىمنىڭ 5%-ىنا دەيىن ۇلعايتىلادى; 3 جاستان 6 جاسقا دەيىنگى بالالار مەكتەپكە دەيىنگى تاربيەمەن جانە وقىتۋمەن 100% قامتىلادى، اپاتتىق جانە ءۇش اۋى­سىمدى مەكتەپتەر 100%-عا جويىلادى; ارتىقشىلىعى بار اكادەميالىق 20 ورتالىق قۇرىلادى; جىل سايىن 700 مىڭ ازامات جۇمىسپەن قامتۋدىڭ بەلسەندى تۇرلەرىمەن قامتاماسىز ەتىلەدى.

«ەكونوميكالىق بلوك شەڭبەرىندە سىرتقى نارىقتارعا باعدارلانعان ءوزىن-ءوزى قامتاماسىز ەتەتىن ەكونوميكانى دامىتۋ جونىندەگى شارالاردى ىسكە اسىرۋ 2025 جىلعا قاراي وڭدەۋشى ونەركاسىپ ءونىمىنىڭ كولەمىن 1،5 ەسە، اوك ەكسپورتىنداعى قايتا وڭدەلگەن ءونىمنىڭ ۇلەسىن 70%-عا دەيىن ۇلعايتىپ، 350 مىڭ فەرمەرلىك جانە ءۇي شارۋاشىلىقتارىن تارتا وتىرىپ، اۋىل شارۋاشىلىعى ءونىمىن ءوندىرۋ جانە قايتا وڭدەۋ جونىندەگى 7 ءىرى ەكوجۇيەنى قۇرۋعا مۇمكىندىك بەرەدى»، دەدى مينيستر ءا.ەرعاليەۆ.

يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قازاق­ستاندا قۇرىلىس جوبالارىنىڭ جاڭا مەم­لە­كەتتىك بانكى ىسكە قوسىلاتىنىن ايتتى.

سونداي-اق پرەزيدەنتتىڭ «بەكىتىلگەن ادىستەمەلەرگە سايكەس جەرگىلىكتى قامتۋ ۇلەسى بويىنشا مالىمدەلگەن سانداردى قايتا تەكسەرۋ» تاپسىرماسىن ورىنداۋ ءۇشىن وڭىرلەرگە كوشپەلى تەكسەرۋلەر ۇيىمداستىرىلماق. جۇمىس توبى جانە كوشپەلى تەكسەرۋلەر كەستەسى قۇرىلدى. توپ قۇرامىنا باس پروكۋراتۋرا، قارجى، ۇلت­تىق ەكونوميكا جانە ەنەرگەتيكا مينيس­تر­لىكتەرىنىڭ وكىلدەرى كىردى. «وتاندىق تاۋارلاردىڭ، جۇمىستار مەن قىزمەتتەردىڭ قولدانىلۋىن راستايتىن بارلىق كون­كۋرستىق قۇجاتتاردى تەكسەرۋدى جوسپارلاپ وتىرمىز. بۇگىنگى تاڭدا جەرگىلىكتى قامتۋ ۇلەسىنىڭ كورسەتكىشتەرى پاۆلودار، اقتوبە، باتىس قازاقستان جانە قوستاناي وبلىستارىندا تومەن بولىپ وتىر»، دەدى ول.

 

جەر عارىشتىق مونيتورينگ ارقىلى تەكسەرىلەدى

ب.اتامقۇلوۆتىڭ ايتۋىنشا، جۇمىس­پەن قامتۋ جول كارتاسى شەڭبەرىندە وڭىر­لەردە جالپى سوماسى 882،2 ملرد تەڭگەگە 6 491 جوبا ىسكە اسىرىلىپ جاتىر.

اۋىل شارۋاشىلىعى ءمينيسترى ساپارحان وماروۆ بايانداماسىندا مەم­لەكەت باسشىسىنىڭ تاپسىرماسى بويىن­شا مينيسترلىكتىڭ اوك-ءىن دامىتۋ جونىندەگى ۇلتتىق جوبانىڭ الداعى بەس جىلعا ار­نالعان تۇجىرىمداماسىن ازىر­لەپ جات­قانىن اتاپ ءوتتى. ءمينيستردىڭ ايتۋىن­شا، پايدالانىلماي جاتقان جايى­لىمدىق القاپتاردى قايتارۋ جونىندە 2019 جىلدىڭ سوڭىندا عارىشتىق مونيتورينگتى قولدانۋدىڭ زاڭنامالىق بازاسى قالىپتاستىرىلدى، 2020 جىلدىڭ باسىندا قاناتقاقتى جوبا 4 وبلىستا (اقمولا، شىعىس قازاقستان، قوستاناي جانە ماڭعىستاۋ وبلىستارى) ىسكە قوسىلدى. ناتيجەسىندە، پايدالانىلماي جاتقان 8،3 ملن گەكتار الاڭداعى اۋىل شارۋاشىلىعى جەرى، ونىڭ ىشىندە 7،6 ملن گەكتار جايىلىم، شامامەن 700 مىڭ گەكتار باسقا ساناتتاعى جەرلەر انىقتالدى. «كورسەتىلگەن وبلىستاردىڭ اكىمدىكتەرى پايدالانىلماي جاتقان جەرلەردى الىپ قويۋدى تەزدەتۋى جانە ولاردىڭ اۋىل شارۋاشىلىعى اينالىمىنا تارتىلۋىن قامتاماسىز ەتۋى قاجەت»، دەدى س.وماروۆ.

بيىلعى قاڭتاردان باستاپ رەسپۋب­ليكانىڭ بارلىق اۋماعىندا عارىشتىق مونيتورينگ قولدانىلادى. سونداي-اق پايدالانىلمايتىن اۋىل شارۋاشىلىعى جەرلەرىن الىپ قويۋ مەرزىمدەرىن 2 جىلدان 1 جىلعا دەيىن قىسقارتۋ، عارىشتىق مونيتورينگ دەرەكتەرى نەگىزىندە ولاردى سوت تارتىبىمەن قايتارۋ، حابارلامانى قاعاز جەتكىزگىشتەن SMS-حابارلاما ارقىلى ەلەكتروندى جەتكىزگىشپەن تاپسىرۋعا كوشىرۋ جونىندەگى زاڭ جوباسى ازىرلەندى، ونى قازىرگى ۋاقىتتا ۇكىمەت پىسىقتاۋدا. «وسىلايشا، قولدا جەرلەردى الىپ قويۋ تەتىكتەرى بار، مەملەكەت باسشىسىنىڭ تاپسىرماسىن ورىنداۋ ءۇشىن جەرگىلىكتى اتقارۋشى ورگاندار جەرگىلىكتى جەرلەردە ولاردى بارىنشا پايدالانۋ جونىندە شارالار قابىلداۋى قاجەت»، دەدى س.وماروۆ.

بيىل اۋىل شارۋاشىلىعى جەر­لەرىن شەتەلدىكتەرگە جالعا جانە قازاق­ستان­دىق­تارعا جەكە مەنشىككە بەرۋگە 2016 جىلى ەنگىزىلگەن موراتوري مەرزىمى اياقتا­لادى. مەملەكەت باسشىسى جەر كوميس­سياسىن قۇرىپ، قاراشاعا دەيىن جەر كو­دەكسىنە تۇزەتۋلەر قابىلداۋدى تاپسىردى. «جەر ماسەلەلەرى جونىندەگى ارنايى كو­ميسسيانى قۇرۋ جۇمىسى باستا­لىپ كەتتى، وعان بارلىق مۇددەلى تاراپتار، ونىڭ ىشىندە ءماجىلىس پەن سەنات دەپۋتاتتارى، اگروبيزنەستىڭ، وداقتار مەن قاۋىمداستىقتاردىڭ، «اتامەكەن» ۇلتتىق كاسىپكەرلەر پالاتاسىنىڭ، وبلىستار اكىمدىكتەرىنىڭ وكىلدەرى جانە باسقالار كىرەدى»، دەدى س.وماروۆ. 

جەر كوميسسياسىنىڭ جۇمىسى جانە ۇسىنىلعان پىكىرلەردى تالقىلاۋ قورىتىندىسىندا اۋىل شارۋاشىلىعى ماقساتىنداعى جەرلەردى اينالىمعا ەنگىزۋ بويىنشا بىرىڭعاي تۇجىرىمدامالىق تاسىلدەمەلەر ازىرلەنىپ، ولار جاڭا زاڭ جوباسىنىڭ نەگىزىن قۇرايتىن بولادى. اتالعان زاڭ جوباسىن ازىرلەۋ ۇكىمەتتىڭ زاڭ جوبالاۋ جۇمىستارىنىڭ 2021 جىلعا ارنالعان جوسپارىندا كوزدەلدى.

 

بيىل موبيلدىك وپەراتورلار 752 بازالىق ستانسا سالادى

تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين اتاپ وتكەندەي، مەملەكەت باسشىسى ق.توقاەۆتىڭ ۇكىمەتتىڭ كەڭەيتىلگەن وتىرىسىندا بەرگەن بارلىق تاپسىرمالارى ەرەكشە باقىلاۋعا الىنىپ، بەلسەندى جۇمىس باستالدى. وتكەن جىلى 1 250 اۋىل ءۇشىن وپتيكالىق بايلانىس جەلىسىنىڭ ينفراقۇرىلىمدىق جوباسى اياقتالدى. 928 اۋىل ءموبيلدى ينتەرنەتپەن قامتاماسىز ەتىلدى. وسىلايشا، 5 330 اۋىل ءموبيلدى ينتەرنەتپەن قامتىلدى. رەۆيزيا جۇرگىزىلدى، 510 اۋىلدا ينتەرنەت جىلدامدىعىنا قاتىستى ماسەلە قالىپ وتىر. 2021 جىلى مينيسترلىك بايلانىس ساپاسىن جاقسارتۋ بويىنشا جۇمىس جۇرگىزەدى. ەكى جىلدىڭ ىشىندە 286 اۋىل 3G/4G ستاندارتتارىنا اۋىستىرىلادى. 224 اۋىل جەرسەرىكتىك ترانسميسسيادان جەرۇستى ينفراقۇرىلىمىنا كوشىرىلەدى. 250 ادامنان كەم 242 اۋىل­عا كەڭ جولاقتى ءموبيلدى ينتەرنەت جەت­كى­زىلەدى. 2021 جىلى وپەراتورلار 752 بازالىق ستانسا سالادى، وعان قوسا، تاعى 562 ستانسانى جاڭارتادى.

پرەزيدەنت قاسىم-جومارت توقاەۆتىڭ ىشكى جانە سىرتقى ساۋدانى دامىتۋ بو­يىنشا تاپسىرمالارىن ىسكە اسىرۋ تۋرالى بايانداعان ساۋدا جانە ينتەگراتسيا ءمينيسترى باقىت سۇلتانوۆتىڭ ايتۋىنشا، وتكەن جىلعى 11%-دىق باعا ءوسىمى يمپورتقا تاۋەلدى جانە ەكسپورتقا باعدارلانعان نەگىزگى 5 تاۋارعا بايلانىستى بولدى، ولاردىڭ ۇلەسى  8،9% قۇرادى. باعانى تۇبەگەيلى تۇراقتاندىرۋ ءۇشىن مينيسترلىك بىرقاتار كەشەندى شارالاردى ۇسىنادى: بىرىنشىدەن، اكىمدىكتەر بۇل ماسەلەنى قاتاڭ باقىلاۋدا ۇستاۋى قاجەت. ەكىنشىدەن، اۋىل شارۋاشىلىعى تاۋارلارىنىڭ ءوندىرىسىن ۇلعايتۋ قاجەت. ۇشىنشىدەن، ساۋدانى تسيفر­لاندىرۋمەن قاتار ۇلتتىق تاۋار وتكى­زۋ جۇيەسىن ىسكە اسىرۋ كەرەك.  جالپى، 24 كو­تەرمە-تاراتۋ ورتالىعى سالىنادى. ونىڭ ىشىندە 2022 جىلى نۇر-سۇلتان، شىمكەنت، الماتى قالالارىندا جانە الماتى، جامبىل، پاۆلودار وبلىستارىندا 7 كوتەرمە-تاراتۋ ورتالىعى ىسكە قوسىلادى.

 

2025 جىلعا دەيىن 8 جاڭا سۋ قويماسى سالىنادى

ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ ايتۋىنشا، سۋ رەسۋرستارىن تسيفرلاندىرۋ، ەسەپكە الۋ جانە مونيتورينگىلەۋ ناتيجەسىندە 119 سۋ ارناسىندا تسيفر­لاندىرۋ جۇمىستارى جۇرگىزىلەدى. سو­نىمەن قاتار وزەن اعىنىنىڭ رەسۋرستارىن ايقىنداۋدىڭ اقپاراتتىق جۇيەسى قۇرىلادى، زاماناۋي سۋ ۇنەمدەگىش تەحنولوگيالار قولدانىلاتىن سۋارمالى جەردىڭ كولەمى 221 مىڭ گەكتاردان 420 گەكتارعا دەيىن ۇلعايادى. يرريگاتسيالىق جۇيەلەر مەن قۇرىلىستاردى قالپىنا كەلتىرۋ، جاڭا سۋ قويمالارىن سالۋ ناتيجەسىندە شامامەن 2 مىڭ شاقىرىم ماگيسترالدىق ارنا قايتا قۇرىلادى. ودان بولەك، جالپى كولەمى 885 ملن تەكشە مەتر بولاتىن جامبىل (3)، باتىس قازاقستان (2)، تۇركىستان (1)، الماتى (1) جانە قىزىلوردا وبلىستارىندا 8 جاڭا سۋ قويماسى سالىنادى. ال 2025-2030 جىلدار ىشىندە تاعى 31 سۋ قويماسى سالىنادى.

ەنەرگەتيكا ءمينيسترى نۇرلان نوعاەۆ 2025 جىلدىڭ سوڭىنا دەيىن 13 گەس نىسانىن ىسكە قوسۋدى جوسپارلانعانىن ايتتى.

ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆتىڭ  ايتۋىنشا، وسى جىلعا 27 مىڭ جۇمىس ورنىن قۇرا وتىرىپ، 331 ينفراقۇرىلىمدىق جوبانى ىسكە اسىرۋ جوسپارلانىپ وتىر، ونىڭ
40%-ى نەمەسە 10 مىڭنان استامى – تۇراقتى جۇمىس ورىنى.

 

ەكونوميكالىق ءوسىم ءۇش پايىزدان كەم بولماۋى ءتيىس

ماسەلەنى ۇكىمەت باسشىسى اسقار مامين قورىتىندىلادى. ونىڭ ايتۋىنشا، مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ىسكە اسىرۋ ماقساتىندا ەكونوميكالىق بەلسەندىلىكتى قولداۋ جانە حالىقتى جۇمىسپەن قامتاماسىز ەتۋ، سالىق جانە بيۋدجەت ساياساتىن جەتىلدىرۋ، تۇرعىن ءۇيدىڭ قولجەتىمدىلىگىن ارتتىرۋ، دەنساۋلىق ساقتاۋ، ءبىلىم بەرۋ جۇيەلەرىن دامىتۋ جانە ت.ب. جونىندەگى شارالار ازىرلەندى. ۇكىمەت اوك، مۇناي-گاز حيمياسىن، ەلەكتر ەنەرگەتيكاسىن، سۋ رەسۋرستارىن باسقارۋ، «جاسىل قازاقستان» ەكولوگياسىن جانە باسقا دا سالالاردى دامىتۋ جونىندەگى ۇلتتىق جوبالاردى ازىرلەيدى. «قۇرىلىمدىق جانە ىنتالاندىرۋ شارالارى حالىق پەن بيزنەستى جان-جاقتى قولداۋدى، ولاردىڭ جاڭا جاعدايلارعا بەيىمدەلۋىن، سونداي-اق ەكونوميكالىق بەلسەندىلىكتى جانداندىرۋدى قامتاماسىز ەتۋى ءتيىس. جاڭا شىنايىلىق جاعدايىندا شيكىزاتتىق ەمەس ەكسپورتتى پرواكتيۆتى ىلگەرىلەتۋگە جانە ينۆەستيتسيالاردى نىسانالى تارتۋعا باعدارلانعان ءوزىن-ءوزى قامتاماسىز ەتە الاتىن جانە ارتاراپتاندىرىلعان ەكونوميكانى دامىتۋعا نازار اۋدارۋىمىز قاجەت. شاعىن جانە ورتا بيزنەس ەكونوميكانى دامىتۋعا قارقىن بەرۋى ءتيىس»، دەدى ا.مامين.

ۇكىمەت باسشىسى دەنساۋلىق ساقتاۋ، ءبىلىم بەرۋ جۇيەلەرىن جانە ناتيجەلى جۇمىسپەن قامتۋدى دامىتۋ قاجەتتىگىنە ەرەكشە نازار اۋداردى. پرەمەر-مينيستر ۇكىمەتتىڭ 2021 جىلعى نەگىزگى ماقساتى – ەكونوميكالىق ءوسىمدى 3%-عا قامتاماسىز ەتۋ، نەگىزگى كاپيتالعا سالىناتىن ينۆەس­تيتسيالاردى ءىجو-ءنىڭ 20%-نا دەيىن جانە شاعىن جانە ورتا بيزنەس ۇلەسىن 30%-عا دەيىن ۇلعايتۋ، اۋىل شارۋاشىلىعىنداعى ەڭبەك ونىمدىلىگىن 1،4 ەسە ارتتىرۋ، وڭدەۋ ونەركاسىبىن 10%-عا ءوسىرۋ، جۇمىسسىزدىقتى 4،9%-عا دەيىن قىسقارتۋ ەكەنىن اتاپ ءوتتى.

ا.مامين ۇلتتىق ەكونوميكا مينيستر­لىگىنە ەكى كۇن مەرزىمدە پرەمەر-مينيستر كەڭسەسىنە پرەزيدەنتتىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ جونىندەگى جول كارتاسىنىڭ جوباسىن ەنگىزۋدى تاپسىردى. «باستى مىندەت – ازاماتتاردىڭ تۇرمىس ساپاسىن جاقسارتۋ جانە تابىسىن ارتتىرۋ. ۇلكەن جۇمىس ىستەۋ كەرەك، مەملەكەت باسشىسىنىڭ ءاربىر تاپسىرماسىن جەدەل ءارى ناتيجەلى تۇردە ورىنداۋ قاجەت»، دەدى پرەمەر-مينيستر.

 

رەفورمالاردىڭ جاڭا توپتاماسى قارالدى

ۇكىمەت وتىرىسىندا پرەزيدەنت قاسىم-جومارت توقاەۆتىڭ بيىلعى 29 قاڭتارداعى رەفورمالار جونىندەگى جوعارى كەڭەستىڭ ءۇشىنشى وتىرىسىندا بەرگەن تاپسىرمالارىن ورىنداۋ جو­نىن­دەگى شارالار قارالدى. بۇل ماسەلە تۋرالى ستراتەگيالىق جوسپارلاۋ جانە رەفور­مالار اگەنتتىگىنىڭ توراعاسى قايرات كەلىمبەتوۆ پەن ۇلتتىق ەكونوميكا ءمي­نيسترى اسەت ەرعاليەۆ بايانداما جاسادى.

ماسەلەنى ۇكىمەت باسشىسى اسقار مامين قورىتىندىلادى. ونىڭ ايتۋىنشا، مەملەكەتتىك جوسپارلاۋدىڭ جاڭا قۇرىلىمى ءۇش دەڭگەيدەن تۇراتىن بولادى. ءبىرىنشى دەڭگەيدەگى قۇجاتتار ەلدىڭ ۇزاق مەرزىمدى جانە ورتا مەرزىمدى كەزەڭدەگى دامۋ پايىمىن ايقىندايتىن بولادى. بۇلار –  «قازاقستان-2050» ستراتەگياسى، جالپىۇلتتىق باسىمدىقتار، ۇلتتىق دامۋ جوسپارى، ۇلتتىق قاۋىپسىزدىك ستراتەگياسى، اۋماقتىق دامۋ جوسپارى.

ەكىنشى دەڭگەيدەگى قۇجاتتار وڭىرارالىق جانە سالاارالىق ماسەلەلەر بويىنشا جۇرگىزىلەتىن ساياساتتى ايقىندايدى: بۇلار – سالالاردى دامىتۋ تۇجىرىمدامالارى مەن ۇلتتىق جوبالار.

ءۇشىنشى دەڭگەيدەگى قۇجاتتار مەملە­كەتتىك ورگانداردىڭ، وڭىرلەردىڭ جانە كۆا­زيمەملەكەتتىك ۇيىمداردىڭ دامۋ جوس­پارلارىن قامتيدى. جاپپاي تسيفرلاندىرۋ، ونىڭ ىشىندە Data Driven Government پلاتفورماسىن ەنگىزۋ ارقىلى جۇزەگە اسىرۋ مەملەكەتتىك باسقارۋ جۇيەسىن جاقسارتۋدىڭ نەگىزگى ەلەمەنتى بولادى.

ۇلتتىق حالىق ساناعى 2021 جىلعى قازاندا زاماناۋي تسيفرلى تەحنولوگيالاردى ەنگىزىپ، پروتسەستى اۆتوماتتاندىرۋ ارقىلى جۇرگىزىلەدى. ۇكىمەت باسشىسى بيىلعى 8 اقپانعا قاراي ەكونوميكالىق ءوسىمدى قالپىنا كەلتىرۋ جونىندەگى مەم­لەكەتتىك كوميسسيا وتىرىسىندا قاراۋ ءۇشىن ەكونو­ميكانىڭ ساپالى ءارى تۇراقتى ءوسۋىن قامتاماسىز ەتۋ بويىنشا شۇعىل شارالار پاكەتىن ەنگىزۋدى تاپسىردى. ۇلتتىق ەكونوميكا مينيسترلىگىنە ستراتەگيالىق جوسپارلاۋ جانە رەفورمالار جونىندەگى اگەنتتىكپەن بىرلەسىپ، ءبىر اپتا مەرزىمدە مەملەكەتتىك جوسپارلاۋ جۇيەسىنىڭ جوباسىن پىسىقتاۋ، 10 اقپانعا دەيىن جالپىۇلتتىق باسىمدىقتار مەن ەلدى دامىتۋدىڭ 2025 جىلعا دەيىنگى ۇلتتىق جوس­پارىن قابىلداۋ تۋرالى جار­لىق­تاردىڭ جوبالارىن ەنگىزۋدى قامتاماسىز ەتۋ، ءبىر اي مەرزىمدە ۇلتتىق جوبالاردىڭ ءتىزىمىن قالىپتاستىرۋ تاپسىرىلدى.

پرەمەر-مينيستر قارجى، ۇلتتىق ەكونوميكا مينيسترلىكتەرىنە جانە باسەكەلەستىكتى قورعاۋ اگەنتتىگىنە ەكى اپتا مەرزىمدە جەكەشەلەندىرۋدىڭ 2021-2025 جىلدارعا ارنالعان كەشەندى جوسپارىن ىسكە اسىرۋ جونىندەگى كەلىسىلگەن ۇسىنىستاردى ەنگىزۋدى تاپسىردى. ۇلتتىق ەكونوميكا مينيسترلىگىنە وزەكتەندىرىلگەن اۋماقتىق دامۋ جوسپارىنىڭ جوباسىن پرەمەر-ءمينيستردىڭ كەڭسەسىنە بيىلعى 1 ساۋىرگە دەيىن ەنگىزۋ مىندەتتەلدى. «رەفورمالاردىڭ جاڭا پاكەتى قىسقا مەرزىمدى پەرسپەكتيۆادا ەكونوميكانى قالپىنا كەلتىرۋگە نەگىزگى سايا­ساتتى جەدەل قايتا رەتتەۋدى قامتاماسىز ەتىپ، تۇراقتى ءارى ساپالى ەكونوميكالىق ءوسۋ تراەكتورياسىنا شىعۋعا جاعداي جاساۋى ءتيىس»، دەدى ا.مامين.

سوڭعى جاڭالىقتار

سپورتتى سەرىك ەتكەن

سپورت • بۇگىن، 09:02

سورەسىندە – سان كىتاپ

ادەبيەت • بۇگىن، 09:00

جۇلدىزدى ساتتەر جىلناماسى

ەلباسى • بۇگىن، 08:55

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار