«قازاقستان رەسپۋبليكاسىنىڭ حالىقارالىق شارتتارى تۋرالى» زاڭنامالىق تۇزەتۋلەر ماقۇلداندى

پارلامەنت • 20 قاڭتار، 2021

«قازاقستان رەسپۋبليكاسىنىڭ حالىقارالىق شارتتارى تۋرالى» زاڭنامالىق تۇزەتۋلەر ماقۇلداندى

6 رەت كورسەتىلدى

بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا دەپۋتاتتاردىڭ الداعى زاڭ شىعارۋ جۇمىسىنىڭ باسىمدىقتارى تۋرالى ايتىلىپ، بىرقاتار زاڭ جوبالارى ماقۇلداندى.

اقمارال اعزامقىزى

جيىندا ءماجىلىس توراعاسى كۇن تارتىبىنە كىرىسپەس بۇرىن VII شاقىرىلىمداعى I سەسسيانىڭ اشىلۋىندا مەملەكەت باسشىسى قاسىم-جومارت كەمەل ۇلى توقاەۆتىڭ دەپۋتاتتىق كورپۋسقا جۇكتەگەن ناقتى مىندەتتەرى تۋرالى ايتتى. نۇرلان نىعماتۋلين اتاپ وتكەندەي، VII شاقىرىلىم قازاقستان تاۋەلسىزدىگىنە 30 جىل، پارلامەنتتىڭ قۇرىلعانىنا 25 جىل تولاتىن ەرەكشە كەزەڭدە ءوز جۇمىسىن باستاپ وتىر.

وسىعان بايلانىستى، مەملەكەت باسشىسى سەسسيانىڭ اشىلۋىندا بۇگىنگى جەتكەن جەتىستىكتەرىمىزدى ساقتاپ، ودان ءارى دامىتۋ جولىنداعى جاڭا ماقساتتار تۋرالى ايتتى. ونىڭ ىشىندە، الەۋمەتتىك-ەكونوميكالىق، قۇقىقتىق، ساياسي باعىتتارعا باسا نازار اۋدارىلاتىنىن جەتكىزگەن ءماجىلىس توراعاسى:

-ولاردىڭ بارلىعىن ءتيىستى زاڭدارمەن قامتاماسىز ەتەتىن ول، ارينە، ءبىزدىڭ پارلامەنت. سول ءۇشىن مەملەكەت باسشىسى قاسىم-جومارت كەمەل ۇلى توقاەۆ سەسسيانىڭ اشىلۋىندا دەپۋتاتتاردان ساپالى زاڭدار تالاپ ەتەتىنىن ەرەكشە اتاپ ءوتتى. ول زاڭدار، ەڭ الدىمەن، حالىقتىڭ ءومىر ساپاسىن، ءبىلىم، دەنساۋلىق سالالارىن جاقسارتۋعا، الەۋمەتتىك قامتاماسىز ەتۋگە، شاعىن جانە ورتا بيزنەستى قولداۋعا ىقپال ەتۋگە ءتيىس. سوندىقتان، ءبىزدىڭ باستى ماقساتىمىز – جوسپارعا سايكەس، ءوز ۋاقىتىندا، حالىققا قاجەتتى، پايدالى زاڭدار قابىلداۋ، - دەدى نۇرلان نىعماتۋلين.

وتىرىس باراسىندا پالاتانىڭ كوميتەتتەرى بىرنەشە جاڭا جوبالارىن جۇمىسقا الدى. ولار: «ونەركاسىپتىك ساياسات تۋرالى»، «كۆازيمەملەكەتتىك سەكتوردىڭ جەكەلەگەن سۋبەكتىلەرىنىڭ ساتىپ الۋى تۋرالى» جانە «وسىمدىكتەر دۇنيەسى تۋرالى» زاڭدار جانە ولارعا ىلەسپە تۇزەتۋلەرىمەن، سونداي-اق، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اسكەري قىزمەت جانە ارناۋلى مەملەكەتتىك ورگاندار قىزمەتكەرلەرى مەن اسكەري قىزمەتشىلەردىڭ تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنتسياعا قورشاعان ورتاعا ترانسشەكارالىق تۇرعىدان جاسالاتىن اسەردى باعالاۋ جونىندەگى حاتتامانى راتيفيكاتسيالاۋ تۋرالى» زاڭ جوبالارى بار.

سونىمەن قاتار، وتىرىس بارىسىندا دەپۋتاتتار «قازاقستان رەسپۋبليكاسىنىڭ حالىقارالىق شارتتارى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋ ەنگىزۋ تۋرالى» زاڭ جوباسىن ماقۇلدادى. زاڭ جوباسىنىڭ نەگىزگى نورمالارى باسقا مەملەكەتتەر مەن حالىقارالىق ۇيىمدار حالىقارالىق شارتتاردى جاساۋ كەزىندە العان ءوز مىندەتتەمەلەرىن بۇزعان جاعدايدا، قازاقستان رەسپۋبليكاسىنىڭ وسى حالىقارالىق شارتتاردى ورىنداۋدى توقتاتا تۇرۋ نەمەسە قولدانىسىن توقتاتۋ تۇرىندە قارىمتا شارالار (قارسى شارالار) قابىلداۋىنا، راتيفيكاتسيالانعان حالىقارالىق شارتتاردىڭ قازاقستان رەسپۋبليكاسىنىڭ زاڭدارىنان باسىمدىعىن بەلگىلەۋگە جانە حالىقارالىق شارتتاردى ورىنداۋدى توقتاتا تۇرۋ نەمەسە قولدانىسىن توقتاتۋ تۋرالى اقپاراتتى قازاقستان رەسپۋبليكاسى سىرتقى ىستەر مينيسترلىگىنىڭ سايتىندا جاريالاۋعا باعىتتالعان.

زاڭ جوباسىمەن جۇمىس ىستەۋ بارىسىندا دەپۋتاتتار كۇشىنە ەنگەن، سونداي-اق ۋاقىتشا قولدانىلاتىن حالىقارالىق شارتتار تۋرالى اقپاراتتى سىرتقى ىستەر مينيسترلىگىنىڭ ينتەرنەت-رەسۋرسىندا جاريالاۋ بويىنشا دا تۇزەتۋلەر ەنگىزدى. جالپى وتىرىستا دەپۋتاتتار قازاقستان مەن كورەيا اراسىنداعى سوتتالعان ادامداردى بەرۋ تۋرالى راتيفيكاتسيالىق زاڭ جوباسىن ماقۇلدادى. وتىرىس سوڭىندا ءماجىلىس دەپۋتاتتارى مەملەكەتتىك ورگاندار باسشىلارىنا دەپۋتاتتىق ساۋالدار جولدادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز