قارجى • 18 قاڭتار، 2021

قاپەرگە الماعان قاتەرگە ۇرىنادى

96 رەت كورسەتىلدى

سوڭعى مالىمەتتەرگە سۇيەنسەك، كريپتوۆاليۋتالاردىڭ الەمدىك نارىعى 220 ملرد اقش دوللارىنا قۇلدىراعان. بۇعان بيتكويننىڭ 27 ساعات ىشىندە 10 مىڭ اقش دوللارىنا دەيىن قۇنسىزدانعانى سەبەپ. دەمەك كريپتوۆاليۋتانى تاۋەكەلى جوعارى ينۆەستيتسيالىق قۇرال دەپ ايتۋعا ابدەن بولادى.

 

كريپتوۆاليۋتا دەگەنىمىز – ين­تەر­­نەتتە ەسەپ ايىرىسۋ ءۇشىن پاي­دالاناتىن تسيفرلى اقشا­نىڭ ءتۇرى. بۇل ۆاليۋتانىڭ بىرلىگى – «coin». ول اعىلشىن تىلى­نەن اۋدارعاندا «مونەتا» دەگەن ما­عىنانى بىلدىرەدى. كريپتو­ۆاليۋ­­تا ەلەكتروندى تۇردە عانا قولدانىلادى. مۇنداي ۆيرتۋالدى اقشانىڭ نەگىزىندە ارنايى بلوك­چەين تەحنولوگياسى جاتىر.

كريپتوۆاليۋتالاردى ەميس­سيا­لاۋعا، ياعني اينالىمعا جاڭا مو­نەتالاردى شىعارۋعا قاتىستى شەكتەۋ قويىلعان. مونەتالار سانى بەلگىلى ءبىر شەككە جەتكەن كەزدە قاراجاتتىڭ ودان ارعى اينالىمى ۆاليۋتا باعاسىنىڭ ءوسۋى ەسەبىنەن عانا جۇرگىزىلەدى. ءدال وسى جاعدايدا الەۋەتتى ينۆەستورلار كريپتوۆاليۋتانى بيرجادا ساۋدا-ساتتىق جاساۋ ارقىلى پايدالانا باستايدى.

قارجى نارىعىن رەتتەۋ جانە دامىتۋ اگەنتتىگىنىڭ رەسمي مالى­مەتىن­شە، كريپتوۆاليۋتالاردى تو­لەم قۇرالى رەتىندە پايدالانۋ قازاقستاننىڭ زاڭناماسىنا قاي­­شى كەلەدى. قولدانىستاعى زاڭ­ناماعا سايكەس ەلىمىزدەگى تو­لەم قۇرالى – تەڭگە. سونداي-اق اق­شا­لاي مىندەتتەمەلەر ۇلتتىق ۆاليۋ­­تامەن عانا كورسەتىلۋى كەرەك. تيىسىنشە، كريپتوۆاليۋتا قا­زاق­­­ستاننىڭ قول­دا­نىستاعى زاڭ­نا­­ما­سىندا اقشا/ۆاليۋ­تا، قارجى قۇرالى رەتىن­دە قارال­مايدى جانە پاي­دالانىل­مايدى.

ساتىپ الۋ كەزىندە كريپتو­ۆاليۋ­­­تالاردىڭ قۇبىلمالى ءارى جاسى­رىن بولۋىنان، ناقتى اكتيۆ­تەر­مەن قامتاماسىز ەتىل­مەۋىنەن قا­راجاتتى جوعالتۋ تاۋەكەلى جو­عارى. سوعان قارا­ماس­تان، تسيفر­لى اقشاعا قىزى­عۋشىلىق تانىتاتىندار كوپ. ونىڭ باعاسى دا تەز شارىقتايدى. ونى باعاسى وسكەن كەزدە ينۆەستيتسيالاۋ پاي­­دالى بولسا دا، قاۋىپتى ەكەنىن ەستەن شىعارماعان ابزال. كوپ ين­ۆەس­­­­­تورلار وسىعان نازار اۋدارا بەر­­­مەي­دى.

الەمدەگى ەڭ تانىمال ءارى قىم­­­بات كريپتوۆاليۋتا – bitcoin. وعان كريپتوالتىن دەگەن بەيرەسمي مار­تەبە دە بەرىلگەن. بارلىق جاڭا ۆاليۋتا اۋەلدە بيتكوين بلوكچەينىنە نەگىزدەلەدى.

قارجى نارىعىن رەتتەۋ جانە دا­مىتۋ اگەنتتىگى اعىمدا­عى جاع­دايلارعا بايلانىستى وتاندىق ينۆەس­تورلاردىڭ شەتەلدىك نارىق­تاردا بيتكوينگە ينۆەستيتسيا سالۋى بىرقاتار تاۋەكەلگە الىپ كەلۋى مۇمكىن ەكەنىن ەسكەرتەدى.

بىرىنشىدەن، بيتكوين قازاق­ستان زاڭناماسى بويىنشا قارجى قۇرالى بولىپ ەسەپتەلمەيدى جانە ينۆەستيتسيالاۋ وبەكتىسى رە­تىن­دە مەملەكەتتىك رەتتەۋ اياسىنا كىر­مەيدى. تيىسىنشە، بيتكويندى ين­ۆەس­تيتسيالايتىن وتاندىق ينۆەس­تورلار مامىلەلەر، ەسەپ ايىرىسۋلار بارىسىندا تۋىنداعان پروبلەمالار مەن قولايسىز ستسەناريلەر كەزىندە جاۋاپكەرشىلىكتى وزدەرى عانا ارقالايدى. 

ەكىنشىدەن، بيتكويننىڭ با­عاسى وتە قۇبىلمالى. قۇبىل­ما­لىلىق­تىڭ بىردەن-ءبىر سەبەبى – باعا بەلگىلەۋدىڭ تۇبەگەيلى نەگىز­­دەرىنىڭ بولماۋى. سونداي-اق ونىڭ باعاسىنا نەگىزىنەن ينۆەس­تورلار تاراپىنان جاسالاتىن قادامدار ىقپال ەتەدى. ياعني ينۆەستورلاردىڭ جاپپاي دۇرلىگۋى، كىرىستىلىگى جوعارى ين­­­ۆەس­تيتسيالاۋدىڭ بالاما تا­سىلدەرىن ىزدەۋى بيتكوين با­­­عا­سىن قۇبىلتىپ وتىرادى. ما­سەلەن، 11 قاڭتار كۇنى تاڭەرتەڭ بيت­كوين باعامى ساۋدا-ساتتىق اشىل­عاننان كەيىن كۇرت تومەندەپ كەتتى. كريپتوۆاليۋتا 33،951 مىڭ اقش دوللارىنا دەيىن، ياعني 11،06 پايىزعا تومەندەدى. ال ءۇش كۇن بۇرىن بيتكويننىڭ قۇنى تاريحي شەگىن جاڭارتىپ، 41 مىڭ اقش دوللارىنا جەتكەن ەدى.

ۇشىنشىدەن، بيتكويندى الاياق­تار­دىڭ پايدالانۋ مۇمكىندىگى جوعارى. بيتكوينمەن ساۋدا-سات­تىق جۇرگىزۋ ءۇشىن سەنىمدى ءارى رەت­تەلەتىن الاڭداردىڭ بولماۋى الەۋەتتى ين­ۆەستورلارعا قاتىستى الاياقتىق ارە­كەتتەردىڭ جاسالۋى­نا جول اشادى. بۇل رەتتە، دەربەس جانە كارتوچكا دەرەكتەرىن، سونداي-اق اقشا قاراجاتىن جو­عالتىپ الۋ قاۋپى ءتونۋى مۇمكىن. الەمدىك تاجىريبەدە بىرنەشە رەت كريپتوۆاليۋتالىق پلاتفورمالار مەن بيرجالاردى بۇزۋ، قوماقتى قاراجاتتى ۇرلاۋ فاك­تىلەرى تىر­كەلگەن. ماسەلەن، 2018 جىلى كريپ­توۆاليۋتالاردى ۇر­لاۋ­دان كەلگەن زالال كولەمى 1،36 ملرد اقش دوللارىنان اسىپ تۇس­كەن.

سونىمەن قاتار كريپتوۆاليۋتالار اقشانى جىلىستاتۋ جانە تەرروريزمدى قارجىلاندىرۋعا قار­سى ءىس-قيمىل سالاسىنداعى رەتتەۋدى اينالىپ ءوتۋ ءۇشىن دە پايدالانىلۋى ىقتيمال. سون­دىقتان ينۆەس­تورلار بيتكوينمەن مامىلەلەر جا­ساۋ كەزىندە بارىنشا ساقتىق تانىتۋى ءتيىس. جەكە جانە زاڭدى تۇل­عالار كريپتوۆاليۋتامەن وپەراتسيا جۇرگىزگەندە تاۋەكەلگە باراتىنىن ۇمىتپاۋى كەرەك. ويتكەنى كريپتوۆاليۋتالارمەن جاسالاتىن كەز كەلگەن وپە­را­تسيانىڭ تاۋەكەلى جوعارى ءارى سالىنعان اقشانىڭ ساقتالۋىنا كەپىلدىك بەرىلمەيدى.

 

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

باعدات مۋسين شىمكەنتكە باردى

ايماقتار • 05 ناۋرىز، 2021

ۇقساس جاڭالىقتار