قازاقستان • 16 قاڭتار، 2021

مينيسترلىك قىزاناقتاردان ۆيرۋس تابىلدى دەگەن اقپاراتقا تۇسىنىكتەمە بەردى

27 رەت كورسەتىلدى

2020 جىلدىڭ جەلتوقسان ايىندا ۆەتەرينارلىق جانە فيتوسانيتارلىق قاداعالاۋ جونىندەگى فەدەرالدىق قىزمەت (روسسەلحوزنادزور) «Green Capital Kazakhstan»، «Green Land Alatau» جشس-ءنىڭ ونىمدەرىندە قىزاناق جەمىستەرىنىڭ قاۋىپتى ۆيرۋسى (Tomato brown rugose fruit virus نەمەسە ToBRFV) انىقتالعاندىعى جانە «Greenhouse-Qaztomat» جشس-گى وندىرەتىن قىزاناقتى الىپ كەلۋگە شەكتەۋ ەنگىزگەنى تۋرالى حابارلاما جىبەردى.

وسىعان بايلانىستى قر اشم اگروونەركاسىپتىك كەشەندەگى مەملەكەتتىك ينسپەكتسيا كوميتەتى شۇعىل تۇردە رەسمي تەكسەرۋ ۇيىمداستىردى.

وسىمدىكتەر كارانتينى جونىندەگى مەملەكەتتىك ينسپەكتورلار، سونداي-اق «فيتوسانيتاريا» رمك، «فيتوسانيتارلىق دياگنوستيكا جانە بولجامدار ادىستەمەلىك ورتالىعى» رمم جانە «رەسپۋبليكالىق وسىمدىكتەر كارانتينى ورتالىعى» مم ماماندارى پتر-تالداۋ جۇرگىزۋ ماقساتىندا سىنامالاردى الۋ ءۇشىن «Greenhouse-Qaztomat» جشس-دە كوميسسيالىق تەكسەرۋ جۇرگىزدى.

تالداۋ ءۇشىن رەسەي فەدەراتسياسىنىڭ «بۇكىلرەسەيلىك وسىمدىكتەر كارانتينى ورتالىعىنىڭ» جەدەل تەستتەرى قولدانىلدى. ىقتيمال قاتەلەر مەن كەلىسپەۋشىلىكتەردى بولدىرماۋ ءۇشىن زەرتحانالىق تالداۋ ادىستەرى رەسەيلىك ۇيىمنىڭ ماماندارىمەن بىرگە جاسالدى. ساراپتاما قورىتىندىسى بويىنشا «Greenhouse-Qaztomat» جشس ونىمدەرىندە ToBRFV ۆيرۋستارى انىقتالعان جوق.

سونداي-اق، وبەكتيۆتىلىك ءۇشىن كومپانيا ءوز باستاماسى بويىنشا ءونىمنىڭ سىنامالارىن «Groen Agro Control» تاۋەلسىز زەرتحاناسىنا (نيدەرلاندى) جىبەردى. قوسىمشا زەرتتەۋ ناتيجەلەرى بويىنشا جىلىجاي شارۋاشىلىعىندا ۆيرۋس انىقتالعان جوق.

وسىنداي كوميسسيالىق تەكسەرۋلەر «Green Capital Kazakhstan» جانە «Green Land Alatau» جىلىجاي شارۋاشىلىقتارىندا جۇرگىزىلدى. ول جەرلەردە دە ۆيرۋس انىقتالمادى.

رەسمي تەكسەرۋلەردىڭ ناتيجەلەرى ۆەتەرينارلىق جانە فيتوسانيتارلىق قاداعالاۋ جونىندەگى فەدەرالدىق قىزمەتكە حابارلاندى.

قر اشم اگروونەركاسىپتىك كەشەندەگى مەملەكەتتىك ينسپەكتسيا كوميتەتى روسسەلحوزنادزوردىڭ ءىس-ارەكەتى ەاەو تۋرالى شارتتىڭ تالاپتارىن ورەسكەل بۇزادى جانە جاساندى كەدەرگى بولىپ تابىلادى دەپ ەسەپتەيدى. وسىعان بايلانىستى اۋىل شارۋاشىلىعى مينيسترلىگى ەۋرازيالىق ەكونوميكالىق كوميسسياعا جۇگىنۋگە نيەتتى.

سونىمەن قاتار، قر اشم ۆيرۋستاردى انىقتاۋ فاكتىلەرىنىڭ دۇرىستىعىنا كۇمان كەلتىردى. سەبەبى، روسسەلحوزنادزوردىڭ سۆەردلوۆ رەفەرەنتتىك ورتالىعى 2020 جىلعى 11 جەلتوقساندا «Greenhouse Kazakhstan» جشس ءونىمى قاۋىپتى دەپ قورىتىندى بەرگەن. الايدا كومپانيا 24 جەلتوقساندا سول پارتيادان سىنامالاردى الىپ، «بۇكىلرەسەيلىك وسىمدىكتەر كارانتينى ورتالىعى» فمبم-ءنىڭ ورتالىق زەرتحاناسىندا قايتا ساراپتاما جۇرگىزۋدى تالاپ ەتكەننەن كەيىن، اتالمىش ءونىمنىڭ تازالىعىن راستايتىن قورىتىندى العان.

قازاقستاندىق قىزاناق پەن بۇرىش ونىمدەرى ۆيرۋس جۇقتىردى دەگەن اقپاراتقا بايلانىستى قر اشم اگروونەركاسىپتىك كەشەندەگى مەملەكەتتىك ينسپەكتسيا كوميتەتى ەلىمىزدىڭ بارلىق جىلىجاي شارۋاشىلىقتارىنا جانە رەسپۋبليكا اۋماعىنا الىپ كەلەتىن قىزاناقتارعا كەشەندى تەكسەرۋ ۇيىمداستىردى.

زەرتحانالىق سىناقتاردىڭ قورىتىندىسى بويىنشا جىلىجاي شارۋاشىلىقتارىندا ۆيرۋس انىقتالعان جوق.

دەسەكتە، 16 جاعدايدا ءازىربايجان رەسپۋبليكاسىنان الىپ كەلگەن قىزاناقتاردا ۆيرۋس انىقتالدى. قاۋىپتى ۆيرۋس جۇقتىرعان قىزاناق تيەلگەن  بارلىق كولىكتەر شەكارادا ۇستالىپ، جۇك ەكسپورتتاۋشى ەلگە قايتا قايتارىلدى.

سوڭعى جاڭالىقتار

ۇقساس جاڭالىقتار