قازاقستان • 12 قاڭتار، 2021

ءبىلىم بەرۋ تۋرالى زاڭعا قانداي وزگەرىستەر ەنگىزىلدى؟

75 رەت كورسەتىلدى

مەملەكەت باسشىسى زاڭعا قول قويىپ، ءبىلىم بەرۋ ماسەلەلەرى بويىنشا زاڭناماعا وزگەرىستەر مەن تولىقتىرۋلار ەنگىزىلدى. مينيستر اسحات ايماعامبەتوۆ زاڭعا قانداي وزگەرىستەر ەنگىزىلگەنىن ءتۇسىندىردى، - دەپ حابارلايدى Egemen.kz

«قازىر جالپى ەرەجەلەرگە توقتالىپ وتەيىن، كەيىن جوعارى سونداي-اق تەحنيكالىق جانە كاسىپتىك ءبىلىم بەرۋ دەڭگەيلەرىنە قاتىستى وزگەرىستەر تۋرالى بولەك جازاتىن بولامىن.

1. قابىلدانعان زاڭداعى ماڭىزدى نورمالاردىڭ ءبىرى – بالالارعا قوسىمشا ءبىلىم بەرۋ ءۇشىن مەملەكەتتىك تاپسىرىس ينستيتۋتىن ەنگىزۋ.
ول تۋرالى كەڭىنەن تارقاتىپ ايتقان بولاتىنمىن.
ەندى مەملەكەتتىك تاپسىرىس مەملەكەتتىك-جەكەمەنشىك ارىپتەستىك اياسىندا دا جەكەمەنشىك ۇيىمداردا ورنالاستىرىلاتىن بولادى.
بۇل مەملەكەت تاراپىنان ۇلكەن شىعىنداردى قاجەت ەتپەي-اق بالالاردىڭ سەكتسيالارعا، ۇيىرمەلەرگە جانە باسقا دا دامىتۋ ورتالىقتارىنا بارۋىنا قاتىستى ماسەلەلەردى كەزەڭ-كەزەڭىمەن شەشۋگە مۇمكىندىك بەرەدى.

2. بالاباقشالار، مەكتەپتەر مەن كوللەدجدەر مەملەكەتتىك اتتەستاتتاۋدان وتەتىن بولادى. ۇزاق ۋاقىت بويى تالقىلانعان نورما قابىلداندى. اتتەستاتتاۋ – سىرتقى مونيتورينگ جانە ءبىلىم بەرۋ ۇيىمدارىنىڭ بەلگىلەنگەن ستاندارتتار بويىنشا ورىنداعان جۇمىستارىن باعالايتىن قۇرال بولادى.

ەڭ باستىسى، اتتەستاتتاۋ تەك پروبلەمالاردى ايقىنداۋشى رەپرەسيۆتى قۇرال ەمەس، انىقتالعان پروبلەمالاردى جويۋعا باعىتتالعان ناقتى ۇسىنىستار بەرۋ تەتىگى بولىپ تابىلادى.

اتتەستاتتاۋ بەس جىلدا ءبىر رەت جۇرگىزىلەدى. ول ارقىلى ءبىلىم بەرۋ ۇيىمدارىندا بەرىلەتىن ءبىلىمنىڭ ساپاسى انىقتالىپ، اتا-انالار، وقۋشىلار مەن پەداگوگتەر اراسىندا ساۋالناما جۇرگىزىلەدى، ماتەريالدىق-تەحنيكالىق بازا، كادر قۇرامى جانە باسقا دا اسپەكتىلەر بويىنشا بەلگىلەنگەن تالاپتارعا سايكەستىگى باعالانادى.

3. ۇلگىلىك وقۋ جوسپارلارى مەن وقۋ باعدارلامالارى ءبىلىم بەرۋ پروتسەسىنە ەنگىزىلگەنگە دەيىن مىندەتتى تۇردە ساراپتامادان جانە اپروباتسيادان وتكىزىلەتىن بولادى.

ياعني ەندى وقۋ پروتسەسىنە جاڭا باعدارلامانى ەنگىزۋ ءۇشىن الدىمەن مىندەتتى تۇردە ساراپتاما، كەيىن اپروباتسيا جۇرگىزىلەدى. وسىلايشا ورىن الۋى مۇمكىن كەمشىلىكتەر انىقتالاتىن بولادى.

بۇل وتە ماڭىزدى نورما، جاڭا وقۋ باعدارلامالارىن ەنگىزۋگە بايلانىستى جۇمىستاردا اسىعىستىق جاساماۋ كەرەك.

ارينە، بۇل نورما مينيسترلىكتى شەكتەيدى، الايدا وسى ارقىلى جان-جاقتى ويلاستىرىلعان، عىلىمي نەگىزدەلگەن جانە سىنالعان باعدارلامالاردى ەنگىزۋدىڭ مەحانيزمى جۇمىس ىستەيتىن بولادى.

ودان بولەك، وقۋلىقتاردىڭ ساپاسىن ودان ءارى جاقسارتۋ، وقۋ ماتەريالدارىن ازىرلەۋ كەزىندە بىرىزدىلىكتى بەلگىلەۋ ءۇشىن مينيسترلىكتىڭ مەكتەپ وقۋلىقتارى جانە وقۋ-ادىستەمەلىك كەشەندەرىنىڭ قۇرىلىمى مەن مازمۇنىنا قويىلاتىن تالاپتاردى بەلگىلەۋ قۇزىرەتىن ايقىندايتىن تۇزەتۋ قابىلداندى. بۇل وقۋلىقتاردىڭ ساپاسىن ارتتىرۋعا باعىتتالعان ماڭىزدى نورما بولىپ تابىلادى.

4. مينيسترلىك ءبىلىم بەرۋ ۇيىمدارىنا الىپ كىرۋگە جانە وندا پايدالانۋعا تىيىم سالىناتىن زاتتاردىڭ ءتىزىمىن بەكىتەتىن بولادى. بۇل نورما وقۋ ورنىندا ءبىلىم الۋشىلاردىڭ قاۋىپسىزدىك تالاپتارىن ساقتاۋى ءۇشىن جانە الدىن الۋ شارالارىن كۇشەيتۋ ءۇشىن ەنگىزىلدى.

5. زاڭدا قاشىقتان ءبىلىم بەرۋگە قاتىستى جاڭا نورمالار پايدا بولدى. قاشىقتان وقىتۋ ۇعىمى جانە قاشىقتان وقىتۋدى ۇيىمداستىرۋ قاعيدالارىن بەكىتۋ جونىندەگى ۋاكىلەتتى ورگاننىڭ قۇزىرەتى بەكىتىلدى. قاشىقتان ءبىلىم بەرۋگە قاتىستى تالاپتار ايقىندالاتىن بولادى»، دەپ جازدى مينيستر.

سوڭعى جاڭالىقتار

اۋليە اتا ءھام ۇلى جىراۋ

رۋحانيات • كەشە

ۇقساس جاڭالىقتار