قوعام • 12 قاڭتار، 2021

مەكتەپكە م.الىمباەۆ ەسىمى بەرىلدى

22 رەت كورسەتىلدى

جاڭادان بوي كوتەرگەن مەكتەپ وبلىس ورتالىعىنىڭ ەسكىدەن كەلە جاتقان زاتون اتالاتىن شاعىن اۋدانىندا ورنالاسقان. اۋدان اۋماعىندا قازاق تىلىندە جانە ارالاس مەكتەپتەردە قازاق تىلىندە وقيتىن وقۋشىلار سانى جىل سايىن كوبەيىپ كەلەدى. سونىمەن بىرگە وسى اۋداندا تۇراتىن بىرقاتار اتا-انا بالاباقشادا ورىس تىلىندە تاربيە الىپ جاتقان بالالارىنا دا جاڭا مەكتەپتەن ورىن بەرىلۋىن سۇراپ وتىر.

سۋرەتتى تۇسىرگەن ۆالەري بۋگاەۆ

ايتا كەتەلىك، جاڭا مەكتەپ «زاماناۋي مەكتەپ» تۇجىرىمداماسى بويىنشا سالىنىپ، جابدىقتالدى. ءبىلىم ورداسىنىڭ قۇرىلىسىنا رەسپۋبليكالىق بيۋدجەتتەن 1 ملرد 158 ملن تەڭگە قارجى بولىنگەن. بىراق جوبالاۋ بارىسىندا ەسكى اۋماقتا تۇراتىن حالىقتىڭ ورنالاسۋى مەن جاڭا مەكتەپتىڭ قاجەتتىلىگى ناقتى زەرتتەلىپ، ەسكەرىلمەۋى تۇرعىنداردىڭ نارازىلىق بىلدىرۋىنە جانە ارالاس مەكتەپتىڭ اشىلۋىنا سەبەپ بولدى. جاڭا مەكتەپ №9، 24، 39 ارالاس ءتىلدى مەكتەپتەردىڭ جانە قازاق تىلىندە ءبىلىم بەرەتىن №25 مەكتەپتىڭ جۇكتەمەسىن ازايتۋ ءۇشىن مەملەكەتتىك تىلدە ءبىلىم بەرەدى. بىراق بۇل شەشىم وسى اۋدانداعى بالاباقشا عيماراتىندا ورىس تىلىندە وقيتىن بالالاردىڭ اتا-انالارى اراسىندا تۇسىنبەستىك تۋدىرىپ، داۋعا اينالدى. قالالىق ءبىلىم بەرۋ ءبولىمىنىڭ باسشىسى سامال ايتقازينا سوندىقتان قازىر جاڭا مەكتەپتىڭ جانىنان 250 ورىندىق قوسىمشا عيمارات سالىنىپ جاتقانىن جەتكىزدى. ەندى 600 وقۋشىعا ارنالعان جاڭا مەكتەپ ارالاس باعىتتا، ياعني قازاق جانە ورىس تىلىندە ءبىلىم بەرەدى.

مەكتەپتىڭ باستى ەرەكشەلىگى، ولكەتانۋ، تۋعان ەل مەن جەر تاريحىن وقىتۋعا باسىمدىق بەرىلگەن. قىزمەت ساپاسىن ءاردايىم باقىلاپ، جەتىلدىرىپ وتىرۋ ماقساتىندا ەلەكتروندى جوبالار ىسكە قوسىلدى. سونداي-اق سپورت زالى جابدىقتالدى.

– مىسالى، «ە-portfolio» ەلەكتروندى جۇيەسى ارقىلى ءار مۇعالىمنىڭ جۇمىسىن كورۋگە بولادى. اۆتوماتتاندىرىلعان «ە-kitaphana» جۇيەسى ارقىلى وقۋشى قاجەتتى ادەبيەتتەردى تاۋىپ الادى. اسحانادا ورناتىلعان «e-pit» قۇرىلعىسىنىڭ كومەگىمەن بالالار دايىندالعان تاعامنىڭ ساپاسىن باعالايدى. سونداي-اق كىتاپحانادا ءارتۇرلى باعىتتا پرەزەنتاتسيالار، كونفەرەنتسيالار جانە باسقا دا ءىس-شارالار وتكىزۋگە ارنالعان «سو-Working» ورتالىعى بار، – دەيدى ءبولىم باسشىسى.

جاڭا عيماراتقا كورنەكتى اقىن مۇزافار الىمباەۆ­تىڭ ەسىمى بەرىلدى. جەرلەسىمىز مۇزافار اتامىز –
«و، مارالدىم!»، «قۇسني قورلان» سياقتى عۇمىرلىق ولەڭ­دەردىڭ اۆتورى، «بالدىرعان» بالالار جۋرنالىنىڭ نەگىزىن قالاۋشى بەلگىلى قايراتكەر. مەكتەپ مۋزەيىندە مۇزافار اقىننىڭ ءومىرى مەن شىعارماشىلىعىنا ارنالعان قۇندى مالىمەتتەر جيناقتالعان.

سونداي-اق وبلىس ورتالىعىندا «زاماناۋي مەكتەپ» باعدارلاماسى بويىنشا №34 جانە №28 ورتا مەكتەپتەرگە دە كۇردەلى جوندەۋ جۇمىستارى جۇرگىزىلدى. ى.التىنسارين اتىنداعى دارىندى بالالارعا ارنالعان قازاق گيمنازيا-ينتەرناتىنا دا جاڭادان تاجىريبەلىك زەرتحانالار جاساقتالىپ، اۋىلدان كەلىپ وقيتىن وقۋشىلارعا ارنالعان جاتاقحاناسىنا جوندەۋ جۇمىستارى جۇرگىزىلدى، Stem كابينەتىمەن جابدىقتالدى. جاڭا مەكتەپتىڭ اشىلۋ راسىمىنە قاتىسقان وبلىس اكىمى ابىلقايىر سقاقوۆ ىندەتتىڭ بەتى قايتىپ، وقۋشىلاردىڭ جاڭا مەكتەپتەرىنە تەزىرەك ورالۋىنا تىلەكتەستىك ءبىلدىردى. ۇستازدار مەن وقۋشىلار بەينەكونفەرەنتسيا ارقىلى قۋانىشتى ءساتتىڭ كۋاسى بولدى.

 

پاۆلودار وبلىسى

 

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

باعدات مۋسين شىمكەنتكە باردى

ايماقتار • 05 ناۋرىز، 2021

ۇقساس جاڭالىقتار