تۇراقتىلىق ءۇشىن داۋىس بەردى

قوعام • 11 قاڭتار، 2021

تۇراقتىلىق ءۇشىن داۋىس بەردى

10 رەت كورسەتىلدى

جالپى، وبلىستىق اۋماقتىق سايلاۋ كوميسسياسىنىڭ مالىمەتىنشە، وڭىردە 532 سايلاۋ ۋچاسكەسى قۇرىلعان. ولاردىڭ 138-ءى پاۆلودار قالاسىندا، 65-ءى ەكىباستۇزدا، 40-ى اقسۋدا جانە 289-ى اۋدانداردا. سايلاۋ ۋچاسكەلەرىندە قوسىمشا ونلاين-سەرۆيس اشىلدى، ماقسات – ازاماتتاردىڭ تۇرعىلىقتى جەرى بويىنشا بەرىلگەن اقپاراتتى تەكسەرەدى.

فاريدا بىقاي

وبلىس ورتالىعىنداعى №59 سايلاۋ ۋچاسكەسى №1 مەكتەپتە ورنالاسقان. ەپيدەميالىق جاعدايعا بايلانىستى سايلاۋ ۋچاسكەلەرىندە سانيتارلىق قاۋىپسىزدىك ساقتالعان.

ءبىز دە ەرتەڭگىلىكتە كەلگەن كەزدە كورگەنىمىزدەي، سايلاۋشىلار وتباسىلارمەن بىرگە، ەرلى-زايىپتىلار، كورشىلەر، كارى-جاسى ارالاس قالا تۇرعىندارى كەلىپ، سايلاۋ ءتارتىبى بويىنشا داۋىستارىن بەردى.

– اياز دا باسىلدى، قار جاۋىپ، جىلىلىق كەلدى، ال ءبىز ءبىر-ءبىرىمىزدى سايلاۋدا كورىپ، قۋانىپ قالدىق، – دەيدى قارت سايلاۋشىلار.

داۋىس بەرۋ ساياسي پارتيالار ۇسىنعان پارتيالىق تىزىمدەر بويىنشا جۇزەگە اسىرىلاتىنى بەلگىلى. وسى ۋچاسكەدە العاشقى بولىپ داۋىس بەرگەن زەينەتكەر، تىل ارداگەرى الەۆتينا بەرەزكينا «بۇگىن قازاقستاندىقتار ءۇشىن ماڭىزدى كۇن. ءار سايلاۋ وتكەن سايىن كەلىپ داۋىس بەرەمىز. نە ءۇشىن؟ ەلىمىزدە تىنىشتىق بولسىن، وسى ماقسات ءۇشىن داۋىس بەرەمىز، – دەيدى اجەي.

وبلىس ورتالىعىنداعى №7 مەكتەپتە ورنالاسقان №55 سايلاۋ ۋچاسكەسى سايلاۋ كوميسسياسىنىڭ توراعاسى ەركىنبەك ماكەشوۆتىڭ ايتۋىنشا، تۇرعىندار كوپتەپ كەلدى.

– بىزدەر قاتتى اياز بولىپ، كەتە مە دەپ ەدىك، قار جاۋىپ، اياز ءتۇسىپ، سايلاۋشىلارعا ۇيدەن شىعۋعا تابيعات تا مۇمكىندىك بەردى، – دەيدى ەركىن ماكەشوۆ. – سوندىقتان، سايلاۋ جوعارى دارەجەدە وتەدى دەپ سەنەمىز.

ال، №28 سايلاۋ ۋچاسكەسىندە لەرمونتوۆ، نۇرسۇلتان نازارباەۆ، پاۆلوۆ كوشەلەرى بويىندا تۇراتىن تۇرعىندار داۋىس بەردى. سونداي-اق، كامەلەت جاسىنا تولىپ، العاش رەت داۋىس بەرەتىن 11 جاس تىركەلسە، ەرتەڭگىلىك العاشقى بولىپ داۋىس بەرۋگە زەينەتكەر ءداۋىت راقىمعاليەۆتەر وتباسى كەلدى.

سايلاۋ ۋچاسكەسىنىڭ ءتورايىمى تىلەۋلەس قاليەۆانىڭ ايتۋىنشا، تاڭعى 7-دەن اشىلعان ۋاقىتتان باستاپ ءبىرىنشى ساعاتتا 50-دەن اسا سايلاۋشى كەلىپ داۋىس بەرگەن. وسى ۋچاسكەگە تىركەۋلى 1816 تۇرعىننىڭ 32-ءسى دەنساۋلىقتارىنا بايلانىستى ءوز ۇيلەرىندە داۋىس بەردى. ولاردىڭ مەكەن-جايىنا كوميسسيا مۇشەلەرى 12-دەن باستاپ بيۋللەتەندى جەتكىزدى.

پاۆلودار وبلىسى