قوعام • 15 جەلتوقسان، 2020

پاۆلوداردا مەرەكەلىك جيىنعا ومبىلىق، سامارالىق قازاقتار قاتىستى

18 رەت كورسەتىلدى

پاۆلودار وبلىسىندا ونلاين-فورماتتا «تاۋەلسىز قازاقستان. تاريح تولقىنىندا» حالىقارالىق عىلىمي-پراكتيكالىق كونفەرەنتسيا ءوتتى. كونفەرەنتسيا جۇمىسىنا عالىمدار، وبلىستىق قحا ەتنومادەني بىرلەستىكتەرىنىڭ جەتەكشىلەرى، ومبىلىق، سامارالىق قازاقتار، جەرگىلىكتى ستۋدەنتتەر قاتىستى، دەپ حابارلايدى Egemen.kz.

جيىنعا وبلىس اكىمنىڭ ورىنباسارى ايزادا قۇرمانوۆا قاتىستى. ءوز سوزىندە ەلباسى نۇرسۇلتان نازارباەۆتىڭ ەلىمىزدىڭ  تاۋەلسىزدىگىنىڭ قالىپتاسۋىنا، ەل بىرلىگى ءۇشىن ەڭبەگى تۋرالى ايتىپ ءوتتى.

ال 1986 جىلعى جەلتوقسان وقيعاسىنا قاتىسقان، تورايعىروۆ ۋنيۆەرسيتەتىنىڭ ە.بەكماحانوۆ اتىنداعى  عىلىمي-پراكتيكالىق ورتالىقتىڭ ديرەكتورى امانتاي قۇداباەۆ تاۋەلسىزدىك جانە قازاق حالقىنىڭ وعان بارار جولداعى قيىندىقتارى تۋرالى تاريح ساباقتارى جاستاردىڭ ساناسىنىڭ دامۋىنا ۇلكەن اسەر ەتەتىنىن اتاپ ءوتتى.

سونىمەن قاتار «اق بۇلاق» قازاق جەكسەنبىلىك ۇلتتىق مەكتەبىنىڭ پەداگوگى، سامارا وبلىسىنىڭ ەڭبەك سىڭىرگەن مادەنيەت قىزمەتكەرى ايگۇل جالەلوۆا سامارادا قازاق بالالارىنا انا ءتىلىن، تۋعان حالقىنىڭ سالت-داستۇرلەرىن ۇيرەتۋ ءۇشىن جۇرگىزىلىپ جاتقان جۇمىستار تۋرالى ايتىپ بەردى.

«2003 جىلدان باستاپ سامارا وبلىسىندا «ايگۇل» قازاق حالىق بي ءانسامبلى جانە «مارجان» قازاق حالىق ءسان تەاترى جۇمىس ىستەيدى»، دەدى ايگۇل جالەلوۆا.

«مارجان» ءسان تەاترى قازاقتىڭ ۇلتتىق كيىمدەرى نەگىزىندە ساندىك كوللەكتسيالار ازىرلەيدى. وسى كوللەكتسيالارمەن ءسان تەاترى كوپ جىلدار بويى قالانىڭ ۇلكەن الاڭدارىندا ونەر كورسەتىپ، قازاقتىڭ ۇلتتىق كيىمدەرىن بالالار مەن جاسوسپىرىمدەردىڭ ونەرى مەن شىعارماشىلىعىنىڭ كەرەمەت تۋىندىسى رەتىندە كورسەتىپ، قازاق حالقىنىڭ مادەنيەتىن ناسيحاتتايدى.

«اق بۇلاق» مەكتەبىنىڭ پەداگوگتارى «اتا مۇرا» قازاق مادەنيەتى مەرەكەسى، «قازاق سۇلۋى»، «جىگىت سۇلتانى» كونكۋرستارى، «التىن بالاپان» بالالار سۇلۋلىق كونكۋرسى جانە ت.ب. سياقتى تۋعان حالقىنىڭ سالت-داستۇرلەرىن زەردەلەۋ بويىنشا كوپتەگەن جوبالاردىڭ اۆتورلارى بولىپ تابىلادى.

ومبىداعى ء«مولدىر» قازاق مادەنيەتى ورتالىعىنىڭ مۇشەسى شولاقوۆ مۇرات دومبىرادا ويناۋدى ۇيرەنىپ، تۋعان حالقىنىڭ دۇنيەتانىمىنىڭ تەرەڭدىگىن تۇسىنە العانىن ايتتى. سونداي-اق، ول ءوز بايانداماسىندا رەسەي  اۋماعىندا تۇراتىن قازاق جاستارى ءۇشىن ءوز ەتنوسىنىڭ ءتىلى مەن مادەنيەتىن زەردەلەۋ ماڭىزدى ەكەنىن اتاپ ءوتتى.

سوڭعى جاڭالىقتار

ۇقساس جاڭالىقتار