ۇكىمەت • 11 قاراشا، 2020

وڭدەۋ ونەركاسىبى ءوسىپ كەلەدى

19 رەت كورسەتىلدى

كەشە پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلىمىزدىڭ 2020 جىلعى قاڭتار-قازانداعى الەۋمەتتىك-ەكونوميكالىق دامۋ قورىتىندىسى جانە رەسپۋبليكالىق بيۋدجەتتىڭ اتقارىلۋى قارالدى.

ينفوگرافيكانى جاساعان امانگەلدى قياس، «ەQ»

 

ەكونوميكانى نەسيەلەندىرۋ 3،5%-عا ارتتى

ەكونوميكانىڭ جالپى جاي-كۇيى تۋرالى بايانداعان ۇلتتىق ەكونوميكا ءمينيسترى رۋسلان دالەنوۆ حالىقارالىق قارجى ۇيىمدارىنىڭ 2020 جىلعا ارنالعان جاڭارتىلعان بولجامدارى بويىنشا الەمدىك ەكونوميكانىڭ ءوسۋى 4،4%-دان 7،6%-عا، الەمدىك ساۋدا 7%-دان 10،6%-عا تومەندەگەنىن ايتتى. «سوعان قاراماستان بيىلعى 10 ايدا ەلىمىزدەگى ءوندىرۋشى ەمەس سەكتورلارعا سالىنعان ينۆەستيتسيالار ۇلعايدى، ناقتى سەكتوردا ءوسىم ساقتالدى، قىزمەتتەر سالاسى تۇراقتاندى جانە ەكونوميكانى كرەديتتەۋ ۇلعايدى. 10 ايدىڭ قورىتىندىسى بويىنشا تاۋارلار ءوندىرىسى 1،9%-عا ءوستى. بۇل رەتتە، قىزمەتتەر كولەمى 6،1%-عا قىسقاردى. سونىڭ سالدارىنان جەدەل دەرەكتەر بويىنشا، ىشكى جالپى ءونىم 2،9%-عا تومەندەدى. جىلدىق ينفلياتسيا 7،1%-دى قۇرادى» دەدى ر.دالەنوۆ.

ناقتى سەكتور سالالارىنىڭ كوبىندە جانە جەكەلەگەن قىزمەت تۇرلەرىندە جاقسى ءوسىم بار. ول – قۇرىلىس، اقپارات پەن بايلانىس، اۋىل شارۋاشىلىعى، وڭدەۋ ونەركاسىبى سالالارى. ال كولىك، ساۋدا، عىلىمي جانە تەحنيكالىق قىزمەت، جىلجىمايتىن م ۇلىك وپەراتسيالارى، اكىمشىلىك قىزمەت كورسەتۋ سالالارىندا تومەندەۋ بايقالدى. 10 ايدا كەن ءوندىرۋ ونەركاسىبىن ەسەپكە الماعاندا، ينۆەستيتسيالار 14،7%-عا ءوستى. «ينۆەستيتسيالاردىڭ ەلەۋلى كولەمى تۇرعىن ءۇي قۇرىلىسىندا 30% وسىممەن – 1 472 ملرد تەڭگە، كولىككە 8% وسىممەن – 959 ملرد تەڭگە، وڭدەۋ ونەركاسىبىنە 11% وسىممەن – 661 ملرد تەڭگە، ونىڭ ىشىندە ازىق-ت ۇلىك ونىمدەرىنە 20% وسىممەن – 75 ملرد تەڭگە، اۋىل شارۋاشىلىعىنا 8% وسىممەن – 413 ملرد تەڭگە تارتىلدى» دەپ حابارلادى مينيستر.

ەكونوميكانى كرەديتتەۋ جىل باسىن­داعى كورسەتكىشپەن سالىستىرعاندا 3،5%-عا ۇلعايدى. كرەديتتەردىڭ ەڭ كوپ ءوسىمى بايلانىس، اۋىل شارۋاشىلىعى، ونەركاسىپ جانە قۇرىلىس سالاسىندا بايقالدى. شاعىن كاسىپكەرلىك سۋبەك­تىلەرىن كرەديتتەۋ 5،9%-عا ۇلعايدى. «9 ايدا سىرتقى ساۋدا اينالىمى 62،8 ملرد دوللاردى قۇرادى. ەكسپورت – 35،3 ملرد دوللار، يمپورت – 27،5 ملرد دوللار دەڭگەيىندە قالىپتاستى. وسىلايشا، ساۋ­دا تەڭگەرىمىنىڭ وڭ سالدوسى 7،8 ملرد دوللار دەڭگەيىندە قامتاماسىز ەتىلدى» دەدى ر.دالەنوۆ.

وڭىرلەردىڭ كوبىندە ونەركاسىپتىڭ وسكەنى بايقالادى. سونىڭ ىشىندە وڭدەۋ ونەركاسىبى 3،2%-عا ءوستى. نەگىزگى كاپيتالعا 9،4 ترلن تەڭگە ينۆەستيتسيا تارتىلىپ، 13 وڭىردە ءوسىم بولدى. قۇرىلىس سەكتورى سەرپىندى دامىپ، ورىندالعان جۇمىستاردىڭ كولەمى 10،7%-عا ءوستى.

مينيستر ىسكەرلىك بەلسەندىلىكتى قالپىنا كەلتىرۋ ءۇشىن قابىلدانىپ جاتقان شارالاردى ەسكەرە وتىرىپ، بيزنەستى جۇرگىزۋ ءۇشىن، اسىرەسە شەكتەۋ شارالارى اسەر ەتكەن سالالاردا راسىمدەر مەن شارتتاردى بارىنشا جەڭىلدەتۋ، ىسكەرلىك بەلسەندىلىكتى قولداۋ ءۇشىن اكىمدىكتەر جانىنداعى وڭىرلىك شتابتاردىڭ بيزنەس سۇرانىستارىنا جەدەل دەن قويۋ، ەكونوميكانى ەكىنشى دەڭگەيلى بانكتەر كرەديتتەۋى كەزىندە بيز­نەستىڭ مەملەكەتتىك قولداۋ شارا­لارىن پايدالانۋىن جانداندىرۋ، جەر­گىلىكتى اتقارۋشى ورگانداردىڭ ساپالى ينۆەستيتسيا تارتۋى بويىنشا پرواكتيۆتى جانە ماقساتتى جۇمىس جاساۋ، تۇتىنۋ تاۋارلارىنىڭ باعالارىن ەرەكشە باقىلاۋ جانە تۇراقتاندىرۋ قور­لارى­نىڭ تەتىكتەرىن پايدالانۋ ارقىلى ماۋ­سىمدىق اۋىتقۋلارعا جول بەرمەۋ قاجەت­تىگىن اتاپ كورسەتتى.

 

دەپوزيتتەر ءبىر ايدا 3،3%-عا ۇلعايدى

بانك سالاسىنىڭ جاي-كۇيى تۋرالى بايانداعان ۇلتتىق بانك توراعاسى ەربولات دوساەۆ الەمدە كوروناۆيرۋس جۇقتىرۋ جاعدايلارىنىڭ كۇرت كوبەيگەنى جانە اقش-تاعى پرەزيدەنت سايلاۋى اياسىندا اعىمداعى جىلى قازاندا الەمدىك قور نارىقتارىندا بەلگىسىزدىك پەن قۇبى­لۋ ارتقانىن ايتتى.

«فرانتسيا مەن گەرمانيادا لوكداۋن ەنگىزۋدى تالقىلاۋ اياسىندا قازاننىڭ سوڭىندا تاۋار نارىقتارىندا تومەندەۋ بايقالدى. جالپى العاندا، ەۋروپاعا مۇ­نايدى الەمدىك تۇتىنۋدىڭ 20%-ى تيەسى­لى. ەگەر فرانتسيا مەن گەرمانياعا باس­قا ەۋروپا ەلدەرى قوسىلسا، قاراشا مەن جەل­توقساندا مۇنايدى ءوندىرۋ سۇرا­نىستان اسىپ كەتۋى مۇمكىن. بۇل وپەك-كە قىسىم بولادى، ءسويتىپ 2021 جىلعى قاڭتاردان باستاپ ءوندىرۋدى ۇلعايتۋ جوسپارى قايتا قارالۋى مۇمكىن» دەدى ە. دوساەۆ.

بيىل قازان ايىندا ەلىمىزدەگى جىل­دىق ينفلياتسيا 7،1%-عا جەتتى، ءبىر اي بۇ­رىن 7% بولعان ەدى. سىرتقى جانە ىشكى نا­رىقتارداعى بەلگىسىزدىك اياسىندا اعىم­داعى جىلعى قازاندا بازالىق ستاۆ­كا 9 % دەڭگەيىندە ساقتالدى. سىرت­قى سەكتورداعى بەلگىسىزدىك پەن قۇبىل­ما­لىقتىڭ ءوسۋى تاۋەكەلدى اكتيۆتەر مەن دا­مۋشى ەلدەردىڭ ۆاليۋتالارىنا قى­سىم ءتۇسىردى. قايتادان كارانتين شارا­لارىن ەنگىزۋ ىقتيمالدىعىنىڭ ءوسۋى سالدارىنان قازاننىڭ سوڭىنا قاراي مۇنايدىڭ ءبىر باررەلى 37،5 دوللارعا دە­يىن ەداۋىر تومەندەگەن ەدى. Pfizer جانە BioNTech كومپانيالارىنان ۆاكتسي­نانىڭ ءساتتى سىناقتان وتكىزىلگەنى تۋرالى وڭ جاڭالىقتىڭ اياسىندا مۇناي باعاسى ءبىر كۇندە 7،5%-عا ۇلعايىپ ءبىر باررەلى 42،4 دوللارعا قىمباتتادى.

ە.دوساەۆ اتاپ وتكەندەي، بيىل قازان­­دا دامۋشى ەلدەردىڭ ۆاليۋتالارى اقش پەن بىرقاتار ەۋروپا ەلدەرىن­دە كوروناۆيرۋستىڭ قايتالانۋ قاۋپى كۇشەيۋىنە بايلانىستى السىرەۋدى جالعاس­تىردى. مىسالى تۇرىك ليراسى ءبىر ايدا 8%-عا، رەسەي ءرۋبلى – 2،2%-عا، برازيليا رەالى – 2،3%-عا السىرەدى. اعىمداعى جىلعى 9 قاراشادا بيرجاداعى ساۋدا-ساتتىق قورى­تىندىلارى بويىنشا تەڭگەنىڭ ايىر­باس باعامى اي باسىنان بەرى 0،3%-عا نىعايىپ، 1 اقش دوللارى 431،17 تەڭگە بولدى.

الدىن الا دەرەكتەر بويىنشا قازاندا ۇلتتىق بانكتىڭ التىن-ۆاليۋتا رەزەرۆتەرى كوبىنەسە مەملەكەتتىك بورىشتى تولەۋ جانە ينتەرۆەنتسيا جۇرگىزۋ ەسەبىنەن 33،6 ملرد دوللارعا دەيىن تومەندەدى. اعىمداعى جىلعى قازاننىڭ سوڭىندا قازاقستاننىڭ حالىقارالىق رەزەرۆتەرى الدىن الا دەرەكتەر بويىنشا ءبىر ايدا 1،3%-عا ازايىپ، 89،9 ملرد دوللاردى قۇرادى. ال بانك جۇيەسىندەگى دەپوزيتتەر ءبىر ايدا 3،3%-عا ۇلعايىپ، قىركۇيەكتىڭ سوڭىندا 21،4 ترلن تەڭگە بولدى. تەڭگەدەگى سالىمدار قىركۇيەكتە 12،6 ترلن تەڭگەگە دەيىن، ياعني 2،2%-عا، ۆاليۋتالىق سالىمدار 5،1%-عا ءوستى.

بيزنەستىڭ كرەديتتىك پورتفەلى قىركۇيەكتە 7،3 ترلن تەڭگەگە دەيىن – 0،2%-عا ۇلعايدى. قىركۇيەكتە حالىقتىڭ كرەديتتەرى 7 ترلن تەڭگەگە – 2%-عا ءوستى. ونىڭ قۇرىلىمىندا تۇتىنۋشىلىق قارىزدار 4،2 ترلن تەڭگەگە جەتىپ، 1،3%-عا ۇلعايدى، مەملەكەتتىك باعدارلامالاردى ىسكە اسىرۋ ەسەبىنەن يپوتەكالىق قارىزدار 2،1 ترلن تەڭگەگە ءوسىپ، 3،6%-عا ارتتى.

قازاقستان ەكونوميكاسىن قولداۋ ءۇشىن مەملەكەت باسشىسىنىڭ داعدارىسقا قارسى باستامالارىن ىسكە اسىرۋ جالعاسۋدا. «قاراپايىم زاتتار ەكونوميكاسى» باعدارلاماسى بويىنشا اعىمداعى جىلعى 6 قاراشاداعى جاعداي بويىنشا كاسىپكەرلەردەن 872،7 ملرد تەڭگەگە 1 277 ءوتىنىم قابىلداندى، ونىڭ ىشىندە بانك­تەر جالپى سوماسى 447،6 ملرد تەڭگەنى قۇرايتىن 487 ءوتىنىمدى ماقۇلدادى، 427،9 ملرد تەڭگە سوماسىنا 691 قارىز بەرىلدى.

كاسىپكەرلىك سۋبەكتىلەرىن جەڭىلدىك­پەن نەسيەلەندىرۋ باعدارلاماسى بويىنشا اعىمداعى جىلعى 6 قاراشاعا دەيىن كاسىپكەرلەر 567،3 ملرد تەڭگە سوماسىنا 2 291 ءوتىنىم بەردى، 444،8 ملرد تەڭگەگە 4 292 ءوتىنىم، ونىڭ ىشىندە 91 ملرد تەڭگە بۇرىن بەرىلگەن قارىزداردى وتەۋدەن تۇسكەن اقشا ەسەبىنەن بەرىلدى.

ۇلتتىق بانكتىڭ قارجىلاندىرۋى ەسەبىنەن تۇرعىن ءۇي قۇرىلىسىن قولداۋ جالعاسۋدا. «7-20-25» باعدارلاماسى بويىنشا اعىمداعى جىلعى 5 قاراشادا 295،3 ملرد تەڭگەگە 25 186 ءوتىنىم ماقۇلداندى، ونىڭ ىشىندە 232،1 ملرد تەڭگە سوماسىنا 19 891 قارىز بەرىلدى. «باسپانا حيت» نارىقتىق يپوتەكالىق باعدارلاماسى بويىنشا اعىمداعى جىلعى 5 قاراشادا 404،5 ملرد تەڭگە سوماسىنا 45 866 ءوتىنىم ماقۇلداندى، 320،6 ملرد تەڭگەگە 37 176 قارىز بەرىلدى.

 

بيۋدجەتكە 6،8 ترلن تەڭگە كىرىس ءتۇستى

رەسپۋبليكالىق بيۋدجەتتىڭ اتقارىلۋى تۋرالى بايانداعان قارجى ءمينيسترى ەرۇلان جاماۋباەۆ 2020 جىلدىڭ 10 ايىنىڭ قورىتىندىسى بويىنشا مەملەكەتتىك بيۋدجەتكە 6،8 ترلن تەڭگە كىرىس كىرىپ، جوسپار 94،7%-عا ورىندالعانىن ايتتى. سونىڭ ىشىندە رەسپۋبليكالىق بيۋدجەتكە 4 ترلن 264 ملرد تەڭگە كىرىس ءتۇسىپ، جوسپار 86،5%-عا ورىندالدى. كىرىستەر بويىنشا جوسپاردىڭ اتقارىلماۋى 667 ملرد تەڭگەنى قۇرادى. بۇل رەتتە، سالىقتىق ەمەس تۇسىمدەر 154 ملرد تەڭگەگە ارتىعىمەن ورىندالدى. نەگىزگى اتقارىلماعان سومالار قوسىلعان قۇن مەن كورپوراتيۆتىك تابىس سالىقتارىنا تيەسىلى.

مينيستر اتاپ وتكەندەي، جەرگىلىكتى بيۋدجەتتەردىڭ كىرىسى 113% بولىپ، 2 ترلن 490 ملرد تەڭگەنى قۇرادى. جوسپار 286 ملرد تەڭگەگە اسىرا ورىندالدى.

مينيستر شىعىستار تۋرالى ايتتى. «مەملەكەتتىك بيۋدجەتتىڭ شىعىستارى 98،8%-عا، رەسپۋبليكالىق بيۋدجەتتىڭ شىعىس­تارى 99،7%-عا، جەرگىلىكتى بيۋدجەت­تەردىڭ شىعىستارى 98%-عا اتقارىلدى. رەسپۋبليكالىق بيۋدجەتتىڭ شىعىستارى 11 ترلن 284 ملرد تەڭگەنى قۇرادى. جەرگىلىكتى بيۋدجەتتەردىڭ شىعىستارى 6،4 ترلن تەڭگەنى قۇرادى» دەدى ە.جاماۋباەۆ.

 

94 مىڭنان اسا باسپانا بەرىلدى

وڭدەۋ ونەركاسىبى، كولىك جانە قۇرىلىس سالالارىن دامىتۋ تۋرالى ماسەلەگە قاتىس­تى بايانداما جاساعان يندۋست­ريا جانە ينفراقۇرىلىمدىق دامۋ ءمي­نيسترى بەيبىت اتامقۇلوۆ بۇگىنگى تاڭدا ەكونوميكانىڭ ءوسىمى باياۋلاسا دا، وڭدەۋ ونەركاسىبى ءوسىم­نىڭ نەگىزگى درايۆەرى بولىپ وتىرعانىن اتاپ ءوتتى. 2020 جىلدىڭ 10 ايىنىڭ قورى­تىن­­دىسىندا وڭدەۋ ونەركاسىبىندەگى ءوندى­رىس 3،2%-عا ءوستى. ءمينيستردىڭ ايتۋىنشا، وڭ­دەۋ­شى سالانىڭ بارلىق سەكتورىندا وڭ دينا­ميكا بايقالادى. ماشينا جاساۋ سالا­سىن­دا 10 ايدا اۆتوكولىك قۇرالدارى، ترەيل­ەر­لەر جانە جارتىلاي تىركەمەلەر 53،6 %، وزگە كولىك قۇرالدارىن جاساۋ 87،1%، ەلەكتر جابدىقتارىن جاساۋ 3%، ما­­شي­­نالار مەن جابدىقتار ءوندىرىسى 4،3% ءوستى.

ءتۇستى مەتاللۋرگيادا ءوندىرىس كولەمى 1،9%-عا ارتتى. قارا مەتاللۋرگيادا ءوسىم 0،3% بولدى. ب.اتامقۇلوۆ اتاپ وتكەندەي، جاڭا جاعدايعا بەيىمدەلىپ، جاڭا وندىرىستەردى جولعا قويۋ ارقىلى ءوندىرىس قۋاتىن ارتتىرۋ فارماتسەۆتيكا ونەركاسىبىندە 39،7% وسۋگە قول جەتكىزۋگە مۇمكىندىك بەردى. جەڭىل ونەركاسىپتە ءوندىرىس 16،4%-عا ارتتى، ول توقىما بۇيىمدارى ءوندىرىسىنىڭ – 4،4%، كيىمنىڭ –1،4%، بىلعارى ونىمدەردىڭ – 160،3%-عا ۇلعايۋى ەسەبىنەن بولدى. قاعاز جانە قاعاز ونىمدەرىندە ءوندىرىس كولەمىنىڭ ءوسىمى 15%-دى قۇرادى.

كولىك سالاسىندا ناقتى كولەم يندەكسى 2020 جىلدىڭ 10 ايىندا 82،7%-دى قۇرادى. كونتەينەرلەردىڭ ترانزيتتىك تاسىمالى وتكەن جىلدىڭ وسى كەزەڭىمەن سالىستىرعاندا 35،4%-عا ارتتى. كولىكتىڭ بارلىق تۇرىمەن جۇك تاسىمالداۋ كولەمى 3،2 ملرد توننانى قۇرادى.

2020 جىلدىڭ قازان ايىندا تاسىمال­دانعان جولاۋشىلار سانى قىركۇيەك ايىمەن سالىستىرعاندا 15،5%-عا ءوستى. اۋە تاسىمالى ارقىلى جولاۋشىلار تاسىمالداۋ 1،6%-عا ارتىپ، 621 مىڭ ادامدى قۇرادى. قىتاي-ەۋروپا-قىتاي باعىتىندا كونتەينەرلىك تاسىمالدار 10%-عا نەمەسە 5،1 جيىرما فۋنتتىق بالاماعا ارتىپ، 55،9 جيىرما فۋنتتىق بالاماعا جەتتى.

جۇك تاسىمالى سالاسىندا دا ءوسىم بار. اتاپ ايتقاندا، قازان ايىندا جۇك تاسى­مالىنىڭ جالپى كولەمى 2020 جىلعى قىر­كۇيەكپەن سالىستىرعاندا 3،4%-عا ءوستى.

ب.اتامقۇلوۆ بيىلعى ون ايدىڭ قورى­تىندىسى بويىنشا، ەلىمىزدە 94 مىڭنان اسا باسپانا پايدالانۋعا بەرگەنىن ايتتى.

اۋىل شارۋاشىلىعىن دامىتۋ تۋرالى بايانداعان سالا ءمينيسترى ساپارحان وماروۆ اعىمداعى جىلعى 10 ايدىڭ قورى­تىندىسى بويىنشا جالپى اۋىل شارۋا­شىلىعىنداعى ءونىم كولەمى 5،2%-عا ۇلعايىپ، 5،4 ترلن تەڭگەنى قۇراعانىن ايتتى. بۇل ءوسىم نەگىزىنەن وسىمدىك شارۋا­شىلىعىنداعى ءوندىرىس كولەمىنىڭ 7،1%-عا ۇلعايۋى ەسەبىنەن قامتاماسىز ەتىلدى. «مال شارۋاشىلىعى ءونىمىنىڭ جالپى كولەمى وسى كەزەڭدە 2،7%-عا ۇلعايىپ، 2،1 ترلن تەڭگەنى قۇرادى. بۇل رەتتە تىرىدەي سالماقتاعى ەت ءوندىرۋ كولەمى 3،7%-عا، ءسۇت ءوندىرۋ كولەمى 3،1%-عا ۇلعايدى» دەدى س.وماروۆ.

 

ناقتى سەكتوردا ءوسىم بار

ماسەلەنى ۇكىمەت باسشىسى اسقار مامين قورىتىندىلادى. ونىڭ ايتۋىن­شا، 2020 جىلدىڭ ون ايىنىڭ قورى­تىن­دىسى بويىنشا ەكونوميكانىڭ ناقتى سەكتورىندا ءوسىم قارقىنى ارتتى. وڭدەۋ ونەركاسىبىندە 3،2%-عا، ونىڭ ىشىندە ازىق-ت ۇلىك وندىرىسىندە 3،4%-عا، فارماتسەۆتيكادا 39،7%-عا، دايىن مەتالل بۇيىمدارى وندىرىسىندە 19،5%، ماشينا جاساۋدا 16،5%، ونىڭ ىشىندە اۆتوموبيل جاساۋدا 53،6%، سونداي-اق قاعاز وندىرىسىندە 15%، جەڭىل ونەركاسىپتە 16،4% ءوسىم قامتاماسىز ەتىلدى. قۇرىلىس كولەمى 10،7%-عا، تۇرعىن ءۇيدى پايدالانۋعا بەرۋ 9،7%-عا نەمەسە شامامەن 10،7 ملن شارشى مەترگە ۇلعايدى. اۋىل شارۋاشىلىعىندا 5،2% تۇراقتى ءوسىم قامتاماسىز ەتىلدى.

التىن-ۆاليۋتا رەزەرۆتەرى مەن ۇلتتىق قوردىڭ اكتيۆتەرى بيىلعى 1 قازاندا 91،1 ملرد دوللاردى قۇرادى. تەمىر كەنىن جانە وزگە دە پايدالى قازبالاردى ءون­دىرۋ سەكىلدى تاۋ-كەن سەكتورىنىڭ ماڭىز­دى باعىتتارى بويىنشا وڭ ديناميكا ساق­تالدى. بۇل رەتتە وپەك+ قول جەتكىزىلگەن ۋاعدالاستىقتاردى ورىنداۋعا وراي مۇناي ءوندىرۋدىڭ تومەندەۋى (-4،3%) بايقالادى.

كارانتيندىك شارالار مەن ونىڭ كۇ­شەيتىلۋى قىزمەت كورسەتۋ سالاسىنا كەرى اسەر ەتۋدە. سوعان قاراماستان بۇل سەكتور كور­سەت­كىشتەرى دە بىرتىندەپ تۇراقتانىپ كەلەدى.

اقمولا، تۇركىستان، الماتى، جامبىل، قوستاناي، ماڭعىستاۋ، پاۆلودار، سولتۇس­تىك قازاقستان وبلىستارى جانە شىمكەنت قالاسى نەگىزگى 8 كورسەتكىشتىڭ 5-ءى بويىن­شا الەۋمەتتىك-ەكونوميكالىق دامۋ ءوسى­مىن قامتاماسىز ەتتى. 4 كورسەتكىش بويىن­شا اقتوبە، شىعىس قازاقستان، قاراعان­دى وب­لىس­تارىندا، نۇر-سۇلتان جانە الماتى قالالارىندا وڭ ديناميكاعا قول جەتكىزىلدى.

ۇكىمەت باسشىسى وڭىرلەردىڭ اكىم­دەرى­نە الەۋمەتتىك-ەكونوميكالىق دامۋ­دىڭ جوسپارلانعان كورسەتكىشتەرىنە قول جەتكىزۋ ءۇشىن، سونىمەن قاتار مەم­لە­كەت باسشىسى العا قويعان مىندەت­تەردى ءتيىمدى ىسكە اسىرۋ ءۇشىن بارلىق شارالار­دى قابىلداۋدى تاپسىردى. پرەمەر-مينيستر رەسپۋبليكالىق بيۋدجەت­تىڭ كىرىس بولىگىن قامتاماسىز ەتۋ شارالارىن قابىلداۋ، سونداي-اق مەملەكەتتىك ورگاندار مەن اكىمدىكتەردىڭ جىل سوڭىنا دەيىن بيۋدجەت قاراجاتىن تولىق ءارى ءتيىمدى يگەرۋى قاجەتتىگىنە نازار اۋداردى.

سوڭعى جاڭالىقتار

ەرلىككە تولى سۋرەتتەر

رۋحانيات • بۇگىن، 13:05

كيىكتەردىڭ تولدەۋ كەزەڭى باستالدى

فوتوگالەرەيا • بۇگىن، 12:07

«بارىستىڭ» العاشقى ترانسفەرى

حوككەي • بۇگىن، 08:50

«ءان» بە، «ءۇن» بە؟

رۋحانيات • بۇگىن، 08:36

جۋرناليست قاسىم

رۋحانيات • بۇگىن، 08:34

ءسوز سويىل: ءازىل-وسپاق

رۋحانيات • بۇگىن، 08:32

ۇقساس جاڭالىقتار