ايماقتار • 21 قازان، 2020

الماتى وبلىسىندا بيۋدجەت قارجىسى قالاي جۇمسالۋدا؟

35 رەت كورسەتىلدى

مەملەكەت باسشىسى قاسىم-جومارت توقاەۆ بيىلعى جولداۋىندا وبلىس اكىمدەرىنىڭ الدىنا جاڭا مىندەت جۇكتەپ، وڭىردەگى اتقارىلعان ءىس بويىنشا جەرگىلىكتى ءماسليحات دەپۋتاتتارى الدىندا ءجيى ەسەپ بەرىپ تۇرۋدى تاپسىرعان بولاتىن. پرەزيدەنت پارمەنىنەن كەيىن وبلىستارداعى بيۋدجەت قارجىسىنىڭ ماقساتتى جۇمسالۋى جايىندا اشىقتىق قالىپتاسا باستادى، -- دەپ حابارلايدى Egemen.kz.

مۇنىڭ ءبىر دالەلىن الماتى وبلىسىنان كورىپ وتىرمىز. مىسالى، وبلىستىق ءماسليحاتتىڭ كەزەكتى 62-سەسسياسىنا قاتىسىپ، دەپۋتتارعا ەسەپ بەرگەن ايماق باسشىسى اماندىق باتالوۆ جىل باسىنان بەرى اتقارىلعان ىستەردى اتاپ ءوتىپ، جۇمسالعان قارجىنىڭ ءار تيىنىنا دەيىن جىپكە تىزگەندەي بولدى. ونلاين فورماتتا وتكەن جيىندا بيىلعى 9 ايداعى الەۋمەتتىك-ەكونوميكالىق دامۋ قورىتىندىلارى دا ساراپقا سالىندى. ارينە، ەسەپ بارىسىندا ايماقتاعى پاندەميا جاعدايىندا ىستەلگەن جۇمىسقا باعا بەرىلدى. توتەنشە جاعداي كەزىندە وبلىس بيۋدجەتىنە بىرقاتار وزگەرىستەر ەنگىزىلگەن بولاتىن. ونىڭ ىشىندە دەنساۋلىق ساقتاۋ سالاسىنا قوسىمشا 1،8 ملرد تەڭگە ءبولىنىپ، ول قارجى ءدارى-دارمەك قورىن قالىپتاستىرۋعا، مەديتسينا مەكەمەلەرىنىڭ ماتەريالدىق تەحنيكالىق بازاسىن نىعايتۋعا جۇمسالىپ جاتىر. سونداي-اق، ءبىلىم سالاسىنا قوسىمشا 8،7 ملرد تەڭگ بولىنگەن ەدى. ياعني، جاڭا وقۋ جىلىندا مەكتەپتەردەگى كەزەكشى سىنىپتار جۇمىسىن جۇرگىزۋگە، جۇمىس ىستەپ تۇرعان بالاباقشالاردىڭ سانيتارلىق قاۋىپسىزدىگىن قامتاماسىز ەتۋگە جانە وزگە دە قاجەتتىلىكتەرگە قاجەتتى قارجى بەرىلدى.

وبلىس اكىمى اماندىق باتالوۆ دەپۋتاتتار الدىندا جاساعان بايانداماسىندا پاندەمياعا قاراماستان، وڭىردەگى ونەركاسىپ، شاعىن جانە ورتا بيزنەس، اۋىل شارۋاشىلىعى، قۇرىلىس جانە باسقا دا ماڭىزدى سالالاردىڭ بارلىعىندا ءوسىم قارقىنى ساقتالعانىن ايتتى. ءسوزىن كورنەكتى سلايدپەن ايقىنداي وتىرىپ، بارلىق ساندىق كورسەتكىشتەردى اتاپ ءوتتى. وبلىس باسشىسى ءوز ەسەبىندە مەملەكەتتىك باعدارلامالاردىڭ ورىندالۋى، ىندەتپەن كۇرەس، حالىقتىڭ ءال-اۋقاتىن ارتتىرۋ شارالارى جانە باسقا باعىتتاعى جۇمىستاردىڭ بارلىعىن دا قامتىدى.

وسى سەسسيا بارىسىندا وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى جومارت ءامىرحانوۆ 2020 جىلعا ارنالعان وبلىس بيۋدجەتىنە وزگەرىس ەنگىزۋ تۋرالى شەشىمنىڭ جوباسىمەن تانىستىردى. ونىڭ ايتۋىنشا، قورعانىس، ءبىلىم بەرۋ، دەنساۋلىق ساقتاۋ، تۇرعىن ءۇي-كوممۋنالدىق شارۋاشىلىعى، كولىك جانە كوممۋنيكاتسيا، اۋىل شارۋاشىلىعى، سۋ شارۋاشىلىعى سالالارىنا قارجى بولىنەدى. ماسەلەن، وبلىستىق ماڭىزى بار جولداردى جوندەۋگە 114،8 ملن تەڭگە بولىنسە، قالالىق جانە كەنتىشىلىك جولدار ءۇشىن 607،3 ملن تەڭگە قاراستىرىلىپ وتىر. سونداي-اق، جاڭادان قۇرىلعان رايىمبەك اۋدانىنىڭ ورتالىعى – نارىنقول اۋىلىن كوركەيتۋ ماقساتىنا 183،9 ملن. تەڭگە قوسىمشا جۇمساۋ كوزدەلگەن ەكەن. اپاتتى جاعدايداعى سۋ شارۋاشىلىقتارى مەن گيدرومەليوراتيۆتىك جۇيەلەردى قالپىنا كەلتىرۋ جۇمىستارىن اياقتاۋعا 300،4 ملن تەڭگە باعىتتالادى. سول سياقتى اۋىل شارۋاشىلىعىنىڭ بىرقاتار باعىتتارىن سۋبسيديالاۋعا دا قارجى بولىنبەك. دەنساۋلىق ساقتاۋ سالاسىندا وڭىردەگى مەديتسينالىق مەكەمەلەردىڭ ماتەريالدىق تەحنيكالىق بازالارىن نىعايتۋعا، مەكەمەلەردى جاڭا جۇيەلەرگە قوسۋعا، ءدارى-دارمەك قورىن قالىپتاستىرۋعا دا قوسىمشا قارجىلاي قولداۋ كورسەتىلەتىن بولادى.

جالپى، وبلىس كورسەتكىشتەرى اۋدان، قالالاردان قۇرالاتىنىن ەسكەرسەك، ايماقتىڭ دامىعانى – ەلدى مەكەندەردىڭ دامىعانىنىڭ دالەلى بولا الادى. ءارى بۇل ىستەردىڭ بارلىعى دا مەملەكەت قولداۋىمەن جاسالعانىنا حالىق كۋا. مۇنى باياندامادان سوڭ ءسوز العان ەڭبەكشىقازاق، اقسۋ، ۇيعىر اۋداندارىنانسايلانعان ءماسليحات دەپۋتاتتارى قۋات سۇلتانعازيەۆ، راحات ىبىراەۆا، نۇراكىم ەسجانوۆتار دا تىلگە تيەك ەتتى. ال دەپۋتات ىزعاربەك بەكتۇرسىنوۆ يريگاتسيالىق جۇيەلەردى جوندەۋ، سەرۆيستىك دايىندىق ورتالىعىن قۇرىپ، تەحنيكالار الۋ جاعىنا قولداۋ كورسەتۋ تۋرالى ۇسىنىسىن ءبىلدىردى. وبلىس باسشىسى ايتىلعان ماسەلەلەر نازارعا الىنىپ، وڭ شەشىمىن تاباتىنىن ايتتى. ال جيىندا وبلىس اكىمىنىڭ ەسەبىنە جوعارى باعا بەرگەن ءماسليحات دەپۋتتارى بيۋدجەتكە ەنگىزىلگەن وزگەرىستەردى دە تولىقتاي قولدادى.

 

 

الماتى وبلىسى

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار