ايماقتار • 21 قازان، 2020

بۋرابايدىڭ كۇزگى كەشتەرى

9 رەت كورسەتىلدى

تابيعات قۇبىلىستارىن زەردەلەۋدەن تۋعان حالقىمىزدىڭ كۇنتىزبەسى مەن ءومىر ءسۇرۋ سالتىندا ميزام شۋاعى دەگەن ۇعىم بار. ونىڭ ءدال قاي كۇنى باس­تالىپ، قاي كۇنى اياقتالاتىنىن ەشكىم ءدوپ باسىپ ايتا المايدى. ايتسە دە جايماشۋاق جازعا بەرگىسىز، ءتىپتى ءۇپ ەتكەن جەل دە سوقپاي تىنا قالعان جانعا جايلى قۇبىلىس كوپ جاعدايدا قازاننىڭ العاشقى ونكۇندىگىنە سايكەس كەلىپ جۇرگەنىن بايقاۋعا بولادى. وسى ەسەپكە سايعاندا قازاق جەرىنىڭ ءىنجۋ-مارجاندارىنىڭ ءبىرى، كۋرورتتى ءوڭىر – بۋرابايدا سوڭعى كۇندەرى ميزام دەمالۋشىلاردىڭ جۇزىنە كادىمگىدەي شۋاعىن جۇگىرتكەنىنە كۋا بولا الامىز.

كوكشە ەلىمىزدىڭ سولتۇستىك بەلدەۋىنە ءبىرشاما تاياۋ ورنالاسقاندىقتان، وزگە وڭىرلەردەن دەمالۋعا كەلەتىن وتان­داس­تار اراسىندا: «مۇندا سالقىن مەن ىزعار ەرتە تۇسەدى» دەگەن تۇسىنىك قا­لىپتاسقان. سوندىقتان دا ولاردىڭ بىر­قاتارى ارتىنىپ-تارتىنىپ، جىلى كيىمدەرىن الا كەلگەنگە ۇقسايدى. دە­گەنمەن كەيىنگى كۇندەرى ونىڭ قاجەتى بولماي قالىپ جۇرگەنى تابيعات تە­رەزەسى ارقىلى جىبەرىلگەن سىي-سيا­پاتتاي كورىنەدى. بۋراباي جىل مەز­گىلىنىڭ قاي كەزەڭىندە دە كوركىن قاشىر­ماي، اجارىن جوعالتپاي تۇرا بەرەتىن تاڭعاجايىپ ءوڭىر ەكەنىنە تاعى ءبىر مارتە كوزىمىز جەتە ءتۇستى.

بۋرابايدىڭ باستى ەمى مەن شيپاسى كوكىرەكتى بىردەن اشىپ جىبەرەتىن ساف، جۇپار اۋاسى، سامىرسىن مەن بالقاراعاي اعاشتارىنان بولىنەتىن ولشەۋسىز وتتەگى ەكەنى ايتىلىپ تا، جازىلىپ تا ءجۇر. ايدىن كولدەر مەن بيىك شوقىلار، ۇزىنىنان كوسىلە جايعاسقان قيا قۇزدار كوكشەنىڭ اتموسفەرالىق تەپە-تەڭدىگىن ساقتاۋعا سەپتىگىن تي­گىزىپ تۇرعانى تالاسسىز. ءسىرا، دانا اباي «سىلدىراپ وڭكەي كەلىسىم، تاسبۇلاقتىڭ سۋىنداي» دەپ وسىنداي كوركەمدىكتى ايتسا كەرەك. كۇن ەڭكەيگەن سايىن كوكشەنىڭ قايتالانباس كورىنىسى، بۋراباي كۋرورتى ماڭايىنىڭ كوزدىڭ جاۋىن الاتىنداي سان الۋان بوياۋ­لارى بۇدان ءارى تۇرلەنىپ، كول ايدىندارىنا سۇلباسىن تۇسىرگەن شىڭ-قۇزدار ماڭعاز كەيىپكە كوشەدى.

كوكشەدە كۇنى كەشە جادىراعان جازدىڭ وتكەنىنە بۋراباي كەنتىنىڭ ىرگەسىندە ورنالاسقان قايىق «ستانساسى» كۋا بولا الاتىن سەكىلدى. ولاردىڭ باسى بىرىكتىرىلىپ، ۇقىپتى تۇردە ءبىر بۇرىشقا جيناقتالىپتى. وتكەن اپتادا بۇل ما­ڭاي جىم-جىرت، تىم-تىرىس كۇيىندە كۇز­دىڭ حابارىن بەرىپ تۇرعانداي ەدى. ال بۇ­گىنگى كورىنىس باسقاشالاۋ. «ستانسا» ما­ڭىندا قاراڭ-قۇراڭ ەتكەن ادامدار كورىندى. كول بەتىندە قايىقپەن سە­رۋەندەۋشىلەر پايدا بولىپ، ولار باتار كۇننىڭ شۇ­­عىلاسىنا مالىنىپ جۇر­گەندەي اسەردە قالدىق. ايدىننىڭ اي­نالاسىنا ءارتۇرلى جاس شاماسىنداعى ادامدار كەلىپ، ءدىرىلى مەن تولقىنى جوق تى­مىق كول بەتىنە قىزىقتاپ قاراپ تۇر­دى.

ءبىر كەزدە جاعاداعى قويتاستاردىڭ اراسىنان ەل اۋزىندا سۇڭگۋىر-شۇرەگەي دەپ اتالىپ كەتكەن ۇيرەك پىشىندەس كول قۇستارى بارقىلداپ شىعا كەلدى دە ايدىن ورتاسىنا قاراي جىلجي جونەلدى. بۋرابايداعى كۇزگى كەشتىڭ قاراڭعىلىعى قويۋلانا تۇسكەنىمەن، باتقان كۇننىڭ شوقتاي قىزىل شاپاعى شاتقالدىڭ ۇستىندە كوپ ۋاقىتقا دەيىن جوعالماي تۇرىپ الدى.

– ەرتەڭ كۇن تاعى دا جىلى بولادى. ويت­كەنى كۇن ۇياسىنا الاۋلاپ قىزارىپ بات­تى عوي، – دەدى وسى ساتتە جانىمداعى سەرى­گىم مۇلگىگەن تىنىشتىقتى ءتىلىپ ءتۇ­­سىپ.

جانعا جايلى ءتيىپ، قيالعا ەرىك بەرەتىن بۋرابايدىڭ كۇزگى كەشتەرىنىڭ كورىنىسى ءبىراز ۋاقىتقا دەيىن كوكەيدەن كەتە قويماس، ءسىرا.

 

سوڭعى جاڭالىقتار

قالامگەرگە قۇرمەت

رۋحانيات • بۇگىن، 18:13

الماتى «قىزىل» ايماققا كىردى

ايماقتار • بۇگىن، 16:50

اقتاۋدا بۋىنسىز بالا تۇرادى

ۆيدەو • بۇگىن، 16:04

iPhone 12 دەنساۋلىققا زيان دەپ تانىلدى

تەحنولوگيا • بۇگىن، 15:38

ۇقساس جاڭالىقتار