ايماقتار • 20 قازان، 2020

انتيكور جانە بۇۇدب جەمقورلىقتىڭ الدىن الۋدا ىنتىماقتاستىعىن نىعايتادى

48 رەت كورسەتىلدى

بۇگىن سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ بۇۇدب-نىڭ قازاقستانداعى تۇراقتى وكىلى ياكۋپ بەريشپەن كەزدەستى. بۇل تۋرالى اگەنتتىكتىڭ ءباسپاسوز قىزمەتى حابارلادى.

كەزدەسۋدىڭ نەگىزگى كۇن ءتارتىبى – بۇۇدب-نىڭ 2021-2025 جىلدارعا ارنالعان ەلدىك باعدارلاماسىنىڭ اياسىندا جەمقورلىققا قارسى ءىس-قيمىل جەلىسى بويىنشا ىنتىماقتاستىقتى تالقىلاۋ بولدى.

"قازىرگى جاعدايدا پارمەندى قىلمىستىق-قۇقىقتىق قۇرالدارمەن قاتار جۇيەلى الدىن الۋ جۇمىسىنىڭ دا ماڭىزى زور. بۇل تۇرعىدا پاراساتتىلىق، اشىقتىق، ەسەپتىلىك جانە تۇتىنۋشىعا باعدارلانۋ ارقىلى مەملەكەتتىك اپپاراتتى ترانسفورماتسيالاۋ شەشۋشى ءرول اتقارادى"، – دەپ اتاپ ءوتتى اليك شپەكباەۆ.

ءوز كەزەگىندە بۇۇدب تۇراقتى وكىلى ياكۋپ بەريش ۆەدومستۆونىڭ قىزمەتىنە جوعارى باعا بەرىپ: «بىلتىر اگەنتتىكتىڭ قۇرىلۋى – ەلدىڭ جەمقورلىقتى جەڭۋگە ۇمتىلىسىنىڭ تىكەلەي كورسەتكىشى. ءبىز سىبايلاس جەمقورلىققا قارسى قىزمەتتىڭ حالىقارالىق ستاندارتتار مەن رەيتينگتەر تۇرعىسىنان جان-جاقتى، جۇيەلى جۇمىسىن كورىپ وتىرمىز. ورتالىقتا جانە وڭىرلەردە بۇۇ-نىڭ ساياساتىنا سايكەس نەگىزگى باسىمدىقتار بايقالادى. اگەنتتىكتىڭ پاندەميا تۇسىندا توزىمدىلىك تانىتىپ، جۇمىس قارقىنىن باسەڭدەتپەگەنىن اتاپ وتكەن ءجون»، - دەدى.

سپيكەر ۆەدومستۆونىڭ مەملەكەتتىك ينستيتۋتتاردىڭ تيىمدىلىگى مەن ەسەپتىلىگىن ارتتىرۋعا، كۆازيمەملەكەتتىك سەكتورداعى جاۋاپكەرشىلىكتى كۇشەيتۋگە، سونىمەن قوسا ازاماتتاردىڭ سىبايلاس جەمقورلىققا قارسى باستامالارعا قاتىسۋىنا قوسقان ۇلەسىنە باسا نازار اۋداردى.

كەزدەسۋ قورىتىندىسى بويىنشا تاراپتار ۇزاقمەرزىمدى سەرىكتەستى نىعايتۋعا نيەت ءبىلدىرىپ، سىبايلاس جەمقورلىق تاۋەكەلدەرىن انىقتاۋ سالاسىنداعى تسيفرلاندىرۋ مەن اگەنتتىك پىسىقتاعان زاڭنامالىق رەفورمالاردى ىسكە اسىرۋ ماسەلەلەرىن ءوزارا ءىس-قيمىلدىڭ نەگىزگى باعىتى رەتىندە بەلگىلەدى.

قازىرگى تاڭدا، بۇۇدب قولداۋىمەن "Transparency International" قوعامدىق قورىمەن بىرلەسىپ جەمقورلىقتى قابىلداۋدى باعالاۋ بويىنشا مونيتورينگتىك الەۋمەتتىك ساۋالناما جۇرگىزىلۋدە. ونىڭ ناتيجەلەرى بيىلعى جىلدىڭ سوڭىندا جاريالانادى.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار