ۇكىمەت • 18 قىركۇيەك، 2020

ۇكىمەتتە جالاقىنى ۋاقىتىلى تولەۋ ماسەلەلەرى تالقىلاندى

20 رەت كورسەتىلدى

بۇگىن قر پرەمەر-ءمينيسترىنىڭ ورىنباسارى ە. توعجانوۆتىڭ توراعالىعىمەن بەينەكونفەرەنتسيا رەجيمىندە الەۋمەتتىك ارىپتەستىك پەن ەڭبەك قاتىناستارىن رەتتەۋ جونىندەگى ۇشجاقتى رەسپۋبليكالىق كوميسسيانىڭ وتىرىسى ءوتتى، دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.

كەڭەسكە ورتالىق مەملەكەتتىك ورگانداردىڭ وكىلدەرى، وبلىس اكىمدەرىنىڭ ورىنباسارلارى، كاسىپوداق ۇيىمدارى مەن جۇمىس بەرۋشىلەر بىرلەستىكتەرىنىڭ وكىلدەرى قاتىستى.

كوميسسيا وتىرىسىن اشقان ەرالى توعجانوۆ قازىرگى جاعدايدا جۇمىس ورىندارىنىڭ ساقتالۋىن، جالاقىنىڭ ۋاقىتىلى تولەنۋىن قامتاماسىز ەتۋ، ەڭبەك جانجالدارىنىڭ الدىن الۋ سياقتى ماسەلەلەر بۇرىنعىدان دا وزەكتى ەكەنىن اتاپ ءوتتى. ۆيتسە-پرەمەر جۇمىس بەرۋشىلەر مەن جۇمىسشىلاردىڭ مۇددەلەرىن قورعايتىن كاسىپوداقتاردىڭ وسى باعىتتاعى باعا جەتپەس ۇلەسىن ەرەكشە اتاپ ءوتتى. ەڭبەك قاتىناستارىن رەتتەۋ ءۇشىن الەۋمەتتىك ارىپتەستىكتىڭ ماڭىزى زور.

قر ەڭبەك جانە حالىقتى الەۋمەتتىك قورعاۋ ءمينيسترى ب. نۇرىمبەتوۆ جانە وڭىرلەر اكىمدەرىنىڭ ورىنباسارلارى الەۋمەتتىك شيەلەنىستەردىڭ الدىن الۋ جانە الەۋمەتتىك-ەڭبەك جانجالدارىن شەشۋ جونىندەگى كەشەندى جوسپاردىڭ ىسكە اسىرىلۋى، سونداي-اق وندىرىستىك جاراقاتتاردىڭ سانىن ازايتۋ شارالارى تۋرالى باياندادى.

سونىمەن قاتار رەسپۋبليكالىق ۇشجاقتى كوميسسيانىڭ قاراۋىنا قر ۇكىمەتى جانە كاسىپوداق ۇيىمدارى مەن جۇمىس بەرۋشىلەر بىرلەستىكتەرىنىڭ اراسىنداعى 2021-2023 جىلدارعا ارنالعان باس كەلىسىمنىڭ جوباسى شىعارىلدى.

جاڭا كەلىسىم "لايىقتى ەڭبەك" ماتىنىندە جانە حالىقارالىق ەڭبەك ۇيىمى ۇسىنىلاتىن تاسىلدەر مەن ينديكاتورلارىنا سايكەس ازىرلەنۋدە. وسى ماسەلە بويىنشا قازاقستان كاسىپوداقتار فەدەراتسياسىنىڭ توراعاسى س. داۋلەتالين ءوز ۇسىنىسىن ايتتى.

وتىرىس سوڭىندا ە. توعجانوۆ ورتالىق مەملەكەتتىك جانە جەرگىلىكتى اتقارۋشى ورگاندارعا بىرقاتار تاپسىرمالار بەردى. ولاردىڭ ىشىندە: وندىرىستىك پروتسەستەردى تۇراقتاندىرۋ جانە ازاماتتاردىڭ ەڭبەك قۇقىقتارىن قامتاماسىز ەتۋ ماسەلەلەرى بويىنشا مەموراندۋمدار جاساۋ جونىندەگى جۇمىستى جانداندىرۋ، جۇمىسپەن قامتۋعا جاردەمدەسۋ بويىنشا جەدەل شارالار قابىلداي وتىرىپ، قىزمەتكەرلەردىڭ بوساتىلۋىنا مونيتورينگتى كۇشەيتۋ، جالاقى جانە الەۋمەتتىك تولەمدەر بويىنشا بەرەشەكتى ازايتۋ جونىندە پارمەندى شارالار قابىلداۋ.

سوڭعى جاڭالىقتار

ۇقساس جاڭالىقتار