پارلامەنت • 18 قىركۇيەك، 2020

جوعارعى سوت وتباسىلىق داۋلاردى شەشۋدىڭ جاڭا سيپاتىن تانىستىردى

14 رەت كورسەتىلدى

سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەلەرى جوعارعى سوتتا بولىپ، جوعارعى سوت توراعاسىمەن جانە سۋديالارىمەن سوت جۇيەسى سالاسىنداعى زاڭنامانى جەتىلدىرۋ ماسەلەلەرى بويىنشا جۇمىس كەزدەسۋىن وتكىزدى، دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.

سەنات دەپۋتاتتارى جوعارعى سوت كوممۋنيكاتسيالار ورتالىعىنىڭ قىزمەتىمەن تانىستى، ونىڭ جۇمىسى سوتتاردىڭ حالىقپەن كەرى بايلانىسىن جاقسارتۋعا، باق پەن الەۋمەتتىك جەلىلەردەگى سىني جاريالانىمدارعا جەدەل دەن قويۋعا باعىتتالعان.

جوعارعى سوت توراعاسى جاقىپ اسانوۆ سوت جۇيەسىن ودان ءارى جاڭعىرتۋ بويىنشا قابىلدانىپ جاتقان شارالار تۋرالى ايتىپ بەردى. ونىڭ ىشىندە سۋديالاردى ىرىكتەۋ راسىمدەرىن، ولاردى باعالاۋ جانە جاۋاپكەرشىلىگىن ارتتىرۋ جۇيەسىن جەتىلدىرۋ تۋرالى حاباردار ەتتى.

سونداي-اق، ازاماتتىق سوت ءىسىن جۇرگىزۋدى ودان ءارى جەتىلدىرۋ، تەرگەۋ سوتتارىنىڭ جۇمىسىن وڭتايلاندىرۋ، اكىمشىلىك ادىلەت جۇيەسىن ەنگىزۋ جانە باسقا دا ماڭىزدى تاقىرىپتار تالقىلاندى. سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى ۆلاديمير ۆولكوۆ جاڭا اكىمشىلىك راسىمدىك-پروتسەستىك كودەكسىنىڭ قابىلدانۋىن ماڭىزدى وقيعا ەكەنىن اتاپ ءوتتى.

"پرەزيدەنت قاسىم-جومارت توقاەۆتىڭ قازاقستان حالقىنا جولداۋىندا قىلمىستىق پروتسەسكە تارتىلعان ازاماتتاردىڭ قۇقىقتارىن قامتاماسىز ەتۋ، سوتتاردىڭ ءادىل جانە زاڭدى شەشىمدەر شىعارۋى، جاڭا كاسىبي كادرلاردى تارتۋ، سۋديالاردى ىرىكتەۋدىڭ اشىقتىعىن قامتاماسىز ەتۋ ماسەلەلەرىنە ەرەكشە نازار اۋداردى. سونىمەن قاتار مەملەكەت باسشىسى «قۇقىقتىق مەملەكەتتىڭ ماڭىزدى شارتى – تۋرالىقتان تانبايتىن ءادىل سوت تورەلىگىنىڭ بولۋى» ەكەنىن ايتتى. وسىعان وراي دەپۋتاتتاردى دا مەملەكەت باسشىسى جاريا ەتكەن بارلىق باستامالاردى ىسكە اسىرۋ بويىنشا ۇلكەن جۇمىس كۇتىپ تۇر"، دەدى ۆلاديمير ۆولكوۆ.

دەپۋتاتتارعا وتباسىلىق داۋلاردى قارايتىن جالپى يۋريسديكتسيا سوتتارى قاتىساتىن «وتباسىلىق سوت» پيلوتتىق جوباسى تانىستىرىلدى. جوبا اياسىندا سۋديالارعا پسيحولوگتار، مەدياتورلار جانە باسقا دا ماماندار كومەك كورسەتەدى. جوبا باستاماشىلارى مۇنداي تاجىريبە داۋلاردى ءتيىمدى شەشۋگە، وتباسىلاردى ساقتاۋعا جانە كامەلەتكە تولماعان بالالاردىڭ مۇددەلەرىن قورعاۋعا مۇمكىندىك بەرەتىنىنە سەنىمدى.

كەزدەسۋدە COVID-19 پاندەمياسى جانە كارانتين كەزىندەگى سوت ورگاندارىنىڭ جۇمىسى تۋرالى دا ايتىلدى.

ساپار بارىسىندا سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى ۆلاديمير ۆولكوۆ قازاقستاندىق قۇقىقتىق جۇيە ءبىر ورىندا تۇرمايتىنىن، سوت ارقىلى قورعاۋ تەتىكتەرى جەتىلدىرىلىپ جاتقانىن اتاپ ءوتتى. زاماناۋي حالىقارالىق ستاندارتتاردى ەسكەرە وتىرىپ قابىلدانعان زاڭدار سوت قۇرىلىسىن جاڭعىرتۋعا، سوت تورەلىگىنىڭ اشىقتىعى مەن ايقىندىعىن، سوت ىستەرىن قاراۋدىڭ تيىمدىلىگى مەن ساپاسىن ارتتىرۋعا، بيلىكتىڭ سوت تارماعىنىڭ تاۋەلسىزدىگىنە جانە سۋديالاردىڭ مارتەبەسىن ارتتىرۋعا باعىتتالعانىن جەتكىزدى.

دەپۋتاتتىق كورپۋس ءوز كەزەگىندە مەملەكەت باسشىسىنىڭ بارلىق تاپسىرمالارىن ىسكە اسىرۋ ءۇشىن زاڭنامالىق قولداۋدى ساپالى ءارى جەدەل قامتاماسىز ەتەتىن بولادى.

سوڭعى جاڭالىقتار

نامىسىن تۋ ەتكەن

رۋحانيات • كەشە

ۇقساس جاڭالىقتار