وقيعا • 18 قىركۇيەك، 2020

«وزەكتى ماسەلە» – پىكىرتالاس الاڭى

175 رەت كورسەتىلدى

ەلوردادا «JASTAR: ózekti másele» پىكىرتالاس الاڭىنىڭ العاشقى ءماجىلىسى ءوتىپ، ساراپشىلار مەملەكەت باسشىسىنىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋى مەن جاستار ساياساتىنداعى وزەكتى ماسەلەلەردى تالقىلادى.

پرەزيدەنت قازاقستان حالقىنا ارناعان جولداۋىندا بۇگىنگى كۇننىڭ باستى ماقساتى – ساپالى ۇلت قالىپتاستىرىپ، حالىق دامۋىنىڭ جاڭا پاراديگماسىن قۇرۋ ەكەندىگىن اتاپ ءوتتى. سونداي-اق ەل الدىندا تۇرعان كۇردەلى دە، ۇلكەن ماسەلەلەردى ءساتتى شەشۋ ءۇشىن جاڭا كوزقاراس، ورتاق جۇيە جانە جان-جاقتى قولداۋ قا­جەت­تى­گىن ەسكە سالدى. وسى ورايدا «رۋ­حا­ني جاڭعىرۋ» قازاقستاندىق قو­عامدىق دامۋ ينستيتۋتىنىڭ جا­نىنداعى «جاستار» عىلىمي-زەرت­تەۋ ورتالىعى «JASTAR: ózekti másele» الاڭى جۇمىسىن باستادى.

اشىق پىكىرتالاس ۇيىم­داس­تى­رىپ، جاڭا كوزقاراستاردى ءبىر ارنادا توعىستىرۋ ءۇشىن ال­عاش­قى ماجىلىسكە جاس تا بولسا، تاجىريبەسى مول، ءىرى جوبالار­دا ۇلكەن جەتىستىكتەرگە قول جەت­كى­زىپ، ءوز سالالارىندا ايتۋلى پروب­لەمالاردىڭ ءتۇيىنىن شەشىپ جۇر­گەن جاستار شاقىرىلدى. اقپارات جانە قوعامدىق دامۋ ۆي­تسە-ءمينيسترى اسقات ورالوۆتىڭ ايتۋىنشا، «JASTAR: ózekti má­sele» الاڭى قوعامداعى تۇيت­كىل­دەر­دى ءار سالاداعى بىلىكتى ماماندارمەن بىر­گە اتقارىپ شەشۋ ءۇشىن تاپتىرماس ورىن.

«جاھاندىق پاندەميا قوعام­نىڭ الەۋمەتتىك-ەكو­نو­ميكالىق جاعدايىنا ۇلكەن وزگەرىستەر جاساپ، كۇندەلىكتى تۇرمىس-تىرشىلىككە تۇبەگەيلى تۇزەتۋ ەنگىزدى. وسى ور­اي­دا مەملەكەت باسشىسىنىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋى بار­لىق تۇيتكىلدى ماسەلەلەردىڭ شە­شى­مىن تابۋعا سەرپىن بەرۋى ءتيىس. پرەزيدەنت ادام كاپيتالىنىڭ دامۋىنا دا ۇلكەن ءمان بەردى. وسى ورايدا ەرتەڭگى قوعامنىڭ نەگىزگى ىرگەتاسى بۇگىنگى وسكەلەڭ ۇرپاق، ياعني جاستار ەكەنىن ەسكەرۋىمىز كەرەك»، دەدى ا.ورالوۆ.

ءوز كەزەگىندە ماجىلىسكە قا­تى­سۋ­شىلار پرەزيدەنت جولداۋىنىڭ نە­گىز­گى باعىتتارىن تالقىلاپ، قا­زاق­­ستان جاستارىنىڭ ماسەلەسىنە دە توقتالدى. وسى ورايدا سا­راپ­شى­­لار تاراپىنان حالىقتىڭ سا­نا­سىن جاڭعىرتۋعا باعىتتالعان باس­تامالار دا ۇسىنىلدى. سونى­مەن قاتار پاندەميا كەزىندە جاس ما­مانداردى جۇمىسپەن قام­تۋ ما­سەلەسى دە كوتەرىلىپ، الەۋ­مەت­تىك كاسىپكەرلىككە كوڭىل بولۋ­گە شاقىردى. «Green TAL» الەۋ­مەتتىك شەبەرلىك قوعامىنىڭ نەگى­زىن قالاۋشى ەمين اسكەروۆتىڭ پى­كىرىنشە، بۇگىنگىنىڭ باستى ماق­سات­تارىنىڭ ءبىرى – پاتريوت جاس­تار­دى تاربيەلەپ، سانالى قوعام  قا­لىپتاستىرۋ.

– پاندەميادان تۋعان داع­دا­رىس­تىڭ سالدارىنان قازىر جۇمىس ورىندارى قاتتى قىسقارىپ جاتىر. سالدارىنان اۋىلداردا مار­­گينال جاستار كوبەيىپ كەتتى. سونداي-اق شەتەلگە ءبىرجولا كەتىپ قالۋدى اڭسايتىن ازاماتتاردىڭ دا كوپتىگى الاڭداتادى. وسىنداي جاعدايلارعا توسقاۋىل بولۋ ءۇشىن ەلدەگى ەكونوميكالىق جاعدايدى جاقسارتىپ، جاستاردىڭ ساناسىن جاڭعىرتاتىن جوبالار قاجەت. بۇل رەتتە الەۋمەتتىك كاسىپكەرلەردى قولداۋىمىز كەرەك. ولاردىڭ سانى قازاقستاندا 250 عانا. سالىس­تىرمالى تۇردە ايتايىق، ۇلى­بر­يتانيادا 70 مىڭ الەۋمەتتىك كاسىپكەرلىك توپ تىركەلسە، اقش-تا ولاردىڭ سانى 160 مىڭنان اسادى ەكەن. الەۋمەتتىك بيزنەس تۇتىنۋشىلاردىڭ ناقتى ءبىر پروبلەمالارىن شەشۋ ماقساتىندا پايدا بولىپ، قوعامنىڭ الەۋ­مەت­تىك وسال توپتارىنىڭ ماسەلەلەرىن شە­شەدى. سوندىقتان مۇنداي جو­­بالاردى قولداۋ ارقىلى ءبىز حا­­لىقتىڭ الەۋمەتتىك احۋالىن جاق­سار­تامىز، – دەدى ە.اسكەروۆ.

ءماجىلىستىڭ قورىتىندىسى بو­يىن­شا ساراپشىلاردىڭ بار­لىق ۇسى­نىستارى سالالىق مامان­دار­­دىڭ وڭدەۋىنە بەرىلىپ، ءارى قاراي جۇزەگە اسىرىلۋى ءۇشىن ءتيىستى جۇمىستار جۇرگىزىلەتىن بولادى. «رۋحاني جاڭعىرۋ» ققدي باسقارماسىنىڭ توراعاسى دانيار ەسيننىڭ ايتۋىنشا، الەمنىڭ دامىعان 30 ەلىنىڭ قاتارىنا كىرۋ ءۇشىن قوعام بولىپ بىرىگىپ، كوزى اشىق، باسەكەگە قابىلەتتى جاستاردى بىرلەسە تاربيەلەۋىمىز قاجەت.

«بيىل «رۋحاني جاڭعىرۋ» باعدارلاماسىنا 3 جىل جانە ونىڭ باستى ۇستانىمدارى كوپ جاعدايدا جاستارعا ارنالعان. سوندىقتان جاستار ساياساتى تۇرعىسىنداعى ماسەلەلەردى شەشۋ جانە قوعام اراسىنداعى بايلانىستى ورناتۋ قۇندى دۇنيە. وسىنداي پىكىرتالاس الاڭدارىن ۇيىمداستىرىپ، جاس­ت­ار­دىڭ زاماناۋي كوزقاراسى ار­قى­لى قوعامنىڭ تۇيتكىلدى ماسە­لە­­لەرىن وڭتايلى شەشۋگە ابدەن بو­لادى»، دەدى د.ەسين.

دوڭگەلەك ۇستەلگە اقپارات جانە قوعامدىق دامۋ مينيسترلىگى جاستار جانە وتباسى كوميتەتىنىڭ توراعاسى شاحماردان بايمانوۆ، «جاستار» عزي ديرەكتورى ايان ساكوشەۆ، پارلامەنت سەناتى اپپارات جەتەكشىسىنىڭ ورىنباسارى ماكسيم سپوتكاي، «اتامەكەن» ۇلتتىق كاسىپكەرلەر پالاتاسى» باسقارما توراعاسىنىڭ ورىنباسارى ولجاس ورداباەۆ، جوعارعى سوت اپپاراتى جەتەكشىسىنىڭ ورىنباسارى نۇرسۇلتان بايتىلەسوۆ، كاسىپوداقتار فەدەراتسياسى تورا­عاسىنىڭ ورىنباسارى قايرات جاڭابەكوۆ، سونداي-اق عى­لى­مي جانە شىعارماشىلىق قوعام­داس­تىقتىڭ وكىلدەرى، قوعام قاي­رات­كەرلەرى مەن ساراپشىلار قاتىستى.

سوڭعى جاڭالىقتار

ۇقساس جاڭالىقتار