قازاقستان • 17 قىركۇيەك، 2020

ماشينا جاساۋ سالاسىنىڭ جاڭا جاعدايدا دامۋى

28 رەت كورسەتىلدى

قازاقستان ماشينا جاساۋشىلارىنىڭ VIII فورۋمى جانە "Kazakhstan Machinery Fair 2020" ماشينا جاساۋ جانە مەتالل وڭدەۋ جونىندەگى ءى حالىقارالىق مامانداندىرىلعان كورمە ونلاين فورماتتا جۇمىسىن باستادى، دەپ حابارلايدى Egemen.kz.

ءىس-شارا ۇيىمداستىرۋشىلارى – قر يندۋستريا جانە ينفراقۇرىلىمدىق دامۋ مينيسترلىگى جانە قازاقستان ماشينا جاساۋشىلار وداعى.

فورۋمنىڭ ءبىرىنشى پانەلدىك تالقىلاۋىنا قر پرەمەر-ءمينيسترىنىڭ ورىنباسارى رومان سكليار، قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ، سونداي-اق ماشينا جاساۋ كاسىپورىندارىنىڭ، ءبىلىم جانە عىلىم ۇيىمدارىنىڭ، ۇلتتىق كومپانيالار مەن دامۋ ينستيتۋتتارىنىڭ جەتەكشىلەرى مەن وكىلدەرى قاتىستى.

بەيبىت اتامقۇلوۆ "2019-2025 جىلدارعا ارنالعان ماشينا جاساۋدى دامىتۋ جونىندەگى جول كارتاسىن" ىسكە اسىرۋ تۋرالى بايانداماسىندا 2019 جىلدىڭ قورىتىندىسىندا نەگىزگى كاپيتالعا سالىنعان ينۆەستيتسيا كولەمى 1 ترلن 472 ملرد تەڭگەنى قۇراعانىن اتاپ كورسەتتى. بيىلعى 8 ايدا ءوندىرىس كولەمى 16،3% ارتىپ، 341،2 ملرد تەڭگە سوماعا 45 مىڭ اۆتوموبيل ءوندىرىلدى. مەملەكەت پەن بيزنەستىڭ بىرلەسكەن جۇمىسى ناتيجىسىندە 367 ملرد تەڭگەگە 128 جوبا تابىستى ىسكە اسىرىلىپ، 16 مىڭ جۇمىس ورنى اشىلدى.    

بۇگىنگى تاڭدا قازاقستاندا ءاربىر ەكىنشى ساتىپ الىنعان اۆتوموبيل - وتاندىق ءونىم. بۇل - بىرلەسكەن جۇمىستىڭ جاقسى كورسەتكىشى.

قازاقستاندىق ءاۆتووندىرىس ونىمدەرى ەكسپورتقا شىعارىلا باستادى. جىل باسىنان بەرى رەسەي، بەلارۋس جانە وزبەكستانعا 4700 كولىك ەكسپورتتالدى.

فورۋمنىڭ ەكىنشى پانەلدىك تالقىلاۋى ماتەريالدار مەن قۇراستىرۋشىلار قۇنىن تومەندەتۋ تەتىكتەرىنە ارنالدى.

وتكىزىلگەن 6 سەكتسيا اياسىندا تەمىر جول، مۇناي-گاز، تاۋ-كەن مەتاللۋرگيا، ەلەكتروتەحنيكا، اۋىل شارۋاشىلىعى ماشينالارىن جانە اۆتوموبيل جاساۋ سالالارىن دامىتۋ ماسەلەلەرى تالقىلاندى.  

فورۋم قورىتىندىسىندا ماشينا جاساۋ سالاسىن ءارى قاراي دامىتۋ جونىندە ناقتى ۇسىنىستار ازىرلەنىپ، العا قويىلعان مىندەتتەردى بىرلەسىپ شەشۋ ءۇشىن ەل ۇكىمەتىنە جىبەرىلەدى.  

سوڭعى جاڭالىقتار

ۇقساس جاڭالىقتار