قازاقستان • 17 قىركۇيەك، 2020

نۇر-سۇلتاندا ماشينا جاساۋشىلار فورۋمى وتۋدە

20 رەت كورسەتىلدى

بۇگىن نۇر-سۇلتان قالاسىندا ونلاين فورماتتا قازاقستان ماشينا جاساۋشىلارىنىڭ VIII فورۋمى (بۇدان ءارى – فورۋم) جانە ماشينا جاساۋ جانە مەتالل وڭدەۋ جونىندەگى ءبىرىنشى حالىقارالىق مامانداندىرىلعان "Kazakhstan Machinery Fair 2020" كورمەسى وتۋدە، دەپ حابارلايدى Egemen.kz.

فورۋمدى قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگى مەن قازاقستان ماشينا جاساۋشىلار وداعى ۇيىمداستىردى.

بيىلعى جىلى فورۋمنىڭ تاقىرىبى - "جاڭا شىنايىلىق جاعدايىندا ماشينا جاساۋدى دامىتۋ". فورۋمدا ماشينا جاساۋ سالاسىن دامىتۋ پەرسپەكتيۆالارى، سونداي-اق "ماشينا جاساۋدى دامىتۋ جونىندەگى 2019-2024 جىلدارعا ارنالعان جول كارتاسىن" ىسكە اسىرۋ بارىسى تالقىلانۋدا.

فورۋمنىڭ اشىلۋىنا پرەمەر-ءمينيستردىڭ ءبىرىنشى ورىنباسارى رومان سكليار قاتىسىپ، قاتىسۋشىلاردى ۇكىمەت اتىنان قۇتتىقتادى. پرەزيدەنت قاسىم-جومارت توقاەۆتىڭ ەلدىڭ وڭدەۋ سالاسىن، سونىڭ ىشىندە ماشينا جاساۋ سالاسىن دامىتۋ جونىندە ناقتى مىندەتتەر قويعانىن ايتتى. يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ تارتىمدى بايانداما جاسادى. فورۋمنىڭ اشىلۋىنا قازاقستان ماشينا جاساۋشىلار وداعىنىڭ توراعاسى مەيرام پىشەنباەۆ جەتەكشىلىك جاسادى.

فورۋمنىڭ ءبىرىنشى پانەلدىك پىكىرسايىسى شەڭبەرىندە ماشينا جاساۋ سالاسىنىڭ باسەكەگە قابىلەتتىلىگىن ارتتىرۋ ءۇشىن بازالىق وندىرىستەردى قۇرۋ مەن دامىتۋعا، سونداي-اق قاتتى پايدالى قازبالار مەن كومىرسۋتەك شيكىزاتىن جەر قويناۋىن پايدالانۋشىلاردىڭ ساتىپ الۋلارىندا جەرگىلىكتى قامتۋدى رەتتەۋ مەن دامىتۋعا ەرەكشە نازار اۋدارىلدى.

فورۋمنىڭ ەكىنشى پانەلدىك پىكىرتالاسى ءونىمنىڭ سوڭعى تۇرلەرىن شىعارۋ كەزىندە پايدالانىلاتىن ماتەريالدار مەن جيىنتىقتاۋىشتاردىڭ قۇنىن تومەندەتۋ تەتىكتەرىنە، ورتا مەرزىمدى پەرسپەكتيۆادا جەرگىلىكتى قامتۋدى دامىتۋعا سونداي-اق ماشينا جاساۋ ونىمدەرىنىڭ ەكسپورتىن ىلگەرىلەتۋ ماسەلەلەرىنە ارنالىپ وتىر.

سونىمەن قاتار 6 سەكتسيالىق وتىرىستار جوسپارلانعان: تەمىر جول، مۇناي-گاز، تاۋ-كەن مەتاللۋرگيا، ەلەكتر تەحنيكالىق، اۋىل شارۋاشىلىعى ماشينالارىن جاساۋ مەن اۆتوموبيل جاساۋ، سونداي-اق جالپى ماشينا جاساۋ تەحنولوگيالارىن دامىتۋ باعىتتارى بويىنشا.

فورۋم جۇمىسىنىڭ قورىتىندىسى بويىنشا ماشينا جاساۋ سالاسىن ودان ءارى دامىتۋ بويىنشا ناقتى ۇسىنىستار ازىرلەنەدى. وسى ۇسىنىستار قويىلعان مىندەتتەردى بىرلەسىپ شەشۋ ءۇشىن ۇكىمەتكە جىبەرىلەدى.

10 جىلدىق يندۋستريالاندىرۋ كەزەڭىندە ماشينا جاساۋ سالاسىندا مىناداي ناتيجەلەرگە قول جەتكىزىلدى:

1) ءوندىرىس كولەمى 4 ەسە ءوستى.

2) ينۆەستيتسيالار 2،5 ەسە ءوسىپ، 59 ملرد.تەڭگەنى قۇرادى.

3) ەكسپورت كولەمى 3 ەسەگە جۋىق ءوسىپ، 1،1 ملرد 2019 جىلدىڭ قورىتىندىسى بويىنشا 1 ترلن 472 ملرد تەڭگە (نكي 124،1% - دى قۇرادى).

2020 جىلدىڭ 8 ايىندا سالاداعى ءوندىرىس كولەمى 16،3% - عا ءوستى.

سوڭعى جاڭالىقتار

ۇقساس جاڭالىقتار