قازاقستان • 07 قىركۇيەك، 2020

قازاقستاندا جول قاۋىپسىزدىگىن باعالاۋدىڭ حالىقارالىق IRAP جۇيەسى ەنگىزىلە باستادى

45 رەت كورسەتىلدى

يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتى ازيا بانكىنىڭ قولداۋىمەن جول قاۋىپسىزدىگىن باعالاۋدىڭ حالىقارالىق IRAP جۇيەسىن ەنگىزۋ جوباسىن ىسكە اسىرا باستادى. بۇل تۋرالى مينيسترلىكتىڭ ءباسپاسوز قىزمەتى حابارلايدى، - دەپ جازادى Egemen.kz

جوبانى شۆەدتىك SweRoad كومپانياسى «قازاق جول قوزعالىسى قاۋىپسىزدىگى عىلىمي-زەرتتەۋ ينستيتۋتىمەن» بىرلەسىپ جۇزەگە اسىرۋدا. 

جول-كولىك وقيعالارى – جاس ازاماتتاردىڭ اراسىنداعى ءولىم-ءجىتىمنىڭ باستى سەبەپتەرىنىڭ ءبىرى. وسى ورايدا، جىل سايىن جولداردا 1،35 ميلليون ادام قازا تابادى. بۇل وزەكتى ماسەلەگە حالىقارالىق دەڭگەيدە كوپ كوڭىل بولىنۋدە. بىرىككەن ۇلتتار ۇيىمى الداعى ون جىلدا جول اپاتىنان بولاتىن قايعىلى وقيعالار سانىن 2 ەسەگە ازايتۋ مىندەتىن قويىپ وتىر.

قازاقستاندا جول قاۋىپسىزدىگىن باعالاۋدىڭ حالىقارالىق IRAP  جۇيەسىن ەنگىزۋ جوباسىن جۇزەگە اسىرۋ  شەڭبەرىندە رەسپۋبليكالىق جانە قالالىق اۆتوموبيل جولدارىنىڭ 6200 شاقىرىمىندا باعالاۋ جۇمىستارى جۇرگىزىلەتىن بولادى. ونى "جول اكتيۆتەرى ساپاسىنىڭ ۇلتتىق ورتالىعى" رمك مەن "قازاقستان جول عىلىمي-زەرتتەۋ ينستيتۋتى" اق-نىڭ بىلىكتى ماماندارى جۇرگىزەدى.

باعالاۋ جۇمىستارى ارنايى قوندىرعىمەن جابدىقتالعان اۆتوموبيلدە جۇزەگە اسىرىلادى. مالىمەتتەر 50-دەن استام پارامەتر بويىنشا ءار 100 مەتر سايىن جازىلىپ وتىرادى. جۇلدىزدى رەيتينگ 5 ۇپايلىق شكالا بويىنشا جول قوزعالىسىنىڭ بارلىق قاتىسۋشىلارى ءۇشىن  بولەك-بولەك بەرىلەدى. جول قوزعالىسى قاتىسۋشىلارىنىڭ بارلىعى ءتيىستى كوڭىلسىز قالدىرىلمايتىندىقتان مۇنداي ينكليۋزيۆتى شارا  جۇيەنىڭ تيىمدىلىگىن ارتتىرادى. جۇلدىزدى رەيتينگ انىقتالعاننان كەيىن جول-كولىك وقيعالارىن قالىپتاستىرۋ تاۋەكەلدەرىنىڭ دەڭگەيىن تومەندەتۋگە باعىتتالعان ينۆەستيتسيالىق جوسپار جاسالادى، سوعان سايكەس اعىمداعى كەمشىلىكتەر تۇزەتىلىپ، جەتىلدىرىلىپ وتىرۋى ءتيىس.

بۇل ءادىس تەك قاۋىپتىلىگى جوعارى جەرلەردى انىقتاپ قانا قويماي، سونىمەن قاتار بارلىق جول ۋچاسكەلەرىن تولىق تالداۋعا، اپات دەڭگەيى تومەن، ەڭ قاۋىپسىز ءبولىمدى قالاي جاقسارتۋعا بولاتىندىعىن باعالاۋعا مۇمكىندىك بەرەدى.

جوبا جول قوزعالىسى قاۋىپسىزدىگى سالاسىندا ۇلتتىق ساراپشىلاردىڭ الەۋەتىن جوعارىلاتۋعا، حالىقارالىق دەڭگەيدە باعالاۋ شارالارىن جۇرگىزە الاتىن مامانداردىڭ پۋلىن قالىپتاستىرۋعا سەپتىگىن تيگىزبەك.  جوبا ناتيجەسى بويىنشا "جول اكتيۆتەرى ساپاسىنىڭ ۇلتتىق ورتالىعى" رمك، "قازاقستان جول عىلىمي-زەرتتەۋ ينستيتۋتى" اق، "قازاق جول قوزعالىسى قاۋىپسىزدىگى عىلىمي-زەرتتەۋ ينستيتۋتى"  جشس  جانە جوعارى وقۋ ورىندارى  بازاسىندا IRAP ۇلتتىق ءبىلىم پلاتفورماسى قۇرىلادى. سونداي-اق، IRAP-تى ەنگىزۋ بويىنشا ۇلتتىق زاڭناماعا وزگەرىستەردى ەنگىزۋ جونىندەگى ۇسىنىستار دايىندالاتىن بولادى.

باعالاۋ جۇمىستارى تامىز ايىنىڭ باسىندا الماتى وبلىسى مەن الماتى قالاسىندا جۇرگىزىلە باستادى. اتالمىش شارالار قىركۇيەك جانە قازان ايلارىندا اقمولا، سولتۇستىك قازاقستان، قوستاناي، اقتوبە، قىزىلوردا، تۇركىستان، جامبىل جانە الماتى وبلىستارىندا جالعاسپاق.

سوڭعى جاڭالىقتار

ۇقساس جاڭالىقتار