پارلامەنت • 14 تامىز، 2020

سەناتورلار ونلاين-كەزدەسۋ وتكىزدى

14 رەت كورسەتىلدى

بۇگىن پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ دەپۋتاتتارى كوروناۆيرۋس پاندەمياسى كەزىندە حالىقتى ءدارى-دارمەكپەن قامتاماسىز ەتۋ جانە گۋمانيتارلىق كومەكتى ءبولىپ، تاراتۋ ماسەلەسى بويىنشا دەنساۋلىق ساقتاۋ، سىرتقى ىستەر، قارجى مينيسترلىكتەرىنىڭ جانە تاعى باسقا مۇددەلى ۆەدومستۆولاردىڭ باسشىلارىمەن ۆيدەو-كونفەرەنتسيا فورماتىندا كەزدەسۋ وتكىزدى. بۇل تۋرالى Egemen.kz قر پارلامەنتى سەناتىنىڭ ءباسپاسوز قىزمەتىنە  سىلتەمە جاساپ حابارلادى. 

مەملەكەت باسشىسى قاسىم-جومارت توقاەۆ 10 شىلدەدە وتكەن ۇكىمەتتىڭ كەڭەيتىلگەن وتىرىسىندا ىندەتتىڭ قازاقستانعا تيگىزگەن زاردابىنىڭ سەبەپتەرىنە توقتالىپ، ونىڭ الدىن الۋدىڭ ناقتى شارالارىن انىقتاپ بەرگەن بولاتىن.

سوعان وراي بۇگىنگى كەزدەسۋگە قاتىسۋشىلار الدا تۇرعان مىندەتتەردى بىرلەسىپ ىسكە اسىرۋ جونىندە پىكىر الماسىپ، ءوز ويلارىن ورتاعا سالدى.

سىرتقى ىستەر ءمينيسترى مۇحتار تىلەۋبەردى، دەنساۋلىق ساقتاۋ ءمينيسترى الەكسەي تسوي جانە ءبىرىنشى قارجى ۆيتسە-ءمينيسترى بەرىك شولپانقۇلوۆ وسى باعىتتا اتقارىلعان جۇمىستار بويىنشا بايانداما جاسادى.

ءىس-شاراعا قاتىسقان سەنات توراعاسىنىڭ ورىنباسارى اسقار شاكىروۆ قازىرگى تاڭدا دەپۋتاتتار جۇمىستارىن وڭىرلەردە جالعاستىرىپ جاتقانىن، بۇل ءوز كەزەگىندە ەلىمىزدە قالىپتاسقان احۋالدى ناقتى باعالاۋعا مۇمكىندىك بەرەتىنىن تىلگە تيەك ەتتى.

كەزدەسۋ بارىسىندا دەنساۋلىق ساقتاۋ مينيسترلىگىنىڭ باسشىلىعىنا قاراتىپ باسقا ۆەدومستۆولارمەن جانە وڭىرلەرمەن تىعىز بايلانىستا جۇمىس ىستەۋ كەرەكتىگى ايتىلدى. ويتكەنى ءالى كۇنگە دەيىن ءدارى-دارمەكتى جونەلتۋدە، اسىرەسە، شالعاي اۋداندارعا جەتكىزۋدە كەشىگۋ جايتتارى جانە ولاردىڭ باعاسىنا قاتىستى ماسەلەلەر تىركەلۋدە. بۇل حالىقتىڭ نارازىلىعىن تۋدىراتىن جاعداي. وسىعان وراي «سك-فارماتسيا» جشس-نىڭ باستاماسىمەن قۇرىلاتىن ءتيىستى جۇمىس توبىنا پارلامەنت دەپۋتاتتارىن قوسۋ ۇسىنىلدى. سونداي-اق، اتالعان توپقا ازاماتتىق قوعامنىڭ بىلىكتى وكىلدەرىن قوسۋ ماسەلەسى دە ءسوز بولدى. سەناتورلاردىڭ سوزىنە قاراعاندا، بۇل باعىتتاعى جۇمىستار بارىنشا اشىق ءارى باقىلاۋدا بولۋعا ءتيىس.

1

سونىمەن قاتار سەنات دەپۋتاتتارى دەنساۋلىق ساقتاۋ مينيسترلىگى وڭىرلەردى قاجەتتى پەرپاراتتارمەن قامتاماسىز ەتۋ ماسەلەسى بويىنشا ناقتى مالىمەتتەردى ءبىلىپ قانا قويماي، بۇل ۇدەرىستى تىڭعىلىقتى جانە كۇندەلىكتى مونيتورينگ جۇرگىزۋ ارقىلى ۇيلەستىرۋ كەرەكتىگىنە دە نازار اۋداردى. ءدارىحانالاردىڭ كوتەرمە-بولشەك جەلىلەرىنىڭ جۇمىسىن جولعا قويۋعا، ونىڭ ىشىندە باعا ماسەلەسىنە ەرەكشە كوڭىل ءبولىندى.

سونىمەن قاتار كەزدەسۋدە شەت مەملەكەتتەردەن كەلگەن گۋمانيتارلىق كومەكتى قابىلداۋ، ءبولۋ جانە قاجەتتىلىككە قاراي ولاردىڭ قۇرامى كەڭىنەن تالقىلاندى. بۇل ماسەلە بويىنشا ەلىمىزدىڭ سىرتقى ىستەر مينيسترلىگىمەن ۇيلەسىمدى جۇمىس ىستەۋ ۇسىنىلدى.

ودان بولەك، ءىس-شاراعا قاتىسۋشىلار پاندەميامەن كۇرەس كەزىندە حالىققا كورسەتىلەتىن ۆولونتەرلىك كومەكتىڭ اياسىن كەڭەيتۋ جانە سوعان بايلانىستى قازىرگى نورماتيۆتىك-قۇقىقتىق بازانى جەتىلدىرۋ ماسەلەلەرىن تالقىلادى.

سەنات دەپۋتاتتارى دەرتى اسقىنعان جاندارعا (سوزىلمالى، ونكولوگيالىق، جۇرەك اۋرۋلارى جانە ت.ب.) كورسەتىلەتىن مەديتسينالىق كومەكتى قالپىنا كەلتىرۋدىڭ دە ماڭىزدى مىندەت ەكەنىن نازاردان تىس قالدىرمادى. مۇندايكومەكتىڭ دەڭگەيى ىندەتكە بايلانىستى سوڭعى ايلارداايتارلىقتاي تومەندەگەنى بەلگىلى.

«سەنات دەپۋتاتتارى دەنساۋلىق ساقتاۋعا قاتىستى ماسەلەلەردى باقىلاۋدا ۇستاپ وتىر جانە ءاردايىم قاجەتتى كومەك كورسەتۋگە دايىن. ازاماتتاردىڭ ومىرىنە قاۋىپ توندىرگەن اۋىر جاعدايدان كەيىن دە ءبىر اي ۋاقىت ءوتتى. ەندى قايتىپ ونداي ولقىلىقتارعا جول بەرۋگە بولمايدى»، – دەدى جوعارعى پالاتانىڭ ۆيتسە-سپيكەرى اسقار شاكىروۆ.

كەزدەسۋ ناتيجەسىندە، دەپۋتاتتاردىڭ وڭىرلەردەگى ساپارلارى جالعاسىپ جاتقانى ەسكەرىلىپ، قاتىسۋشىلار الداعى ۋاقىتتا بىرلەسە جۇمىس ىستەۋ جونىندە ورتاق مامىلەگە كەلدى. اتالعان ءىس-شاراعا سەناتورلار قايرات قوجامجاروۆ، دانا نۇرجىگىتوۆا جانە نۇرجان نۇرسيپاتوۆ قاتىستى.

 

سوڭعى جاڭالىقتار

ۇقساس جاڭالىقتار