قوعام • 14 تامىز، 2020

ىندەت جۇقتىرۋ قارقىنى تەجەلدى

14 رەت كورسەتىلدى

اپتانىڭ ءار دۇيسەنبىسىندە دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ كوروناۆيرۋس ينفەكتسيا­سى­نا قاتىستى جاعدايدى باياندايتىن بولادى. بۇل تۋرا­لى ورتالىق كوممۋنيكاتسيالار قىزمەتىندەگى ءباسپاسوز ءماس­لي­حا­تىندا ايتىلدى.

«دەنساۋلىق ساقتاۋ مينيس­­تر­لىگىنىڭ رەسمي وكىلى رەتىن­دە اپتا سايىن ەلىمىزدەگى ەپي­دە­ميا­لىق احۋال جونىندە جانە حالىققا كورسەتىلىپ جاتقان مەدي­تسينالىق جاردەم تۋرالى اقپارات بەرىپ تۇرامىز. سونى­مەن قاتار ىندەتكە قارسى كۇرەستىڭ ناتيجەلەرى جا­يىن­­دا باياندايمىز. وسى وراي­دا دەنساۋلىق ساقتاۋ مينيس­ترلى­گى­نىڭ وزىندىك مەديا ورتا­لى­عى ىسكە قوسىلعانىن ەسكە سالعىم كەلەدى. ونىڭ نەگىزگى مىندەتى – قوعامدىق ورتامەن، اق­پارات قۇرالدارىمەن جانە مەملەكەتتىك ورگاندارمەن ارا­دا­عى بايلانىستى نىعايتۋ. مي­نيس­ترلىكتىڭ اتىنا كەلىپ تۇسەتىن ارىز-شاعىمدارعا جەدەل جاۋاپ بەرۋگە ءازىرمىز. ءباسپاسوز ماجىلىسىندە قويىلاتىن سۇ­راق­تاردان بولەك، مەنىڭ جەكە پاراقشاما جىبەرىلگەن سۇراق­تار­دى، الەۋمەتتىك جەلىدە ايتىلاتىن ساۋالداردىڭ بارلىعىن قام­تۋعا تىرىسامىز»، دەدى باعدات قوجاحمەتوۆ.

بۇعان قوسا دەنساۋلىق ساقتاۋ مينيسترلىگىنىڭ رەسمي وكىلى كوروناۆيرۋستى جۇقتىرۋ ءوسىمى توقتاعانىن اتاپ ءوتتى.

«قازاقستاندا كوروناۆيرۋس­­­تى جۇقتىرۋ ءوسىمى توقتادى. ەل بويىنشا جاعداي ايتارلىقتاي جاقساردى. اتقارۋشى بيلىك احۋالدى قاتاڭ باقىلاۋدا ۇستاپ وتىر. مەديتسينالىق قاۋىم­داستىقتىڭ سانيتارلىق-ەپي­دە­ميا­لىق قىزمەتى وزىنە جۇك­تەل­گەن مىندەتىن تولىق كولەمدە ورىن­داپ جاتىر. وسى­لاي­شا ەلى­مىز ەڭ كۇردەلى كەزەڭدى ارتتا قالدىردى دەسەك بولادى. بىراق جەتكەن جەتىستىككە قۋانىپ، بو­ساڭسۋعا بولمايدى. ەندىگى مىن­دە­تىمىز – ىندەتتى جۇقتىرۋ مەن ءولىم-ءجىتىمدى توقتاتۋ. وسى رەتتە بارشا قازاقستاندىقتارعا ساني­تارلىق ەرەجەلەردى ورىن­داۋ­­­­عا شاقىرامىن»، دەدى ب.قوجاحمەتوۆ.

رەسمي ستاتيستيكاعا توق­تال­عان ول كوروناۆيرۋسقا شال­دىققان ناۋقاستاردىڭ اراسىندا 246 ادامنىڭ دەنساۋلىعى ناشار، 69 ادامنىڭ دەنساۋلىعى وتە ناشار ەكەنىن مالىمدەدى. بيىل 13 ناۋرىزدان باس­تاپ قازاقستاندا كوروناۆيرۋس ينفەكتسياسىمەن 99 442 ادام اۋىردى. جازىلىپ شىق­قان ناۋقاستاردىڭ سانى – 72 523 نەمەسە 72،9 پايىز. ستاتسيونارلاردا 4 713 ناۋقاس ەم قابىلداۋدا جانە 20 937 ادام امبۋلاتورلىق جاعدايدا ەمدەلۋدە. جالپى 70 ناۋقاس وكپەنى جاساندى جەلدەتۋ اپپاراتىندا جاتىر. سوڭعى ءبىر تاۋلىكتە COVID-19 ۆيرۋسىن 741 ادام جۇقتىردى.

«1 تامىزدان باستاپ كوروناۆيرۋس ينفەكتسياسى جانە وعان ۇقساس بەلگىلەرى بار پنەۆمونيا دەرەكتەرىن ستاتيستيكا قاتارىنا قوستىق. وسىدان كەيىن ەلىمىز ىندەتتىڭ تارالۋ كورسەتكىشى بو­يىنشا الەمدىك رەيتينگتە ءبىر ساتىعا عانا كوتەرىلدى. بۇعان دەيىن ءبىز 27-ورىندا بولساق، قازىر 26-ورىنعا تۇراقتادىق. بىراق بۇل كورسەتكىشكە قاراپ جىگەردى جاسىتۋعا بولمايدى، ءبىز ءۇشىن ەڭ ماڭىزدىسى – كۇرەستى كۇشەيتىپ، جاعدايدى ودان ءارى جاقسارتۋ. قابىلدانعان شارالاردىڭ ناتيجەسىندە قازىر قولىمىزدا جان-جاقتى سارا­لانعان مالىمەتتەر بار. بۇل بىزگە بولاشاققا جوسپار قۇرىپ، الدىن الا دايىندالۋدا مۇمكىندىك بەرەدى. ياعني ىندەتتىڭ كۇزدە كۇتىلەتىن جاڭا تولقىنىنا قارسى تۇرۋ ءۇشىن ماتەريالدى ءارى ادامي رەسۋرس­تار­دى تولىعىمەن دايىنداۋعا جاع­داي جاسالدى»، دەدى ب.قوجاحمەتوۆ.

سونداي-اق ول ەلىمىزدە ءدارى-دار­مەك تاپشىلىعى ماسەلەسى قالاي شەشىلىپ جاتقانىن ايتتى.

«پروۆيزورلىق ورتا­لىق­تار­دا جەدەل ارەكەت ەتۋ ءۇشىن مەدقىزمەتكەرلەردى دايىنداۋدان بولەك، ءدارى-دارمەكتەرمەن تولىقتىرۋ بويىنشا اۋقىمدى جۇمىس اتقارىلۋدا. كۆي-عا ۇقساس بەلگىلەرى بار پنەۆمونيا­مەن سىرقاتتانعان ناۋقاستار ءۇشىن الدىن الا ءبىر ايلىق قورعا ەسە­پ­تەلىنگەن اپپاراتتار ساتىپ الىندى. وڭىرلەرگە 8،7 ملرد تەڭگەنىڭ 91 ءتۇرلى ءدارى-دارمەگى جونەلتىلدى. بۇل ورتاشا ەسەپپەن 40 مىڭ ناۋقاسقا جەتەدى»، دەدى ب.قوجاحمەتوۆ.

ونىڭ سوزىنە قاراعاندا، 15 تامىزدان باستاپ تاعى ەكى ايعا جەتەتىن قور ازىرلەنەدى. ستاتسيونارداعى 200 مىڭ ناۋ­قاس­قا جەتەتىن ءدارى-دارمەكتىڭ 50 ءتۇرى ازىرلەندى. سونىمەن قاتار امبۋلاتورلىق جاعدايدا ەم الاتىن ءبىر ميلليون ناۋقاستى ەمدەۋ­گە ارنالعان ءدارى-دار­مەك­تىڭ 5 ءتۇرىن ساتىپ الۋ پروتسەسى اياقتالۋدا. ءدال وسىنداي اۋقىمدى شارالار العاشقى رەت قا­بىلدانىپ وتىر.

«سىرقاتتانىپ، ۆيرۋس جۇق­تى­رۋ بويىنشا كۇدىك­تەن­سە­ڭىز، تىركەلگەن ەمحاناعا بارىپ قارالساڭىز بولادى. ەگەر ۆيرۋس جۇق­تىرعانىڭىز انىقتالسا، بۇ­رىنعىداي ءدارىحانا جاعالاپ جۇرمەي-اق قويىڭىزدار! بار­لىق ەمحانالاردا قاجەتتى ءدارى-دارمەك بار جانە اقىسىز بە­رى­لە­دى. اتاپ ايتقاندا، پاراتسەتامول، يبۋپروفەن جانە باسقا دا قاجەتتى پرەپاراتتار ەلىمىزدىڭ بارلىق ەمحاناسىنا جەتكىزىلەدى. ءدارى-دارمەكتەردى جەتكىزۋ «سق-فارماتسيا» كومپانياسى تاراپىنان جۇرگىزىلىپ جاتىر»، دەدى ول.

 

سوڭعى جاڭالىقتار

تسيرك - الەم نازارىندا

قازاقستان • كەشە

ۇقساس جاڭالىقتار