قوعام • 03 تامىز، 2020

قمدب: قۇربان ايتتىڭ ءۇش كۇنىندە 81 301 جانۇياعا ەت تاراتىلدى

38 رەت كورسەتىلدى

قازاقستان مۇسىلماندارى ءدىني باسقارماسى قوعام الدىنداعى قايىرىمدىلىق قىزمەتىن جانداندىرا ءتۇسۋ ماقساتىندا جانە ەلىمىزدەگى ەپيدەميولوگيالىق جاعداي كەزىندە مۇسىلماندىق مىندەتتى كەدەرگىسىز اتقارۋعا وڭتايلى ۇسىنىس رەتىندە www.qurban2020.kz جوباسىن ىسكە قوستى.

سانيتارلىق تالاپتاردى ساقتاي وتىرىپ، وسى جوبانى جوعارى دەڭگەيدە جۇزەگە اسىرۋ ءۇشىن ءار ايماقتا جۇمىس توبى قۇرىلدى. قمدب وكىلدىگى جانىنان قۇرىلعان جۇمىس توبى تاۋلىك بويى قىزمەت ەتتى. وسى جوباعا ءدىن قىزمەتكەرلەرىمەن قوسقاندا 3 924 ەرىكتى، 872 كولىك جۇمىلدىرىلدى. ەلىمىز بويىنشا الدىن الا بەلگىلەنگەن 35 ستاتسيونارلىق قاساپحانادا 394 قاساپشى جۇمىس ىستەدى. ال ءار وڭىردەگى ورتالىقتاندىرىلعان جۇمىس توبىندا 447 ادام قىزمەت ەتتى. رەسپۋبليكا بويىنشا 25 سall-ورتالىق qurban2020 جوباسى بويىنشا ءتيىستى كەڭەس پەن اقپارات بەرۋمەن اينالىستى.

ەلىمىز بويىنشا www.qurban2020.kz سايتىنا قاشىقتان قۇربان شالۋعا تاپسىرىس بەرگەن ازاماتتاردىڭ ۋاكىلدىك قۇرباندىعى تولىعىمەن ورىندالدى.

يگى ىسكە ۇلەس قوسقان ەرىكتىلەر مەن مەشىت جاماعاتىنىڭ بەلسەندى جۇمىسىنىڭ ناتيجەسىندە 81 301 مۇقتاج وتباسىعا قۇرباندىق ەتى جەتىكىزىلدى. جەر-جەردەگى قارتتار، جەتىمدەر، بالالار ۇيلەرى مەن اۋرۋحانالاردا دا قايىرىمدىلىق شارالارى وتكىزىلدى. مەرەكەلىك قۋانىشقا بولەنگەن جاندار ايرىقشا العىستارىن ايتۋدا.

ايتا كەتسەك، قمدب-نىڭ ايماقتاعى وكىلدەرى ايتتىڭ ءبىرىنشى كۇنىندە (31.07.2020) كومەككە ءزارۋ 30 715وتباسىعا قۇرباندىق ەتىن ۇلەستىردى. ال ايتتىڭ ەكىنشى كۇنىندە (01.08.2020) 27 741 جانۇيا مەرەكەلىك قۋانىشقا بولەندى. قۇربان ايتتىڭ ءۇشىنشى كۇنىندە (02.08.2020) 22 845 وتباسىعا ەت تاراتىلدى. جالپى العاندا، ياعني بارلىق وبلىستى قامتىعاندا قۇربان ايتتىڭ ءۇش كۇنىندە 81 301 جانۇياعا ەت جەتكىزىلدى.

قازاقستان مۇسىلماندارى ءدىني باسقارماسى قايىرىمدىلىق شاراسىنا بەلسەندى اتسالىسقان ازاماتتارعا، جەرگىلىكتى اكىمدىك وكىلدەرىنە، سونداي-اق جەكەلەگەن كاسىپورىندار مەن ۇيىمداردىڭ باسشىلارىنا ايرىقشا العىس ايتادى.

سوڭعى جاڭالىقتار

تاعى ءبىر اكىم قىزمەتىنەن كەتتى

ايماقتار • بۇگىن، 18:06

مەننيدىڭ تاعى ءبىر مارتتىگى

كاسىپقوي بوكس • بۇگىن، 16:32

ۇقساس جاڭالىقتار