ءبىلىم • 17 شىلدە، 2020

قازاقستاندا اۋىل مەكتەپتەرىن قولداۋ بويىنشا جاڭا جوبا ىسكە قوسىلدى

75 رەت كورسەتىلدى

"Aitas KZ" اق "نازارباەۆ زياتكەرلىك مەكتەپتەرى" دببۇ-مەن بىرگە "اۋىل مەكتەبى" جوباسىن ىسكە قوستى. بۇل تۋرالى Egemen.kz نازارباەۆ زياتكەرلىك مەكتەبىنىڭ ءباسپاسوز قىزمەتىنە سىلتەمە جاساپ حابارلايدى.

7 شىلدەدە "Aitas KZ" پەن "نازارباەۆ زياتكەرلىك مەكتەپتەرى" دببۇ (نزم) "اۋىل مەكتەبى" جوباسىن ۇيىمداستىرۋ بويىنشا ىنتىماقتاستىق تۋرالى مەموراندۋمعا قول قويدى. جوبا تۇراقتى دامۋ ستراتەگياسى اياسىندا اقمولا وبلىسىنىڭ بۇلاندى اۋدانى مەن شىعىس قازاقستان وبلىسىنىڭ ۇلان، كاتونقاراعاي اۋداندارىنداعى 4 مەكتەپتە جۇزەگە اسىرىلادى.

اۋىلدى ەلدىمەكەندەگى ءبىلىم

قازاقستاندىق مەكتەپتەردىڭ 72،2%-ى اۋىلدى ەلدىمەكەندەردە (stat.gov.kz) ورنالاسقان. سونىمەن بىرگە اۋىلدى ەلدىمەكەندەردە وقۋشىلاردىڭ 46%-ى ءبىلىم الادى. سەبەبى ەلدەگى مەكتەپتەردىڭ 49،4%-ى شاعىن جيناقتى مەكتەپتەر بولىپ سانالادى. ودان بولەك اۋىلداعى مەكتەپتەردىڭ اسىرەسە وقۋ قۇرالدارىمەن جەتكىلىكتى دەڭگەيدە جاساقتالماۋى مەن ءبىلىم الۋ مۇمكىندىكتەرىنىڭ تومەن دەڭگەيى ەرەكشە بايقالادى.

سونداي-اق قازاقستاندىق وقۋشىلار سوڭعى 10 جىلدا حالىقارالىق PISA-2018 15 جاسقا دەيىنگى وقۋشىلاردىڭ فۋنكتسيونالدىق ساۋاتتىلىعىن زەرتتەۋ ناتيجەلەرى بويىنشا العاش رەت ساۋاتتىلىق دەڭگەيىنىڭ تومەندەگەنىن كورسەتىپ وتىر. قالا مەن اۋىل اراسىنداعى ءبىلىم ساپاسىنىڭ الشاقتىعى 37 بالدى قۇراعان.

"Aitas KZ" اق پەن "نزم" دببۇ جوبا باستاماشىلارىنىڭ ويىنشا، قوعامنىڭ، بيلىك پەن بيزنەستىڭ ءوزارا ءتيىمدى ىنتىماقتاستىعى اۋىلدى ايماقتاردا تۇراقتى دامۋ ستراتەگياسىن جۇزەگە اسىرۋعا جانە نزم تاجىريبەسىن ەلدەگى جالپى ءبىلىم بەرەتىن مەكتەپتەرگە ترانسفەر جۇرگىزۋگە مۇمكىندىك بەرەدى.

2011 جىلدان باستاپ "نازارباەۆ زياتكەرلىك مەكتەپتەرى" دەربەس ءبىلىم بەرۋ ۇيىمدارى ءوز تاجىريبەسىن ەلدەگى ورتا ءبىلىم بەرۋ جۇيەسىنە ترانسلياتسيالاۋ بويىنشا جۇيەلى جۇمىس جۇرگىزىپ كەلەدى. بۇل – ۇيىم جۇمىسىنىڭ باسىمدىققا يە ءارى ستراتەگيالىق باعىتتارىنىڭ ءبىرى بولىپ سانالادى.

"قازاقستان رەسپۋبليكاسىنىڭ پرەزيدەنتى توقاەۆتىڭ 2019 جىلدىڭ 2 قىركۇيەگىندەگى جولداۋىنا سايكەس الەۋمەتتىك جاڭعىرتۋدىڭ جاڭا كەزەڭىندە جانە قالا مەن اۋىل مەكتەپتەرىنىڭ اراسىنداعى ورتا ءبىلىم بەرۋ ساپاسى الشاقتاپ جاتقان ۋاقىتتا، وقۋشىلاردىڭ ءبىلىم ساپاسىن ارتتىرۋ ماقساتىندا التى ايماقتىڭ اكىمدىگى "اۋىل مەكتەبى" جوباسىن پيلوتتى رەجيمدە باستاۋ ءۇشىن 14 ءبىلىم بەرۋ ۇيىمىن ىرىكتەپ الدى. اتالمىش جوبا اياسىندا دببۇ وقۋ جانە تاربيە بەرۋ پروتسەسىنە، ونىڭ ىشىندە ساباقتاردى باقىلاپ، وقۋ جەتىستىكتەرىنە مونيتورينگ جاساي وتىرىپ زەرتتەۋ جۇرگىزدىك. مونيتورينگ ناتيجەلەرى نەگىزىندە وقۋشىلارعا ادىستەمەلىك قولداۋ كورسەتىلدى. مۇعالىمدەردى كاسىبي تۇرعىدا شىڭداۋ جانە ماتەريالدىق-تەحنيكالىق بازانى جاقسارتۋ بويىنشا ۇسىنىستار ازىرلەندى، مەكتەپتەردى دامىتۋدىڭ جوسپارى جاسالدى"، - دەدى جوبا جايلى "نازارباەۆ زياتكەرلىك مەكتەپتەرى" دببۇ باسقارما توراعاسى كۇلاش ءشامشيدينوۆا.

نزم ىسكە اسىراتىن جوبانىڭ نەگىزگى مىندەتتەرى – مەكتەپ ينفراقۇرىلىمىن تۇگەندەۋ جانە اۋىلداعى ءبىلىم بەرۋ قىزمەتىنىڭ ساپاسىن ارتتىرۋ. ءوز كەزەگىندە "Aitas KZ" اق مەكتەپتەردىڭ جابدىقتالۋىن قامتاماسىز ەتىپ، جوبانى قارجىلاندىرادى. جەرگىلىكتى اتقارۋشى ورگاندار مەكتەپتەردە جوندەۋ جۇمىستارى مەن جاڭا وقۋ جىلىنا دايىندىقتى جۇرگىزەدى.

"ىنتىماقتاستىقتىڭ وسىنداي فورماتى ايماقتارداعى قازىرگى ءبىلىم بەرۋ ماسەلەلەرىن شەشۋگە مۇمكىندىك بەرەدى. بۇل تاجىريبە ەلدىڭ باسقا ايماقتارىندا دا وسىعان ۇقساس جوبالاردى دامىتۋعا جول اشادى. نزم-نىڭ جالپى ءبىلىم بەرۋ سالاسىنداعى مۇمكىندىكتەرى اۋىلدىق مەكتەپتەر دەڭگەيىندە دە، ەلدىڭ باسقا قالالارىنىڭ دەڭگەيىندە دە قىزىقتى. جوبانىڭ جۇزەگە اسىرىلۋى ءوز ناتيجەسىن ءسوزسىز كورسەتەدى. الايدا قازىردىڭ وزىندە قول جەتكىزگەن جەتىستىگىمىزدى وڭ ناتيجە دەپ باعالاۋعا بولادى"، - دەپ اتاپ ءوتتى "Aitas KZ" اق باس ديرەكتورى سەرىك تولىقپاەۆ.

 "اۋىل مەكتەبى" جوباسى كەلەسى جۇمىس باعىتتارىن كوزدەيدى:

  1. اۋىل مەكتەپتەرىنىڭ كۇشتى جانە ءالسىز جاقتارىن، سونىمەن بىرگە ورتا ءبىلىم بەرۋ ۇيىمدارىنىڭ قاجەتتىلىگىن زەرتتەۋ.
  2. ءبىلىم بەرۋ قىزمەتىن ۇسىنۋدىڭ شارتتارى مەن ساپاسىن جاقسارتۋ بويىنشا ۇسىنىستاردى ازىرلەۋ.
  3. دببۇ تاجىريبەسىن ەسەپكە الا وتىرىپ، وقىتۋدى ۇيىمداستىرۋدىڭ، وقىتۋدىڭ، باعالاۋدىڭ، تاربيە بەرۋ جۇمىستارىنىڭ يننوۆاتسيالىق تاجىريبەلەرى مەن تەحنولوگيالارىن ەنگىزۋ.

ماتەريالدىق-تەحنيكالىق بازانى جاقسارتۋ جۇمىسى جىلدار بويىنشا جۇرگىزىلەدى:

  • 2020 جىل: مەكتەپتەردىڭ دياگنوستيكاسى; كابينەتتەردى جابدىقتاۋ (ينفورماتيكا، روبوتوتەحنيكا، ۇلدار ءۇشىن ينجەنەريا مەن قىزدار ءۇشىن ەڭبەك كابينەتى); قۇرىلىمدالعان كابەلدى جەلى مەن بج (باعدارلامالىق جاساقتاما); مۇعالىمدەردىڭ بىلىكتىلىگىن ارتتىرۋ، مەكتەپ كەڭىستىگىن ۇيىمداستىرۋ;
  • 2021 جىل: كابينەتتەردى جابدىقتاۋ (حيميا، فيزيكا، بيولوگيا، مۋزىكا، جاراتىلىستانۋ، سپورت جانە اكت زالى); وقۋشىلاردىڭ بىلىكتىلىگىن ارتتىرۋ;
  • 2022 جىل: باستاۋىش، نەگىزگى جانە جوعارعى مەكتەپتەردىڭ كابينەتتەرىن جابدىقتاۋ.

مۇعالىمدەردىڭ بىلىكتىلىگىن ارتتىرۋ جۇمىسى 2020 جىلى بۇكىل جوسپارلى جۇمىستارمەن قاتار جۇرگىزىلەدى.

قازىرگى ۋاقىتتا ءبىرىنشى كەزەڭنىڭ بولىگى جۇزەگە اسىرىلعان. ياعني جوباعا ەنگىزىلگەن مەكتەپتەرگە دياگنوستيكا جۇرگىزىلدى (كاتونقاراي مەن ۇلكەن نارىن اۋىلى، قاسىم قايسەنوۆ كەنتى، ماكينسك قالاسى). سونىمەن بىرگە وسى جىلدىڭ ءساۋىر ايىنان باستاپ نزم پەداگوگيكالىق شەبەرلىك ورتالىعىنىڭ ماماندارىنىڭ قاتىسۋىمەن "كوگنيتيۆتى (تانىمدىق) پروتسەستەردى دامىتۋ: نازار، ەستە ساقتاۋ، سويلەۋ، ويلاۋ"، "ساباقتاعى كەرى بايلانىس: تۇرلەر، ۇسىنىس نۇسقالارى"، "دارىندى بالالاردى وقىتۋدىڭ امال-ادىستەرى" جانە تاعى باسقا تاقىرىپتا مەكتەپ مۇعالىمدەرىنە ارنالعان 20 ۆەبينار وتكىزىلدى.

كوزدەلگەن مىندەتتەردى جۇزەگە اسىرۋدىڭ ماڭىزدى اسپەكتتەرى – وقۋشىلار ءۇشىن دە، مۇعالىمدەر ءۇشىن دە وقۋ پروتسەسى بولىپ ەسەپتەلەدى. مۇعالىمدەردى وقىتۋ ءۇشىن دە بىرقاتار كەشەندى شارا جۇزەگە اسىرىلادى. ولار: پەداگوگتار ءۇشىن بىلىكتىلىكتى ارتتىرۋ كۋرسى، ساباق بەرۋ مەن وقىتۋ ادىستەمەسى بويىنشا سەمينارلار; نزم مەن باسقا دا بازاداعى تاعىلىمدامالار مەن وقىتۋلار.

جۇرگىزىلگەن جۇمىستاردىڭ قورىتىندىسى بويىنشا مەكتەپتەگى ءبىلىم بەرۋدىڭ جاڭا دەڭگەيىن اۋىلدى ەلدىمەكەندەردەگى 3000 وقۋشى الادى. جوبانىڭ جالپى بيۋدجەتى 800 ميلليون تەڭگەنى قۇرايدى. سونىمەن بىرگە جەرگىلىكتى اتقارۋشى ورگاندارمەن كەلىسىم بويىنشا جوباعا قاتىساتىن مەكتەپتەردە 2021 جىلدىڭ سوڭىنا دەيىن مەملەكەتتىك قاراجات ەسەبىنەن جوندەۋ جۇمىستارى جۇرگىزىلەدى.

 

سوڭعى جاڭالىقتار

بيزنەستە ايەلدەردىڭ ۇلەسى قانداي؟

ەكونوميكا • بۇگىن، 07:38

بايراعى بيىك باعزى ونەر

رۋحانيات • بۇگىن، 07:33

ورازانىڭ ءار ءساتى ساۋاپ

رۋحانيات • كەشە

ءسوزدىڭ جەتى بوياۋى

تانىم • كەشە

ۇقساس جاڭالىقتار