ساياسات • 14 شىلدە، 2020

ناۋقاندا ايەلدەردىڭ بەلسەندىلىگى جوعارى

20 رەت كورسەتىلدى

ورتالىق سايلاۋ كوميسسياسىنىڭ (وسك) كەزەكتى وتىرىسىندا وبلىستاردىڭ، استانانىڭ، رەسپۋبليكالىق ماڭىزى بار قالالاردىڭ اۋماقتىق سايلاۋ كوميسسيالارىنىڭ پارلامەنت سەناتى دەپۋتاتتىعىنا وڭىرلەر بويىنشا كانديداتتار ۇسىنۋ قورىتىندىلارى باياندالدى.

كوميسسيا وتىرىسى كوروناۆيرۋس ىندەتىنەن قايتىس بولعانداردى ەسكە الۋمەن باستالدى. وسك تور­اعاسى بەرىك يماشەۆ ءبىر مينۋت ۇنسىزدىك جاريالاپ، «بۇگىن – پاندەميادان قۇربان بولعان وتانداس­تارىمىزدى جالپىۇلتتىق ازا تۇتۋ كۇنى. سايلاۋ جۇيەسى قىز­مەتكەرلەرىنىڭ اراسىندا دا اۋىر قازا بار. الماتى وبلىسى تەكەلى قالاسىنىڭ اۋماقتىق سايلاۋ كوميسسياسى توراعاسىنىڭ ورىنباسارى باكەن جامانقۇلوۆ قايتىس بولدى. باكەن تۇزەلبەك ۇلىنىڭ تۋعان-تۋىستارىنا قايعىسىنا ورتاق­تاسىپ كوڭىل ايتامىز. وسىعان وراي ءبىر مينۋت ۇنسىزدىكپەن بارلىق قازا بولعانداردى ەسكە الۋدى ۇسى­نامىن»، دەدى.

وتىرىس بارىسىندا پارلامەنت سەناتى دەپۋتاتتىعىنا 94 كاندي­داتتىڭ ۇسىنىلعانى ءمالىم بولدى. «2020 جىلعى 13 ماۋسىم مەن 12 شىلدە ارالىعىندا رەس­پۋبليكا بويىنشا قازاقستان رەسپۋبليكاسى پارلامەنتى سە­نا­تىنىڭ دەپۋتات­تىعىنا بار­لىعى 94 كانديدات ۇسىنىلدى. سالىس­تىرمالى تۇردە، 2017 جىلى سەناتقا كەزەكتى سايلاۋدا 89 كان­ديدات ۇسىنىلسا، 2014 جىلى – 88، 2011 جىلى – 96 كانديدات ۇسى­نىلعان بولاتىن»، دەدى وسك تور­اعاسى بەرىك يماشەۆ.

وسىلايشا پارلامەنتتىڭ جو­عار­عى پالاتاسىنىڭ دەپۋتات­تارىن سايلاۋدىڭ سوڭعى ءتورت سايلاۋ ناۋقانى بويىنشا سەنا­توردىڭ ءبىر مانداتىنا ۇسى­نۋ قورىتىندىسى بويىنشا ورتاشا ەسەپپەن 5-تەن استام ۇمىتكەر كەلەدى.

بيىل ۇمىتكەرلەردىڭ كوپشىلىگى الماتى وبلىسىنان. كوميسسيا ۇسىنعان دەرەككە سايكەس، الماتى وبلىسىنان 9، نۇر-سۇلتان قالا­سىنان 8، الماتى قالاسىنان 7 ادام ۇسىنىلعان، ال شىعىس قازاقستان، قوستاناي وبلىستارى مەن شىمكەنت قالاسىنان 4 ۇمىتكەردەن تىركەلىپ، تومەن كورسەتكىش كورسەتىپ وتىر.

قازىرگى سايلاۋ بارىسىندا سە­نات­قا ءوزىن ءوزى ۇسىنۋ قۇقىعىن پايدا­لانعان 82 كانديدات بار، ياع­ني 87%-دى قۇراپ وتىر (سالىستىر­مالى تۇردە، 2017 جىلى 92،1%، 2014 جى­لى 82،9%، 2011 جىلى 82،7%). بۇل رەتتە ءماسليحاتتار 12 كانديدات ۇسىن­دى (2017 جىلى 7 نەمەسە 7،9%).

سونداي-اق ب.يماشەۆ سايلاۋ ناۋقاندارىنداعى ايەلدەردىڭ ساياسي بەلسەندىلىگىن اتاپ ءوتتى. ونىڭ ايتۋىنشا، ۇسىنىلعان ۇمىتكەرلەردىڭ ىشىندە 19 ايەل بار (2017 جىلى – 13، 2014 جىلى – 5، 2011 جىلى – 6).

ۇمىتكەرلەردىڭ ورتاشا جاسى 51،1-ءدى قۇرايدى (2017 جىلى – 51،9، 2014 جىلى – 54،1; 2011 جىلى – 53،3). ەڭ جاس ۇمىتكەر 30 جاستا، ۇمىتكەر­لەردىڭ الدى 69 جاستا.

بيىلعى دەپۋتاتتىققا ۇمىت­كەر­­لەردىڭ 29-ى ينجەنەر، 20-سى ەكونوميست، 12-ءسى پەداگوگ، 10-ى زاڭگەر، 10-ى اگرارلىق سالا قىز­مەتكەرى بولسا، جەتەۋى دارىگەر، ۇشەۋى جۋرناليست ەكەن. ولارعا قوسا 1 ساياساتتانۋشى بار.

ۇسىنىلعان كانديداتتاردىڭ اراسىندا كوممەرتسيالىق قۇرى­لىمداردىڭ 38 قىزمەتكەرى، مەم­لەكەتتىك ۇيىمداردىڭ، كاسىپ­ورىندار مەن مەكەمەلەردىڭ 23 قىز­مەتكەرى، 18 مەملەكەتتىك قىزمەتشى، 9 قوعامدىق ۇيىمداردىڭ وكىلى، 2 جۇ­مىسسىز بار. سونداي-اق قىزمەتتەگى 4 سەناتور ءوز كانديداتۋرالارىن قايتا ۇسىندى.

سەنات دەپۋتاتتىعىنا كاندي­دات­تاردى تىركەۋ پروتسەسى ءالى ءجۇرىپ جاتىر، ول 2020 جىلدىڭ 23 شىلدەسىنە دەيىن جالعاسپاق. بي­ىلعى 13 شىلدەدەگى جاعداي بويىنشا وبلىستىق، رەسپۋبليكالىق ما­ڭىزى بار قالالار مەن استانانىڭ ساي­لاۋ كوميسسيالارى سەنات دەپۋ­تاتتىعىنا 62 كانديداتتى تىركەدى.

وتىرىستا سايلاۋ ناۋقانى ساي­لاۋ زاڭناماسىنا سايكەس ءوتىپ جاتقانى جانە ورتالىق سايلاۋ كوميسسياسىنىڭ تۇراقتى باقى­لاۋىندا ەكەنى ەسكەرتىلدى.

 

سوڭعى جاڭالىقتار

شىمكەنتتە 5 شاعىناۋدانعا گاز جۇيەسى تارتىلۋدا

وڭتۇستىك قازاقستان • بۇگىن، 16:05

COVID-19: ابدىراعان ارگەنتينا

الەم • بۇگىن، 11:25

ۇقساس جاڭالىقتار