ساياسات • 14 شىلدە، 2020

كاسىبىنە ادال ازامات

945 رەت كورسەتىلدى

بۇگىندە جامبىل اۋداندىق پوليتسيا باسقارماسى جەرگىلىكتى پوليتسيا قىزمەتىنىڭ جەرگىلىكتى پوليتسيا ينسپەكتورى بولىپ قىزمەت اتقاراتىن پوليتسيا اعا لەيتەنانتى ەرجان سەكسەنباەۆ ىشكى ىستەر سالاسىندا 2015 جىلدان بەرى قىزمەت اتقارىپ كەلەدى. اۋەلى ۇلتتىق قاۋىپسىزدىك كوميتەتى شەكارا قىزمەتىندە قىزمەت ەتكەن. بالا كۇنىنەن قۇقىق قورعاۋ سالاسىنا قىزىعۋشىلىق تانىتقان ەرجان وسىدان بەس جىل بۇرىن ىشكى ىستەر ورگاندارىنا قىزمەت اۋىس­تىرادى.

قازىرگى كەزدە ول جامبىل اۋدانى، قاراتوبە اۋىلدىق وكرۋگىنە جاۋاپتى مامان. سول اۋىلدىڭ ءتارتىبى مەن تىنىشتىعى سونىڭ موينىندا. تۇرعىنداردىڭ قاۋىپسىزدىگىن قامتاماسىز ەتۋدى ءوزىنىڭ ازاماتتىق بورىشى ساناعان جاس پوليتسەي بۇگىندە جەمىستى جۇمىس اتقارىپ ءجۇر.

ەرجان سەكسەنباەۆ – ورىن العان اۋىر، اسا اۋىر قىلمىستاردىڭ ءىزىن سۋىتپاي اشۋ كەزىندە دە ءوزىنىڭ بىلىكتىلىگىن كورسەتە بىلگەن ازامات. وتكەن جىلى وبلىستىڭ جامبىل جانە جۋالى اۋداندارىنىڭ شەكتەسەر تۇسىنداعى «كۇيىك» تاۋ بوكتەرىندە ادام ءولىمى بولعان ەدى. قاندى وقيعانىڭ سوڭىنا تۇسكەن قىراعى پوليتسەي كوپ ۇزاماي قاراقشىنى قولعا تۇسىرگەن. «اتالعان تاۋ بوكتەرىندەگى شەڭگەل اراسىن ارالاپ، كۇدىكتىنى ءىزىن تورۋىلداپ ءجۇرىپ ۇستادىق. ارينە، مۇندايدا ومىرىمىزگە قاۋىپ تونەتىن كەزدەر بولادى»، دەيدى ول.

سونىمەن قاتار جوعالىپ كەتكەن ايەلدى كۇن-ءتۇن دەمەي ىزدەستىرىپ، اقىرى امان-ەسەن تاۋىپ، جاقىندارىمەن قاۋىشتىرعان ازاماتتىعى دا اۋىلدىقتاردىڭ ەسىندە. جالپى العاندا، ەل ءىشى ماسەلەسىز بولمايدى. ۇرلىق، توبەلەس، ىشىمدىك ءىشۋ جانە تاعى دا باسقا سان ءتۇرلى قىلمىس پەن كەلەڭسىزدىكتىڭ الدىن الۋ دا وڭاي شارۋا ەمەس. مۇنداي جاعدايلار كوبىندە تۇرعىنداردىڭ دا ىشكى مادەنيەتىنىڭ تومەندىگىنەن دە بولادى. ال وسىنداي جاعدايلاردىڭ بارىنە جاۋاپ بەرۋ جالعىز ادام ءۇشىن وڭاي بولماسى انىق. سونىمەن قاتار قاراتوبە اۋىلى بۇگىندە جاڭا قۇرىلىس الاڭىنا اينالعاندىقتان، مۇندا پاتەر ۇرلىعى دا كوپ. «بۇل – قازىرگى كەزدەگى نەگىزگى ماسەلە. كوپتەگەن جاعدايدا جەرگىلىكتى تۇرعىندار ءبىر جاققا شىققان كەزىندە ۇيلەرىن دە، زاتتارىن دا قاراۋسىز تاستاپ كەتەدى. سودان كەيىن ارينە، ۇرلىق بولادى. ءبىز اۋىل تۇرعىندارىنا وسى ماسەلە توڭىرەگىندە ءتۇسىندىرۋ جۇمىستارىن ءجيى جۇرگىزەمىز. ودان سوڭ، بۇگىنگى تاڭداعى تاعى ءبىر وزەكتى ماسەلە – وتباسىلىق جانجالدىڭ كوبەيىپ بارا جاتقاندىعى. بىزگە وتباسىلىق جانجال ماسەلەسى توڭىرەگىندە شاقىرتۋ كوپ تۇسەدى»، دەيدى ە.سەكسەنباەۆ.

ارينە، ءتارتىپ ساقشىسىنىڭ مىندەتى – قوعام­دىق ءتارتىپتى قاداعالاۋ، قىلمىستى مەيلىنشە بولدىرماۋ، بولماسا ونىڭ الدىن الۋ. بۇل رەتتە تاڭەرتەڭ ۇيىنەن شىعىپ، ءتۇننىڭ ءبىر ۋاعىندا عانا ۇيىنە ورالاتىن ە.سەكسەنباەۆ وزىنە ارتىلعان وسىناۋ مىندەتتى جەتە تۇسىنەتىنىن ايتادى. ونىڭ ايتۋىنشا، جاستار ۇرلىق، ىشىمدىك ءىشۋ، توبەلەسۋ سياقتى ءتۇرلى دەڭگەيدەگى قىلمىستاردان وسى كەزدەن باستاپ اۋلاق بولۋى كەرەك. سول ءۇشىن كۇن سايىن قاراتوبە اۋىلىندا تۇنگى ساعات ون بىردەن كەيىن جاسوسپىرىمدەر اراسىندا رەيد جۇرگىزىلەدى. «بۇگىندە اۋىل جاستارىنىڭ ءتارتىبى جاقسى. ەگەر كوشەدە تۇندە بالالاردى كورىپ قالساق، ولاردىڭ اتا-انالارىنا دا، وزدەرىنە دە ەسكەرتۋ جاسايمىز. سەبەبى، بالانىڭ بولاشاعى بۇگىنىمەن تىكەلەي بايلانىستى»، دەيدى ول.

بۇگىندە جامبىل اۋدانىنىڭ قاراتوبە اۋى­لىندا پوليتسيا ينسپەكتورى بولىپ قىزمەت اتقارىپ جۇرگەن ە.سەكسەنباەۆ جامبىل وبلىسى، سارىسۋ اۋدانى يگىلىك اۋىلىندا دۇ­نيەگە كەلىپتى. الايدا جۇمىس بابىمەن جام­بىل اۋدانىنا قونىس اۋدارعان. اعا لەي­تە­نانت بۇگىندە مەملەكەتتىڭ ىشكى ىستەر سالاسى­نىڭ قىزمەتكەرلەرىنە ءتيىستى قولداۋ كورسەتىپ وتىرعانىن دا جەتكىزدى. ول وتباسىمەن مەملە­كەتتىڭ جەڭىلدىگىنىڭ ناتيجەسىندە، تاراز قالا­سىنان پاتەر دە العان ەكەن. ەندى ول ءوزى سياقتى جاس وتباسىلارعا، ماماندارعا ءتيىستى مۇمكىندىگىن جاساپ وتىرعان مەملەكەتكە ادال قىزمەت ەتۋ­دى باستى مىندەتىم دەپ سانايدى. ءوزىنىڭ تەمىر­دەي تارتىبىمەن، جۇيەلى جۇمىسىمەن كوزگە تۇسكەن ەرجان سەكسەنباەۆ وڭىردەگى ىشكى ىستەر سالاسىنداعى باسشىلاردان دا لايىقتى ماراپاتتارىن الىپتى. سوندىقتان بۇگىندە ءبىر ۇل، ءبىر قىز تاربيەلەپ وتىرعان پوليتسەي ەلىمىزدە ەشقاشان تارتىپسىزدىك پەن قۇقىقبۇزۋشىلىق بولماسا ەكەن دەپ تىلەيدى.

 

جامبىل وبلىسى

 

سوڭعى جاڭالىقتار

ۇقساس جاڭالىقتار