قوعام • 14 شىلدە، 2020

جۇمىس بەرۋشىنىڭ كىناسى كوپ

14 رەت كورسەتىلدى

بيىل 28 مامىردا «اقتوبە حروم قوسىن­دىلارى» اق ۇجىمىندا قايعىلى جاعداي ورىن الدى. اتالعان كاسىپورىننىڭ №4 تسەحىندا اقاۋى بار، سىيىمدىلىعى 50 تەكشە مەترلىك بوشكەنى تازالاۋ كەزىندە كۇيىك الۋدىڭ سالدارىنان ءتورت جۇمىسشى قازا تاپتى. مامانداردىڭ مالىمدەۋىنشە، تەرميالىق دەپ اتالعان كۇيىكتىڭ ءتۇرى ادام ومىرىنە اسا قاۋىپتى، بۇل قۇبىلىس بۋ مەن جالىننىڭ نەمەسە وتە جوعارى تەمپەراتۋراداعى سۇيىقتىقتىڭ پايدا بولۋىنان ورىن الادى ەكەن.

جۇمىسشىلار ولىمىنە كىم كىنالى؟ سالماعى ءزىل ساۋالدىڭ اق-قاراسىن اجىراتۋ ءۇشىن ىلە-شالا ارنايى كوميسسيا قۇرىلىپ، ىسكە كىرىسكەن-ءدى. قازىر كوميسسيا مۇشەلەرى قايعىلى جاعدايدىڭ بولۋىنا جۇمىس بەرۋشىنىڭ كىناسى 80 پايىز مولشەرىندە دەگەن ۇيعارىمعا كەلىپ وتىر. سونىمەن بىرگە زارداپ شەگۋشىلەردىڭ كىناسى 20 پايىز بولعان دەگەن قورىتىندى جاسالعان. كوميسسيا جۇمىس بەرۋشىلەر تاراپىنان ەڭبەك قاۋىپسىزدىگى ەرەجەلەرىن ساقتاۋعا كوڭىل بولىنبەگەنىن انىقتاعان. ءارى جۇمىس ۇدەرىسىن ۇيىمداستىرۋ كەزىندە ونىڭ تومەن دەڭگەيىنە جول بەرىلگەنىنە كوز جەتكىزگەن. ءوندىرىس كەزىندە قازا تاپقانداردىڭ ءبارى دە بىرنەشە جىلدان بەرى اتالعان زاۋىتتا ەڭبەك ەتىپ جۇرگەن تاجىريبەسى مول ازاماتتار ەكەنى بەلگىلى بولىپ وتىر. ولار سول كۇنى ارنايى جۇمىس فورمالارىمەن قامتاماسىز ەتىلگەن. مارقۇمدار قاۋىپسىزدىك ەرەجەلەرىن ساقتاۋ جونىندەگى نۇسقاۋلىقتاردى دا جەتىك بىلەتىن ەدى دەيدى تسەح جۇمىسشىلارى. سوعان قاراماستان بوشكەنىڭ ءتۇبىن تازالاۋ كەزىندە اياق استىنان ىسسى بۋ كوتەرىلىپ، وسى ءىستى اتقارىپ جاتقان ەكى جۇمىسشى قازا تابادى. ءۇشىنشى جۇمىسشى بۋدىڭ اسەرىنەن كورىنبەي قالعان ارىپتەستەرىن قۇتقارىپ قالايىن دەگەن ماقساتپەن ساتىمەن تومەن تۇسەدى. ونىڭ سوڭىنان ءتورتىنشى جۇمىسشى دا جونەلەدى. ايتسە دە قۇتقارۋ نيەتى زايا كەتىپ، تورتەۋى دە قازا تابادى.

اقتوبە وبلىسىنىڭ ەڭبەك ينسپەكتسياسى جونىندەگى باسقارماسىنىڭ ءبولىم جەتەكشىسى قۋانىش قاميەۆ بوشكەنى تازالاۋعا قاتىسىپ، كۇيىك شالعان بەسىنشى ادامنىڭ سوزىنە سۇيەنىپ ايتىپ بەرگەن بۇل قايعىلى جايت ەستىگەن ادامنىڭ جانىن تۇرشىكتىرمەي قويمايدى. «اقتوبە حروم قوسىندىلارى» زاۋىتى باسشىلىعى مەن كاسىپوداق ۇيىمى قايتىس بولعان ازاماتتاردىڭ وتباسىنا 24 ملن تەڭگەگە جۋىق كولەمدە ماتەريالدىق كومەك كورسەتتى. وڭىردەگى ىرگەلى كاسىپورىنعا ورىن العان قايعىلى جاعدايعا بايلانىستى ءىس قۇقىق قورعاۋ ورگاندارىنا تەرگەۋگە جىبەرىلدى.

 

اقتوبە

 

سوڭعى جاڭالىقتار

ۇقساس جاڭالىقتار