ايماقتار • 06 شىلدە، 2020

قاۋلى ورىندالۋىمەن قۇندى

10 رەت كورسەتىلدى

مەملەكەت باسشىسى قاسىم-جومارت توقاەۆتىڭ ەلىمىزدە ەپيدەميالىق جاعدايدى تۇراقتاندىرۋ جونىندە اتقارۋشى ورگانداردىڭ الدىنا قويعان تالاپتارىن ورىناۋ ءۇشىن اقتوبە وبىلسى اۋماعىندا قاتاڭ شەكتەۋ جانە كارانتيندىك شارالار ەنگىزىلدى. بۇل جونىندەگى قاۋلىعا اقتوبە وبلىسىنىڭ باس مەملەكەتتىك سانيتارلىق دارىگەرى نۇرسۇلۋ بەركىمباەۆا قول قويعان. مۇنداي قۇجات بيىلعى 2020 جىلدىڭ كوكتەمىنىڭ العاشقى ايىندا دا قابىلدانعانى بەلگىلى. دەگەنمەن كۆي-دىڭ تارالۋىن بولدىرماۋ جونىندەگى العاشقى قاۋلىمەن سالىستىرا قاراعاندا سوڭعىسىنىڭ سالماعى مەن جۇگى اجەپتاۋىر اۋىر، جاۋاپكەرشىلىگى بارىنشا جوعارى ەكەنىن ايتۋعا ءتيىسپىز.

اڭگىمەمىزدىڭ القيسساسىن بىلايشا تەرەڭنەن قوزعاۋىمىزدىڭ باستى سەبەبى – بۇدان ءۇش اي بۇرىن ىندەت تاپ قازىرگىدەي باسقا شاۋىپ، توسكە ورلەپ كەتپەگەندى. سونداي-اق بۇگىنگى كۇنى ادام ولىمىنە اكەلىپ سوقتىرىپ وتىرعان ۆيرۋستىق پنەۆمونيا دا تىركەلە قويماعاندى. حالىقتىق ۇعىم-تۇسىنىككە سايعاندا: جەر استىنان جىك شىقتى، ەكى قۇلاعى ءتى شىقتى وسى بولدى. ەڭ باستىسى بۇدان ەكى-ءۇش اي بۇرىن بارشا قازاق حالقىنىڭ بەسىگى اتانعان اۋىل مەن ونىڭ تۇرعىندارى ۇل ىندەتتەن ءدىن امان ەدى.

ەندى نە بولىپ جاتقانىن قۇلاقپەن ەستىپ كوزبەن كورگەندە توبە شاشى تىك تۇرعانداي كۇي كەشەسىز. ويتكەنى سوڭعى ۋاقىتتا اۋىلداعى اعايىندار اراسىن دا دا كۆي مەن ۆيرۋستىق پنەۆمونيا دەرەگى كۇننەن كۇنگە ءورشىپ بارادى. وزگەسىن بىلاي قويعاندا وبلىستىڭ ىرعىز جانە ويىل سەكىلدى شالعايداعى اۋداندارىندا اتالعان جۇقپالى دەرتتى جۇقتىرعان تۇرعىندار سانى كوبەيىپ وكپەلەرى قابىنۋى قىنجىلتپاي قويمايدى. ارينە ناۋقاستاردى ەمدەۋ ءۇشىن وبلىس اۋداندارىندا قوسىمشا شارالار بەلگىلەنگەن. اۋرۋحاناعا تۇسكەندەر پتر-دان ءوتىپ تەكسەرىلىپ جاتقانى كوڭىلگە ەداۋىر دەمەۋ.

سونىمەن بىرگە اۋىلداعى اۋرۋحانالار جانىنان قوسىمشا ينفەكتسيالىق بولىمشەلەر اشىلىپ، پروۆيزورلىق ستاتسيونارداعى كەرۋەتتەر سانى كەڭەيتىلۋدە. ەمحانالار جانىنان كۇندىزگى ەم جۇرگىزەتىن ورىندار اشىلعان. ارنايى قويىلعان سەنىم تەلەفونارى مەن ونلاين كەڭەستەر دە اۋىل تۇرعىندارىنىڭ اقپاراتتىق سۇرانىسىن وتەۋگە قىزمەت جاسايدى. بۇل جونىندە گازەت تىلشىسىنە ويىل اۋداندىق اۋرۋحاناسىنىڭ باس دارىگەرى ساندىبەك نۇرباەۆ ايتىپ بەردى.

تۇتاستاي العاندا بۇگىنگى كەزدە وبلىس اۋماعىندا پۋلمانولوگ ماماندارعا دەگەن سۇرانىس كۇرت ءوسىپ كەتتى. ايتسە دە قاجەتتى پروفيلدەگى ماماندار اياق استىنان ساۋ ەتىپ توگىلە قالماسى تاعى دا ايان. سوندىقتان دا ونىڭ تاپشىلىعىن رەتتەۋدىڭ ءبىر جولى رەتىندە نەفرولوگ، تەراپەۆت جانە حيرۋرگتاردى ارنايى حاتتاما بويىنشا وكپەگە ەم جۇرگىزۋگە رۇقسات پەن قۇق بەرۋ شارالارى الىنعان. سونداي-اق وبلىس اۋداندارىندا ءدارى-دارمەكتەر تاپشىلىعى دا بايقالىپ قالادى. ايتەۋىر بۇل ماسەلەنى شۇعىل جولعا قويۋ جونىندە شارالار بەكىتىلگەن.

قانداي قۇبىلىستىڭ دا وزىندىك سەبەبى مەن سالدارى بولماي قالمايدى. العاشقى كاراتين كەزىندە اقتوبە وبلىسىندا ەپيدەميالىق جاعداي تۇراقتى بولعانى ءمالىم. ءتىپتى ءبىر دە ءبىر كۆي جۇقتىرعان تۇرعىندار تىركەلمەگەن كۇندەر دە كەزدەستى. وسىعان قاراپ ىندەت شارىقتاۋ شاعىنا جەتتى دەپ وي قورىتۋدىڭ دا ءجونى بار ەدى. ايتسە دە ەلىمىزدەگى ەكى ايعا سوزىلعان توتەنشە جاعداي رەجيمىنەن كەيىن بلوك-بەكەتتەر الىنىپ اۋىلدار مەن وبلىس ورتالىقتار اراسىنداعى بايلانىستار مەن قارىم-قاتىناستار قالپىنا كەلگەن كەزدە شالعاي ەلدى-مەكەندەردە ىندەتكە شالدىعۋشىلاردىڭ ءوسۋ كورىنىستەرى ورىن الا باستادى. ونىڭ باستى سەبەبى اعايىنداردىڭ دۇعا، ساداقا داستارحاندارى مەن وزگە دە وتباسىلىق شارالارعا بىردەن باس قويۋى، اۋىل مەن قالا تۇرعىنارىنىڭ ارالاسىپ كەتۋى، سيمتومسىز بەلگىسى جوق ازاماتتار ىندەتتىڭ تارالۋىنا تۇرتكى بولۋى دەسەك شىندىقتان اۋىتقي قويماسپىز.

سوڭعى كەزدە: توتەنشە جاعداي مەن قاتاڭ كاراتيندىك رەجيمدى ءارى گە سوزا ءتۇسۋ كەرەك ەدى دەۋشىلەر دە بار. بۇل تۇجىرىمدار ءبىر قاراعاندا قيسىندى سەكىلدى كورىنگەنىمەن سانيتارلىق نورمالار مەن قاۋىپسىزدىك تالاپتارى ورىندالماعان جاعدايدا مەملەكەت تاراپىنان بەلگىلەنگەن كەز كەلگەن قاتاڭ شارانىڭ ءوزى ىندەتتى اۋىزدىقتاۋعا كومەكتەسە المايتىنىن ۇعىنا الساق كەرەك-ءتى.

اڭگىمەمىزدى تۇيىندەي كەلە اقتوبە وبلىسىندا 2020 جىلدىڭ شىلدە ايىنىڭ ءتورتىنشى جۇلدىزى كۇنى تاۋارلارمەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باسقارۋ دەپارتامەنتى مەن وبلىستىڭ مەملەكەتتىك باس سانيتار دارىگەرى قابىلداعان قاۋلى تارماقتارى بۇعان دەيىنگى قاۋلىمەن سالىستىرعاندا ەداۋىر كەڭەيتىلگەنىن ايتۋ شارت. مۇندا شەكتەۋ شارالارى جونىندەگى تارماقتار مەن جولدار دا قىزمەت كورسەتۋ نىساندارىن بارىنشا كەڭ قامتىپتى. ءبىر سوزبەن ايتقاندا قاۋلىدا ەشقانداي ءمىن جوق دەپ ايتۋعا ابدەن بولادى. ايتسە دە بۇل قابىرعالى قۇجات تالاپتارى تەك قاعاز جۇزىندە نەمەسە ەلەكتروندىق ءماتىن تۇردە قالىپ قويماي تولىقتاي ورىندالسا ەپيدەميانى اۋىزدىقتاۋعا وڭ سەپتىگىن تيگىزە الاتىنى انىق. ويتكەنى قاۋلى تەك ورىندالۋمەن عانا قۇندى بولا الاتىنى ايتپاسا تۇسنىكتى ەمەس پە؟!

 

اقتوبە


سوڭعى جاڭالىقتار

ۇقساس جاڭالىقتار