وقيعا • 17 ماۋسىم، 2020

ءانشى-كومپوزيتوردىڭ پورترەتىن سالدى

50 رەت كورسەتىلدى

قاراعاندىلىق قىلقالام شەبەرى، شىعارما­شىلىق ورتادا تانىمال تۇلعا قايرات كەي-كەي كوجۋحوۆ بيىل سەكسەننىڭ سەڭگىرىنە شىققان ءانشى-كومپوزيتور ەسكەندىر حاسانعاليەۆتىڭ پور­ترەتىن سالدى. كەنەپكە مايلى بوياۋمەن كەس­كىن­دەلگەن كارتينانىڭ ەنى 50 سم، ال بيىكتىگى 70 سم بولادى.

قالادا ءوسىپ، جاستىق شاعىنىڭ كوبىسىن شەتەلدەردە وتكىزگەن سۋرەتشى قازاقى ورتادان قاشىقتاۋ وسكەنىن جاسىرمايدى. «مەكتەپتە وقىپ جۇر­­گەنىمدە، ستۋدەنتتىك كەزىمدە، ءتىپتى ودان كەيىن دە ۆلاديمير ۆى­سوتس­كيدىڭ تابىنۋشىسى بولمادىم. بىراق بىردە ءانشىنىڭ پورترەتىن سالۋعا تاپسىرىس الدىم دا، ونىڭ اندەرىن تىڭداي وتىرىپ، ءوزىم ءۇشىن ۆىسوتسكيدىڭ تاڭعاجايىپ الەمىن اشتىم»، دەيدى ول.

كەيىن كەڭەس زامانىنداعى اتى اڭىزعا اينالعان ەسترادا ءانشىسى ءمۇسلىم ماگوماەۆتىڭ سۋرەتىن سالعان­دا دا، ءدال وسىنداي كۇيگە ءتۇسىپتى.

وسى جىلدىڭ باسىندا قىلقالام شەبەرى ەسكەندىر حاسانعاليەۆتىڭ پورترەتىن سالۋعا تاپسىرىس الىپتى. «سىيلىققا ارنالعان كارتينامەن جۇمىس ىستەۋ بارىسىندا مەن مەتردىڭ اندەرىن تىڭداي وتىرىپ، بۇل مە­لوديانىڭ ءار كەز مەنىڭ جانىمدا بولعانىن سەزىندىم. مەن بالالىق شاعىما قايتىپ ورالعانداي كۇي كەشتىم. ءاربىر ءان بالا كەزىمدەگى وقيعالاردىڭ ۇزىندىلەرىن كوز الدىما الىپ كەلدى: مىنە، اكەم ءىنىم ەكەۋمىزگە دومبىرا تارتۋدى ۇيرەتىپ جاتىر... كەلەسى ءبىر كورىنىس: مەرەكەلىك داستارقان باسىندا باس قوسقان اكەمنىڭ دوستارى ءان سالىپ وتىر، ال انام بولسا اس ۇيدە قوناقتارعا شاي دەمدەۋدە... ءبىز بولساق، ءۇيدى باسىمىزعا كوتەرىپ تىعىلىسپاق ويناپ ءجۇرمىز»، دەپ وي تولعايدى سۋرەتشى قايرات كەي-كەي.

ال ايگىلى «اتامەكەن» ءانىن جازعان اۆتوردىڭ پورترەتىنە ونىڭ كەنشىلەر استاناسىندا تۇراتىن بالدىزدارىنىڭ ءبىرى تاپسىرىس بەرگەن ەكەن. ەسكە سالساق، ءانشى-كومپوزيتور، مۋزىكانت، مەملەكەتتىك سىيلىقتىڭ لاۋرەاتى ەسكەندىر حاسانعاليەۆتىڭ ومىرلىك قوساعى داريكو سوپىجانقىزى – قاراعاندىنىڭ تۋماسى.

 

قاراعاندى

 

سوڭعى جاڭالىقتار

ۇقساس جاڭالىقتار