تەحنولوگيا • 09 ماۋسىم، 2020

Invest Day: ستارتاپتار ءۇشىن تىڭ مۇمكىندىك

27 رەت كورسەتىلدى

قازاقستاندا كەزەكتى Invest Day شاراسى وتەدى. بۇل جولى ءداستۇرلى جيىن ونلاين رەجىمدە ۇيىمداستىرىلادى. باستى ماقسات – ينۆەستورلار مەن دارىندى جاس ونەرتاپقىشتاردى توعىستىرۋ. ولار ەرەكشە جوبالاردى جۇزەگە اسىرۋ مۇمكىندىگىنە يە بولادى.

Astana Hub باس ديرەكتورى دجو­زەف تسيگلەردىڭ ايتۋىنشا، بولا­شاعىنان زور ءۇمىت كۇتتىرەتىن جوبالاردى ىزدەگەن ينۆەستورلار ۇتىمدى باستامالاردى جۇزەگە اسىرۋعا قى­رۋار قاراجات بولۋگە دايىن. وسىن­داي Invest Day شاراسىنان سوڭ تالاي وتاندىق تىرناقالدى باستاما نارىققا شىعا باستادى.

ء«بىز جوبالاردى بىرنەشە باعىت بويىنشا باعالايمىز. ءونىمنىڭ ءوزى، ونىڭ تيىمدىلىگى، قوعامعا پايداسى، قانداي ماسەلەلەردى شەشە الاتىنى، نارىقتاعى سۇرانىسى، جەتىلدىرۋگە قاتىستى كورسەت­كىشتەرى سىنالادى. كەيىن كوماندا تەكسە­رىلەدى. جوبانى قۇراستىرۋشىلاردىڭ كاسىبي دەڭگە­يىنە ءمان بەرىلەدى. سونداي-اق بۇ­گىنگە دەيىن ساۋداعا شىعارىلسا، ساتىلۋ كورسەتكىشى، تۇتىنۋشى سانى، ءونىم وتكىزىلەتىن نارىعىنىڭ گەوگرافياسى، شەت ەلدەر اۋماعىندا تاراتۋ الەۋەتى تولىقتاي سارالانادى»، دەيدى ول.

وتىنىمدەر ءۇش اپتا بويى قابىل­دانادى. باستى تالاپ – IT سالاسى باعىتىنداعى تەحنولوگيالىق ستارتاپ بولۋى كەرەك. ولاردىڭ اراسىنان 10 ۇزدىگى ىرىكتەلەدى. جوبانى قورعاۋعا 5 مينۋت جانە تاعى سونشا ۋاقىت قويىلعان ساۋالدارعا جاۋاپ بەرۋگە بەرىلەدى.

«قانداي جوبالار تابىسقا يە بو­لادى؟ ارينە ەڭ الدىمەن ونلاين وقۋ، جالپى ءبىلىم جانە دەنساۋلىق سىندى قوعامدىق سالالارعا قاتىستى باستامالار قىزىقتى. سونداي-اق ەلەكتروندى ساۋدا، ۆيرتۋالدى شى­نايىلىق باعىتىنداعى ستارتاپتار كوبىنە قارجىلاي قولداۋعا يە بولىپ جاتادى. بىلتىرعى Invest Day شاراسىندا بىرقاتار جوبالارعا 200 مىڭ دوللار شاماسىندا ينۆەستيتسيا تارتىلدى. بيىل دا بۇل مەجەدەن كەم بولمايدى دەپ ويلايمىز»، دەيدى دجوزەف تسيگلەر.

Astana Hub ءباسپاسوز قىزمەتىنىڭ حابارلاۋىنشا الداعى ماۋسىم ايى­نىڭ 30 كۇنى ۇزدىك جوبا اۆتورلارى قا­زاقستاندىق بيزنەس-پەرىشتەلەر، ين­ۆەس­تورلار جانە ءتۇرلى قور وكىل­­دە­رىمەن جۇزدەسەتىن بولادى.

ء«بىز قازاقستاننىڭ يننوۆا­تسيا­لىق ەكوجۇيەسىنىڭ باستى قاتىسۋ­شى­سىمىز. ويتكەنى ءار باعىتتاعى قاتى­سۋشىلارمەن تىكەلەي تىعىز قارىم-قاتىناس جاسايمىز. ستارتاپ ءۇشىن ينۆەستيتسيانىڭ ماڭىزى اي­رىقشا. جاقسى ءبىر باستامالارعا قار­جى قۇيۋعا نيەتتى ينۆەستورلارعا ستارتاپ تاۋىپ بەرەمىز. جوبا يەلە­رىنە ونەر تابىسىن جۇزەگە اسىرۋ ءۇشىن قارجى تار­تۋعا كومەكتەسەمىز. بۇل بارلىعى ءۇشىن ءتيىمد­ى شارا»، دەيدى Astana Hub-تىڭ باس ديرەكتورى.

 

سوڭعى جاڭالىقتار

ۇقساس جاڭالىقتار