انا ءتىلى – ارىم دەيتىن جاستار كوپ

قوعام • 18 مامىر، 2020

انا ءتىلى – ارىم دەيتىن جاستار كوپ

22 رەت كورسەتىلدى

وتكەن جىلى اقتوبە قالاسىندا قر-نىڭ ء«تىل تۋرالى» زاڭىنىڭ قابىلدانعانىنا 30 جىل تولۋىنا وراي ءتۇرى مەن مازمۇنى ۇيلەسىم تاپقان كوپتەگەن ءىس-شارالار جۇزەگە استى. وسى ورايدا ءبىر ماسەلە ايقىن دەۋگە بولادى.

تەمىر قۇسايىن

بۇل ەگەمەن ەلىمىزدىڭ تۇعىرى مەملەكەتتىك تىلىمەن دە بيىك بولا تۇسەتىندىگى. انا ءتىلىن ەركىن مەڭگەرۋى ارقىلى جاستاردىڭ بويىندا تۋعان جەرى مەن ەلىن شەكسىز سۇيە ءبىلۋ داعدىلارى قالىپتاسادى. ونىڭ تەرەڭ يىرىمدەرىنە بويلاي ءبىلۋ – سانالى ازامات بولىپ قالىپتاسۋدى قالايتىن جاستار مەن ستۋدەنتتەردىڭ باستى پارىزى بولماق.

وسى ماقساتتا حالىقارالىق قازاق ءتىلى قوعامى اقتوبە قالالىق فيليالىنىڭ توراعاسى رومان راحيەۆتىڭ ۇيىمداستىرۋىمەن وتكىزىلىپ جۇرگەن بايقاۋلار تۋعان ءتىلدىڭ تۇعىرىن ودان ءارى اسقاقتاتا تۇسكەندەي اسەر قالدىرادى. مەملەكەتتىك مەكەمەلەردە قىزمەت جاسايتىن جاستار مەن جاس ماماندار، وقۋ ورىندارىنىڭ ستۋدەنتتەرى جانە وزگە دە جاس كاسىپ يەلەرى قاتىسقان باسقوسۋلار ولاردىڭ تۋعان تىلگە دەگەن قۇرمەتى شەكسىز ەكەنىن كورسەتىپ كەلەدى. اتالعان بايقاۋدا ولار جاڭاشا ويلاۋ مەن جاڭعىرۋدىڭ جارقىن ۇلگىسىن تانىتىپ ءجۇر. ءمادي بابامىز: «جاستىق شاق وتكىر قىلىش ءجۇزى ەمەس پە، قايراپ ساپ قالىڭ جاۋعا سەرمەگەندەي» دەپ جىرلاپ كەتتى ەمەس پە؟ اقتوبەلىك جاستاردىڭ تۋعان تىلگە دەگەن ۇمتىلىسى ولاردىڭ تۇلا بويىنداعى قاينار كۇش-قۋاتپەن تامىرلاسىپ تۇرعانى دا بايقاۋلار كەزىندە ايقىن بايقالدى.

انا ءتىلدىڭ مارتەبەسىن كوتەرۋدىڭ جولدارى مەن ادىستەرى سان تاراۋ. سونىڭ ءبىرى وزگە ءتىلدى ەتنوس وكىلدەرىنىڭ مەملەكەتتىك تىلگە دەگەن قۇرمەتىن قالىپتاستىرۋ ەكەنى بەلگىلى. ءارى وسى ارقىلى ۇلتارالىق تاتۋلىق پەن بىرلىكتى ودان ءارى تەرەڭدەتە تۇسۋگە جول اشىلماق. اقتوبە قالاسىندا ءدال وسىلاي بولىپ جۇرگەنى كوڭىلگە رياسىز جىلى نۇر قۇيادى. وتكەن جىلى قۇرىلعانىنا 150 جىل تولعان ەلىمىزدىڭ باتىس وڭىرىندەگى ءىرى شاھاردا «قازاق ەلى –قۇتتى مەكەنىم» تاقىرىبىندا وتكىزىلگەن بايقاۋلار مەن كونكۋرستاردىڭ دا اۋقىمى وتە كەڭ بولعانى قانداي عانيبەت. ەڭ باستىسى بۇل باستامالاردا ءوڭىردى مەكەندەيتىن وزگە ەتنوس وكىلدەرى جاستارى مەملەكەتتىك ءتىلدى ءتاپ-ءتاۋىر مەڭگەرگەندەرىن كورسەتىپ بەردى. اتالعان بايقاۋلاردا جۇلدەگەر بولعانداردىڭ كوپتىگى سونشالىق ونى ءتىزىپ ايتىپ بەرۋگە ون ساۋساق جەتپەيدى. ءبارىن قوسقاندا قوس پاراقتى تۇتاستاي تولتىرعانىنا دا ريزاشىلىعىمىز مول.

ولار انا ءتىلىمىزدىڭ قۇدىرەتىن پاش ەتىپ، ەلدىك پەن بىرلىكتىڭ جارقىن ونەگەسىن تانىتتى. سونىمەن بىرگە «قازاق ەلى –قۇتتى مەكەنىم» تاقىرىبىندا وتكىزىلگەن بايقاۋ وعان قاتىسۋشىلاردىڭ بارىنە ۇلكەن سەرپىلىس پەن قۋانىش سىيلادى. ونىڭ وتە قىزعىلىقتى، تارتىمدى ءارى تارتىستى وتكەنى سونشالىق – جۇلدەگەرلەردى انىقتاۋ ادىلقازىلار القاسىنا دا وڭاي تيگەن جوق. بيىلعى جىلدىڭ باسىندا مەملەكەتتىك ءمانى بار وسىنداي ءىس-شارالارعا وزگە ءتىلدى ۇلت وكىلدەرى جاستارى جاناشىرلىق نيەت ءبىلدىرىپ، جاپپاي قاتىسقانى ءبارىمىزدى قۋانتتى دەيدى حالىقارالىق قازاق ءتىلى قوعامى اقتوبە قالالىق فيليالىنىڭ توراعاسى رومان راحيەۆ.

ءبىر سوزبەن ايتقاندا اقتوبەدە مەملەكەتتىك ءتىلدى ەركىن مەڭگەرگەن ءارى ونى ءومىرى مەن قىزمەتىنىڭ ءبىر بولشەگى دەپ سانايتىن جاستار قاتارى جىل ساناپ كوبەيىپ كەلەدى. جوعارىدا ايتىلىپ وتكەندەي ولاردىڭ اراسىندا وزگە ەتنوس وكىلدەرى دە جەتكىلىكتى.

اقتوبە

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز