ايماقتار • 18 مامىر، 2020

شىمكەنت: وڭتۇستىك قاقپا مەن رەسپۋبليكا داڭعىلىندا جوندەۋ جۇمىستارى ءجۇرىپ جاتىر

14 رەت كورسەتىلدى

قالا اكىمى مۇرات ايتەنوۆ شىمكەنتتىڭ وڭتۇستىگىنەن كىرەبەرىسىندەگى كوپىردىڭ قاسبەتىن وزگەرتۋ ماسەلەسىن ماماندارمەن تالقىلادى. سونىمەن قاتار، رەسپۋبليكا داڭعىلى بويىندا ءجۇرىپ جاتقان كۇردەلى جوندەۋ جۇمىستارىنىڭ بارىسىن قاراپ شىقتى. 

قازىرگى تاڭدا مۇندا ارلەۋ جانە جارىقتاندىرۋ جۇمىستارى ءجۇرىپ جاتىر. وسى جىلدىڭ ءساۋىر ايىندا باستالعان كۇردەلى جوندەۋ جۇمىستارىنا قازىنادان 2 ملرد 400 ملن قاراستىرىلعان. شىمكەنت قالاسىنىڭ وڭتۇستىك قاقپاسى سانالاتىن داڭعىل بويىندا ءجۇرىپ جاتقان بۇل جۇمىستار «بەرەكە» كورپوراتسياسىنا جۇكتەلىپتى. قالا اكىمى مۇرات دۇيسەنبەك ۇلى مەردىگەر كومپانياعا جۇمىس ساپاسىنا اسا نازار اۋدارۋدى تاپسىردى.

«رەسپۋبليكا داڭعىلىنداعى جوندەۋ جۇمىسىنىڭ نە ءۇشىن جۇرگىزىلىپ جاتقانىن تۇسىندىرە كەتەيىن. كوپتەگەن تۇرعىن بۇل ماسەلەگە سىنمەن قاراۋدا. بايقاساڭىزدار، جولدىڭ ءبولۋ جولاعىنىڭ ءبىر شەتىنە سۋ قاشىرعىش قۇبىرلار، ەكىنشى  جاعىنا لوتوك ورناتىلۋدا. قۇبىر قويعان سەبەبىمىز، ونىڭ ۇستىنە ۆەلوجول سالىنادى. سول سەبەپتى، ءاسفالتتى جاڭبىر سۋى كوبىنە لوتوكقا قاراي قۇيىلاتىن ەتىپ توسەيمىز. جاۋىن-شاشىن كەزىندە سۋ سول ارناعا قۇيىلادى دا، جولدى سۋ باسۋ قاۋپى بولمايدى. بۇل جۇيەنى بايتۇرسىنوۆ كوشەسىندە بايقاپ كوردىك. سوڭعى جاۋىن كەزىندە جۇمىسى اياقتالماعان ەكى اۋماقتى قوسپاعاندا مۇندا سۋ باسۋ جايتى بولعان جوق»،- دەدى قالا اكىمى.

ايتا كەتەيىك، رەسپۋبليكا داڭعىلىنىڭ ەكى باعىتىندا دا 4 جولاقتى جول قاراستىرىلعان. ۇزىندىعى 5،2 شاقىرىمدى قۇرايتىن كوپىر مەن داڭعىلدىڭ كۇردەلى جوندەۋ جۇمىستارىنا بۇگىندە 150 جۇمىسشى جۇمىلدىرىلعان. بۇل جۇمىستاردى 2021 جىلدىڭ قىركۇيەك ايىندا اياقتاۋ جوسپارلانعان.

 

 

شىمكەنت

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار