ايماقتار • 07 مامىر، 2020

داعدارىسقا قارسى شارالار شوعىرى بەلگىلەندى

4 رەت كورسەتىلدى

ءۇشىنشى ايعا سوزىلىپ بارا جاتقان پاندەميا ىندەتى رەسپۋبليكالىق جانە وبلىستىق بيۋدجەتتەردىڭ كىرىس بولىگىنىڭ اجەپتاۋىر كەلىپ كەتۋىنە اكەلىپ سوقتىرعانى ەشكىمگە دە قۇپيا ەمەس. اتاپ ايتقاندا اقتوبە وبلىسىندا بيۋدجەتتىڭ جەتىسپەستىگى مەن ورىندالماۋ دەڭگەيى ون بەس پايىزدىق كولەمدە بولادى دەپ كۇتىلۋدە. ارينە مۇنىڭ بىرنەشە سەبەپتەرى بار. تۇتاستاي العاندا ايماقتاعى ءىرى ونەركاسىپتىك كاسىپورىندار قىزمەتىندە ايتا قالارلىقتاي كىدىرىس بولماعانىمەن وسى ارالىقتا شاعىن جانە ورتاشا بيزنەستىڭ ءورىسى مۇلدەم تارىلىپ كەتكەنى بەلگىلى بولىپ وتىر. بيۋدجەت تاپشىلىعىنىڭ باستى ءبىر سەبەبىن وسى ارادان ىزدەگەنىمىز ورىندى سەكىلدى.

-ارينە بۇل جاعداي جاقسى قۇبىلىس ەمەس. ايتسە دە مۇنداي كورىنىس بۇعان دەيىن الىنعان بيۋدجەتتىڭ مىندەتتەمەلەرگە كولەڭكەسىن تۇسىرە المايدى. قازىرگى كۇنى قولعا الىنعان داعدارىسقا قارسى شارالار شوعىرى ۋاقىتشا قالىپتاسقان جاعدايدى وڭ جاققا قاراي بۇرۋعا سەپتىگىن تيگىزۋگە ءتيىس، - دەپ مالىمدەدى بۇل جونىندە egemen.kz تىلشىسىنە اقتوبە وبلىسى اكىمىنىڭ ەكونوميكا جانە قارجى ماسەلەلەرى جونىندەگى ورىنباسارى رۋسلان حامباروۆ.

وسى ورايدا وڭىردە داعدارىسقا قارسى ءىس-قيمىل باعدارلاماسىنىڭ باستى ءبىر قىزمەتى جاڭا جۇمىس ورىندارىن اشۋعا ارقا سۇيەتىنىن ايتقانىمىز ءجون. بۇل رەتتە وبلىستىق بيۋدجەتتەن 46 ميلليارد تەڭگە بولىنگەن. اتالعان قوماقتى قاراجات جىل اياعىنا دەيىن 12 مىڭان استام جاڭا جۇمىس ورىندارىن قۇرۋعا مۇمكىندىك بەرەدى دەپ كۇتىلۋدە.

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار