پرەزيدەنت • 10 ءساۋىر، 2020

42 500: پرەزيدەنت تولەم كارتالارىن ونلاين الۋ مۇمكىندىگىن شەشۋدى تاپسىردى

330 رەت كورسەتىلدى

مەملەكەت باسشىسى قاسىم-جومارت توقاەۆ توتەنشە جاعداي جونىندەگى مەملەكەتتىك كوميسسيانىڭ وتىرىسىندا 42 500 تەڭگە كولەمىندەگى الەۋمەتتىك جاردەماقىنى بەرۋدە تۋعان ماسەلەلەردى اتاپ ءوتىپ، ورتالىق جانە جەرگىلىكتى مەملەكەتتىك ورگانداردىڭ جۇمىسىن سىنعا الدى.

«توتەنشە جاعداي كەزىندە تابىسسىز قالعان ازاماتتاردى قولداۋ بويىنشا ۇلكەن جۇمىس جۇرگىزىلىپ جاتىر. ولارعا 42 500 تەڭگە كولەمىندە الەۋمەتتىك كومەك بەرىلۋدە. جاردەماقىنى الۋعا 1،7 ميلليون ازاماتتان ءوتىنىش كەلىپ تۇسكەن.  الەۋمەتتىك كومەك كورسەتۋدە دايىندىقتىڭ تومەن بولعانىن اتاپ وتۋگە تۋرا كەلەدى. جاۋاپتى ۆەدومستۆو مەنىڭ ارالاسۋىمنان كەيىن عانا جەدەل شەشىمدەر قابىلداي باستادى. ورتالىق جانە جەرگىلىكتى مەملەكەتتىك ورگانداردىڭ ءتۇسىندىرۋ جۇمىستارى ءتيىمسىز بولعانىن كورسەتتى» دەپ اتاپ ءوتتى مەملەكەت باسشىسى.

ازاماتتار اراسىندا تۇسىنىسپەۋشىلىك پايدا بولىپ، وڭىرلەردە شوت اشۋ نەمەسە بىرىڭعاي الەۋمەتتىك تولەم ءۇشىن بانكتەردە كەزەكتە تۇرعانى ايتىلدى.

سوندىقتان ۇكىمەتكە جەدەل تۇردە ءار ازاماتتىڭ ۇيدەن شىقپاي-اق مەملەكەتتەن كومەك الۋىن دۇرىس ۇيىمداستىرۋ قاجەت ەكەنىن جانە ونى بارلىق باق پەن الەۋمەتتىك جەلىلەردە تاراتۋ كەرەك ەكەنىنە توقتالدى.

ەل پرەزيدەنتى تولەم كارتالارىن الۋعا قاتىستى تەحنيكالىق ينفراقۇرىلىم عانا ەمەس، مەملەكەتتىك ورگانداردىڭ نورماتيۆتىك جۇيەسى دە دايىن بولماي شىققانىن اتاپ ءوتتى.

كەزدەسۋدە تولەم كارتالارىن قاشىقتان الۋ مۇمكىندىگىن ءۇش كۇن ىشىندە شەشۋ تاپسىرىلدى.

پرەزيدەنت الەۋمەتتىك كومەك شىن مانىندە قارجىلىق قيىندىقتارعا تاپ بولعان ادامدارعا بەرىلەتىنىن ءتۇسىنۋ كەرەك ەكەنىن باسا ايتتى. سوندىقتان تابىسى جەتكىلىكتى تۇلعالاردىڭ الەۋمەتتىك جاردەماقىنى نەگىزسىز الۋىن بولدىرماۋ ماسەلەسى كوتەرىلدى.

سوڭعى جاڭالىقتار

ۇقساس جاڭالىقتار